भांगरभूंय | प्रतिनिधी
विशेश न्यायालय : पर्रीकार, मुख्यमंत्री राणे हांची साक्ष नोंद करूंक ना
पणजी ः वीज सवलत भानगड प्रकरणांत मंत्री मॉविन गुदिन्हो हांचे सयत सगल्या दुबावितांक हालींच पुरावो नाशिल्ल्यान निर्दोश थारायल्यात. उत्तर गोंयच्या खाशेल्या न्यायालयान दिल्ल्या आदेशांत, एकंदर तपास प्रक्रियेचेर खर टिका करून तपास अधिकारी संबंदीत लोकां आड गुन्यांवकारी गुन्यांव वा भ्रश्टाचार सिद्ध करपाक पुरायपणान अपेस आयलां अशें सांगलां.
ह्या प्रकरणांतले म्हत्वाचे साक्षीदार सर्गेस्त मुख्यमंत्री मनोहर पर्रीकार आनी तेन्नाचे मुख्यमंत्री प्रतापसिंह राणे हांची साक्ष तपास अधिकाऱ्यांनी नोंद करूंक ना. हे साक्षीदार मुद्दाम टाळ्ळे आनी म्हत्वाचीं तथ्यां लिपयलीं हें स्पश्ट जाता. ताका लागून ही पुराय केस दुबळी जाली अशें न्यायाधीश इर्शाद आगा हांणी निवाड्यांत म्हणलां.
वीज सवलतीची फायल हाताळपाक प्रक्रियात्मक चुको आनी अनियमितताय आयली तरी दुबावितांचो कितें हेतू आशिल्लो वा तांकां अर्थीक फायदो जाला काय ना हें दाखोवपा खातीर ठोस पुरावे सादर करूंक नात. भ्रश्टाचार प्रतिबंधक कायद्या खाला (कलम 13 (1) (ड) पीसी कायदो) गुन्यांव थारावपाक जाय आशिल्ले पुरावे सादर करूंक नाशिल्ल्याचीय न्यायालयान नोंद केलां. ह्या प्रकरणाचो फुडलो तपास अहवाल आरोपपत्रा कडेन जोडिल्लो ना वा न्यायालयांत सादर केल्लो ना. देखून न्यायालयान मुद्दाम चवकशी चुकीचें केल्ल्याचें निरिक्षण करून चवकशी प्रक्रियेचेर टिका केली.
सरकारान संबंदीत कंपनीं कडल्यान सवलतीची रक्कम वसूल केल्या तरी फकत वसूल केल्ल्यान दुबावितांची जापसालदारकी सोंपना. पूण उपलब्ध आशिल्ल्या पुराव्यां वयल्यान कसलेंच कट वा अधिकाराचो गैरवापर जाला अशें दिसूंक नाशिल्लें. देखून तांणी चडांत चड ‘अनियमितताय’ केली अशें म्हणूं येता. पूण ह्या प्रकारचो भ्रश्टाचार गुन्यांवकारी भ्रश्टाचार थारना हें पळोवन न्यायालयान पुरावे नाशिल्ल्यान दुबावितांक निर्दोश थारायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
