वॅस्ट इंडिजाचो हार वाटावपा खातीर संघर्श

भांगरभूंय | प्रतिनिधी

येजमान भारतान दिल्ली टॅस्टीच्या तिसऱ्या दिसा वॅस्ट इंडिजाचो पयलो डाव 248 धांवड्यांचेर सोंपोवन तांकां फॉलोऑन दिलें. पूण, दुसऱ्या डावांत जॉन कॅम्पबेल आनी शे होप हांणी शेंकड्याची भागिदारी करून भारताचें जैत लांबयलें. आयज चवथ्या दिसा उरिल्ल्यो 8 विकेटी घेवन जैत जोडपाक भारताचो यत्न आसतलो. दुसरे वटेन डावान हार वांटावपाक खातीर विंडिजाक आनीक 97 धांवड्यांची गरज आसा.

काल तिसऱ्या दिसा सकाळीं कुलदीप यादवान 10 ओव्हरींचो लांब स्पेल केलो आनी तीन विकेटी लेगीत घेतल्यो. ताणें सगल्यांत पयलीं तिसऱ्या दिसाचे सातवे ओव्हरींत शे होपाक बोल्ड केलो. फुडले ओव्हरींत ताणें विकेटकीपर बॅट्समन टेव्हिन इमलाक हाका बाद केलो. दोन ओव्हरी उपरांत जस्टिन ग्रिव्स रिव्हर्स स्विप करपाच्या यत्नांत एलबीडब्ल्यू बाद जालो. फुडले ओव्हरींत मोहम्मद सिराजान जोमेल वारिकनाक बोल्ड करून वॅस्ट इंडिजाची स्थिती 8 बाद 175 अशी केली. ते उपरांत खारी पिएर (23) आनी अॅण्डरसन फिलिप (24) हांचे मदीं 46 धांवड्यांची भागिदारी जाली. दोगांयनी एक वर मेरेन वॅस्ट इंडिजाची विकेट पडपाक दिली ना. अखेरेक जसप्रीत बुमराच्या सरळ गूड लॅन्थ बॉलाक ऑनसायडींत खेळपाक गेलो. पूण, तो चुकलो आनी बॉल थेट ऑफ स्टम्पाक लागलो.

ते उपरांत फिलिप आनी जेडेन सिल्स (13) हांचे मदीं 27 धांवड्यांची ल्हानशी भागिदारी जाली. अखेरेक कुलदीप यादवान सिल्साक एलबीडब्ल्यू बाद करून विंडिजाचो पयलो डाव सोंपयलो. अशे तरेन भारताक पयल्या डावांत 270 धांवड्यांची आघाडी मेळ्ळी. भारतान विंडिजाक फॉलोऑन दिवन परतून बॅटींग करपाक लायलो.

फॉलोऑन करतना लेगीत विंडिजाची सुरवात बरी जाली ना. ताच्या ओपनरांनी णववे ओव्हरी मेरेन संघर्श केलो. अखेरेक तेजनारायण चंद्रपॉलाक सिराजाचो बॉल पूल करपाक गेलो आनी कॅच गिलान धरली. चंद्रपॉलान 30 बॉलांनी 10 धांवड्यो केल्यो.

कांय वेळान वॉशिंग्टन सुंदरान एेलेक एेथनजाक (7) बोल्ड केलो. ते उपरांत कॅम्पबेल आनी शे होप हांणी उत्कृश्ट भागिदारी केली. दोगांयनी भारताच्या सगल्याच बॉलरांक संयमान तोंड दिलें. दोगांयनी अजून मेरेन 207 बॉलांनी 138 धांवड्यांची नाबाद भागिदारी केल्या. अंदूंच्या वर्सांत टॅस्ट क्रिकेटींत विंडिजाची ही सगल्यांत व्हड भागिदारी थारल्या. आयज चवथ्या दिसा डावान हार वांटावपाचो तांचो यत्न आसतलो.