वीज दरवाड सामान्यांक परवडपा सारकीच

भांगरभूंय | प्रतिनिधी

मुख्यमंत्रीः विजेच्या मुळाव्या सुविधां खातीर मेळटले 2,500 कोटी

भांगरभूंय । प्रतिनिधी

पणजी : वीज पुरवण सुदारपा खातीर सरकारान 2 हजार कोटी रुपया खर्च केल्यात. केंद्रा कडल्यान फुडाराक 2,500 कोटी रुपयांचें अनुदान वीज पुरवण सुदरावपा खातीर मेळपाचे आसात. दरवाडीचो फटको सामान्यांक बसचो ना, अशें सांगून मुख्यमंत्री डॉ. प्रमोद सावंत हांणी वीज दरवाडीचे समर्थन केलें.

वीज नियमन आयोगान मान्यताय दिले उपरांत विजेच्या दरांत 3.50 टक्के वाड जाल्या. हे दरवाडीचेर विरोधकांनी सरकाराचेर खर टिका केल्या. वीज बिलांची 12 हजार कोटींची थकबाकी वसूल करपाची आसतना वीज दरवाड कित्याक? असो प्रस्न काँग्रेसीन केला. पर्वरी मंत्रालयांत पत्रकार परिशदेंत उलयतना मुख्यमंत्र्यांनी विरोधकांचे टिकेक जाप दिली.

जोड वीज नियामक आयोगान मान्यताय दिले उपरांत वीज बिलांचे दर वाडोवपाचो निर्णय जाला. युनिटा फाटल्यान 60 ते 90 पयशें दर वाडला. सामान्य लोकांक 8 ते 10 रुपया चड बील येतलें. हें बील गोंयकारांक चड न्हय. हेर राज्यांनी विजेचे दर गोंया परस चड आसात. दर चड आसतना विजेच्या उणावा खातीर शटडावन जाता. गोंयकारांक शटडावन म्हणल्यार कितें तें खबर ना. महाराष्ट्रा सारक्या राज्यांत लोडशेडिंगाक लागून वराचीं वरां लायट नासता. विजेच्या मुळाव्या सुविधांचेर सरकारान 2 हजार कोटी रुपया खर्च केल्यात. खात्याची येणावळ वाडली जाल्यार केंद्रा कडल्यान आनीक अडेच हजार कोटींचें अनुदान मेळप सोंपें जातलें, अशें मुख्यमंत्र्यांनी सांगलें. वीज पुरवण सुदारपा खातीर भुंयगत वीज केबलाचीं कामां सुरू आसा. ह्या कामांक निधीची गरज आसा. हाका लागून कांय प्रमाणांत विजेचे दर वाडोवपाचे पडले. उद्देगां खातीर दर्जेदार वीज पुरवण जावपाची गरज आसा. योग्य दाबान वीज पुरवण जावची अशी मागणी उद्देजकांची आसा. उद्देगीक आनी वेवसायीक गिरायकां खातीर दरवाड चड आसा, अशें मुख्यमंत्री डॉ. प्रमोद सावंत हांणी सांगलें.

तमनार प्रकल्पाचे ऑक्टोबरांत उक्तावण

तमनार प्रकल्पाचें काम पुराय जायत आयलां. प्रकल्पाचें ऑक्टोबर मेरेन उक्तावण जावप शक्य आसा. तमनार प्रकल्प बेगीन पुराय जावचो, अशी उद्देजकांची मागणी आसा. तमनार प्रकल्पाक लागून गोंयाक अतिरिक्त वीज घेवप शक्य जातलें. वीज चड उपलब्ध जाली जाल्यार ती उद्देगांक दिवप शक्य जातलें, अशें मुख्यमंत्री डॉ. प्रमोद सावंत हांणी सांगलें.