भांगरभूंय | प्रतिनिधी
वॅस्ट इंडीज पंगडान संवसारीक टी-20 सर्तीच्या सुपर आठांतले सवे मॅचींत अमेरिका (यूएसए) पंगडाक 9 विकेटींनी हारयलो. ह्या जैता सयत वॅस्ट इंडीज पंगडान सेमी फायनलींत सुवात मेळोवपाची आपली आस्त कायम राखल्या. सुपर आठतल्या दुसऱ्या गटांत दक्षीण आफ्रिका चार गुणां सयत पयले सुवातेर आसा. ताच्या उपरांत वॅस्ट इंडीजाचो क्रमांक लागता. तिसरे सुवातेर इंग्लंड आसा. दोगांयचे दरेकी 2 गूण आसात.पूण, बरे रेनरेटीच्या नेटार वॅस्ट इंडीज दुसरे सुवातेर आसा.
वॅस्ट इंडीजान हांगाच्या कॅंसिंग्टन ओव्हल स्टेडियमाचेर टॉस जिखून अमेरिकेक पयलीं बॅटींग करपाचें आमंत्रण दिलें आनी ताचो डाव 19.5 ओव्हरींनी फकत 128 धांवड्यांचेर सोंपयलो. ते उपरांत 129 धांवड्यांची मोख वॅस्ट इंडीजान फकत 10.5 ओव्हरींनी मेळयली.
आमचे खातीर ही मॅच म्हत्वाची आशिल्ली अशें वॅस्ट इंडीजाचो अश्टतासांचो खेळगडो आंद्रे रसेलान सांगलें.
अमेरिकेन गट पांवड्या वयले मॅचींत पाकिस्तानाक हारयिल्लो. भारता आड बरो खेळ केल्लो. पूण, वॅस्ट इंडीजा आड ताणें दिमी मारली.
अकेल हुसेन, गुदकेश मोटी आनी रॉस्टन चेस ह्या स्पिनरांचे भोवतणे विंडिजान आक्रमण केंद्रीत केल्लें. अमेरिकेच्या बॅट्समनांनी पावर प्लेचो बरे तरेन फायदो करून घेतलो. पूण, वॅस्ट इंडीजान उपरांत मॅची वयली आपली पकड घट केली. ह्या चेपणाखाला अमेरिकेन नियमीत वेळांत विकेटी व्हगडायल्यो. अॅण्ड्रियस गौसान 29 आनी नितीश कुमारान 20 धांवड्यांची खेळी केली. मुखेली अॅरोन जोन्स आनी अणभवी कोरे अॅण्डरसन कडल्यान अमेरिकेक व्हड आस्त आशिल्ली. पूण, तांकां व्हड खेळी करपाक जमली ना. रॉस्टन चेसान 19 धांवड्यांनी 3, रसेलान 31 धांवड्यांनी 3 विकेटी घेतल्यो. अल्झारी जोसेफान तांकां बरी साथ दिली.
सुपर आठातले पयले मॅचींत वॅस्ट इंडीजाचो ओपनर ब्रॅण्डन किंग जखमी जाल्लो. ताचे सुवातेर शाई होपाक डावाची सुरवात करपाची संद मेळ्ळी. ताणें 31 बॉलांनी चार चवके आनी आठ सक्यांचे मजतीन नाबाद 82 धांवड्यो करून मेळिल्ले संदीचो फायदो करून घेतलो.
निकोलस पुरनान 12 बॉलांनी 27 धांवड्यो करीत ताका बरी साथ दिली. विंडिजान आठ विकेटी आनी 55 बॉल राखून जैत जोडलें.
वॅस्ट इंडीजाक ताचे पयले सुपर आठांतले मॅचींत इंग्लंडा कडल्यान हार घेवची पडिल्ली. पूण, अमेरिके आडची मॅच व्हडा फरकान जिखिल्ल्यान ताची रनरेट 1.814 अशी जाली. फुडली मॅच तो दक्षीण आफ्रिके आड खेळटलो. आफ्रिकेन अजून मेरेन एकूय हार घेवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
