भांगरभूंय | प्रतिनिधी
जो वेंचून येता तो फुडले वेंचणुकेंत भाजपाचोच उमेदवार आसतलो हातूंत दुबाव ना.
काल पयरूच शिगमो सोंपलो. संवसार पाडव्यान नव्या वर्साक सुरवात जाली आनी देशांत वेंचणुकेचो शिगमो सुरू जालो. गोंय विधानसभेंतलो फोंडेंचो रिकामो जाल्लो सीट भरूंक वेंचणूक आयोगान होच म्हूर्त धरला. म्हणटकूच ह्या शिगम्यांत गोंयूय वांटेकार जालां म्हणचें पडटलें. तसो गोंय विधानसभेचो कार्यकाळ कांय म्हयन्यांनीच सोंपपाचो. जो कोण वेंचून येतलो ताका फक्त स – सात म्हयनेच मेळपाचे. पूण नेमा प्रमाण सीट भरुंकूच जाय म्हणून कांय म्हयन्यां खातीर नवो आमदार वेंचून काडपाचो. कांय काळा खातीर ह्यो काडावडी काडपाच्यो. एके नदरेन हो सगलो नश्टखर्च म्हणचो पडटलो.
रवी नायक संवसाराक अंतरले आनी त्याच दिसाच्यान फोंड्यां राजकारणाच्या शिगम्याक सुरवात जाली. हो सीट ताच्याच पुताक दिवचो म्हणपाची मागणी जावंक लागली. सद्याच्या काळांत मतदारसंघ म्हणल्यार कोणाचें तरी बेंस जालां. बापाय फाटल्यान पुताक, घोवा फाटल्यान बायलेक, भावा फाटल्यान भावाक अशेंच कितें तरी चलता. जो हातूंत सामील जायना तो सोंपता. राजकारण्यांक मतदारसंघ आपणालें बेंसशें दिसता आनी लोकूय तांचे फाटल्यान धांवून ‘हय सायबा’ म्हणटात. हातूंत म्हाका तोखणाय करीन दिसता ती प्रियोळ मतदारसंघाच्या मतदारांची. अजून मेरेन तांणी खंयच्याच उमेदवाराक तिसरे फावटी वेंचून हाडूंक ना. आमदार कितलोय बरो आसूं आनी तो खंयच्याय पक्षाचो आसूं ताका फक्त दोनदांच संद दिल्या. नासल्यार हेर मतदारसंघांनी कितें घडटा तें आमी पळेतात न्ही.
फोंडेंच्या वेंचणुकेचो नाल्ल दवरचोच आसलो पूण पयलींच मगोच्या अध्यक्षाक आपल्या पक्षाची भाजपा कडेन युती आसा म्हणपाची याद जाली. आनी ताणें रवील्या पुताकूच ही तिकेट दिवची म्हणपाची मागणी केली. कांय वर्सां पयलीं युती आसतनाय शिरोडें मतदारसंघांत आपणें स्वताच उमेदवारी भरिल्ली आनी हाकाच लागून युती तुटिल्ली हाचोय बाबड्याक विसर पडलो आसूं येता. आनी तशें पळोवंक गेल्यार वेंचणुके वेळार मगोन कोणा वांगडा युती केल्ली आनी मुखार कितें जालें हेंय तो विसरलो आसूंक जाय. जर वेंचणुकेंत युती आसली जाल्यार भाटीकार खंयच्या पक्षा वतीन उबो राविल्लो हाची जाण ताका आसपाची. आसूं निमाणें राजकारणांत कोण कोणाचो आसना. जो तो स्वताचो स्वार्थ पळेता.
आतां कोणूय म्हणटले ताणें रवील्या पुताक तिकेट दी म्हणल्या. हातूंत ताचो स्वार्थ कसलो? ताणें ही मागणी करून एकाच फारांत दोगांक मारपाचो येत्न केला. समजुंया मगो युती विसरलो आनी भाटीकाराक उबो केलो आनी तो वेंचून आयलो जाल्यार? खात्रीन ढवळीकाराचें राजकारणांतलें म्हत्व उणें जातलें. भाटीकार तांचे परस वयर आसतलो आनी फाल्यां सत्तेर भाजप जरी आयलो तरी मुख्यमंत्र्यांक तो लागींचो आसतलो. युतीचें मंत्रीपद ताचे कडेन गेलें जाल्यार? नुस्तें म्हूण उदका बगर रावंक शकता? म्हणटकूच हे मागणेंतल्यान भाटीकार आपसूक भायर पडलो. ढवळीकार सुरक्षीत उरलो.
