भांगरभूंय | प्रतिनिधी
योगेश सोमण: वास्को रवींद्र भवनांत वीर सावरकर व्याख्यान माळेचें आयोजन
वास्को: वीर सावरकर म्हणल्यार क्रांती आनी क्रांती म्हणल्यारच वीर सावरकर हें समिकरण जालां. वीर सावरकर हांच्या क्रांतीन लोकमान्य टिळक हांकांय प्रेरीत केल्लें अशें उलोवप मराठी आनी हिंदी सिने कलाकार योगेश सोमण हांणी हांगा एके कार्यावळींत केलें.
वीर सावरकर जयंती निमतान रवींद्र भवन बायणा हांगा मनोहर पर्रीकार सभाघरांत सावरकर आनी क्रांती ह्या विशयाचेर योगेश सोमण हांचें व्याख्यान आयोजीत केल्लें.
सोमण हांणी वीर सावरकर हांच्या क्रांती संबंदी विवीध आंगांनी म्हायती दिली. वीर सावरकर हे 360 अंशांत विकसीत जाल्लें व्यक्तीमत्व आशिल्ले. समाजसुधारक, नाटककार, कवी, साहित्यीक, राष्ट्रप्रेम आनी हेर मळार तांणी क्रांती केल्या अशें सोमण हांणी म्हणलें. वीर सावरकर हांची असभ्य भाशेंत तांची बदनामी करप कांय जाणांचो धंदो जाला. तांची बदनामी मुद्दाम करतात अशेंय तांणी म्हणलें.
वीर सावरकर हांणी ब्रिटिशांची माफी मागिल्ली हें सेगीत सांगतात. पूण तांणी माफी मागूंकच नाशिल्ली जाल्यार तांणी वाटाघाटी वेळार विनंतीपत्रां दिल्लीं. अशीं आठ फावटी तांणी विनंतीपत्रां दिलीं. वीर सावरकर हांणी हेरांच्या दोशांची जापसालदारकी आपल्या आंगार घेवन तांची शिक्षा स्वता भोगपाची तयारी दाखयिल्ली. पूण त्या बदला हेरांक सोडचे अशी अट तांणी घाल्ली अशें सोमण हांणी स्पश्ट केलें.
वीर सावरकर हांच्या मनांत, रगतांत क्रांती आशिल्ली. विदेशी कपड्यांची होळी देशांत पयलेच फावटी वीर सावरकर हांणी केल्ली. वीर सावरकर हांणी हिंदुत्व म्हणल्यारूच राष्ट्रीयत्व हो विचार मांडिल्लो अशें सोमण हांणी म्हणलें.
रवींद्र भवनाच्या कार्यकारिणी समितीचे वांगडी शांताराम पराडकार हांणी सोमण हांची वळख करून दिली. ह्या वेळार रवींद्र भवनाच्या संगीत विद्यालयाच्या विद्यार्थ्यांनी वीर सावरकर हांच्या ‘सागरा प्राण तळमळला’ हें गीत गायलें.
अध्यक्ष जयंत जाधव हांणी येवकार दिलो. उपाध्यक्ष डॉ. धमेंद्र प्रभुदेसाय हांचे हस्तुकीं सोमण हांकां यादस्तीक भेटयलें. गौरीश नायक हांणी सुत्रसंचालन केलें. कार्यावळ येसस्वी करपा खातीर कार्यावळ अधिकारी बरेश नायक आनी हेरांनी कश्ट घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