दुसरो प्रियोळ मतदारसंघ. हो मतदारसंघ जर पदरांत पडूंक जाय, गोवींद गावडेचो कांटो काडूंक जाय जाल्यार भाजपाक युतीची याद करून दिवंक जाय. गोवींद गावडे रवी नायकाक लागींचो आसलो. ताच्या पुताक लागीं धरप म्हणजेच आपणालें दालें जड करून घेवप. गोविंदाक कुशीक काडून प्रियोळ मगो खतीर मागप. पळेयात कितली हुशारकाय ती. आतां फोंड्यां कोणूय वेंचून येवं, प्रियोळचो सीट मगोक मेळटलो हें नक्की. आतां फोंड्यां कितें मजा जातली तें कोणाच्यान सांगूक जावचें ना. फाटले वेंचणुकेंत कोणाक कितलीं मतां पडिल्लीं ताचेर आदन दवरपी शेणटले. फोंडेंच्या व्हाळांतल्यान जायतें उदक व्हांवलां. आतां कोणाच्या पोशांत कितलें वतलें रोखडेंच कळटलें.
कांय जाणांचो समज आसा फाटले फावटी भाटीकाराक फक्त सत्त्यात्तर मतां उणीं पडिल्लीं. आतां ताचे वांगडा काँग्रेस आसा म्हणटकूच हीं सगलीं मतां भाटीकारा वटेन वतलीं. असो विचार करप पिशेपणांचें थारतलें. भाटीकाराक जीं मतां पडिल्लीं तातूंत मगोचीं मतां आसलीं. मगोचो एक परंपरीक मतदार आसा. ताका फक्त शिंवाचेर शिक्को मारपाची सवंय. हाचे पयलीं जेन्ना मगोची कोणाय कडेन युती जाल्या तेन्ना शींव ना तें पळोवन मतदार कसो तिडकतालो आनी दोळ्यांत दुकां काडून परततालो तें इलेक्शन ड्युटीर आसतना हांवें पळयलां. उमेदवार कोणूय आसूं तांकां फक्त शींव लागता. आतां भाटीकार काँग्रेसींत गेलो म्हूण ते मतदार हाताक मत दितले? दुबाव दिसता. कांय लोक अशेय आसतात ते फक्त उमेदवार पळेतात. तो खंयचे जातीचो, कसले कातीचो, कोणाचो कोण आमकां सगलें लागता. राजेश वेरेंकार आमचो म्हणून मत मारपी भाटीकाराक मत दितले?
भाजपाचें तशें ना. तांकां वयल्यान आदेश आयलो म्हणजे जालें. थंय मागीर फातोर लेगीत आसल्यार ताकाच मत दितले. भाजपांत बंड बी म्हणटात ताका थारो ना. वयल्यान शुच्च केलें तो मोव पडटा. म्हणटकूच जें कितें पदरांत पडटा तें घेवन समाधान मानप इतलेंच तांचे स्वताक फुडारी मानपी करतात. नासल्यार तांची कसली तरी फायल उक्ती जाताच. आतां फोंड्यां कोणूय जरी आयलो तरी ताचो सरकाराचेर कसलोच परिणाम जावचो ना. कारण जो येता तो सत्ताधाऱ्यांक घट धरून आसतलो. रावचेंच पडटलें ताका. तातूंत प्रस्न स-सात म्हयन्यांचो. जो वेंचून येता तो फुडले वेंचणुकेंत भाजपाचोच उमेदवार आसतलो हातूंत दुबाव ना. सद्याक कोण कितें उलयता आनी कोण कितें सांगता तेंच आमी आयकून आमचें मनोरंजन करून घेवया.
फोंड्यां आपाचोय उमेदवार आसा. पूण गोंयकारांक आप आपलोसो दिसना. गोंयांत आप खंय आसा? गोंयांत हांव आनी तूं. आप बी म्हणटात ते उत्तरेक. म्हाका तरी दिसता आपान गोंयां पुरतें नांव बदलूंक जाय. तुमकां कितें दिसता?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
