भांगरभूंय | प्रतिनिधी
पणजी : वीज खात्यान वीज दरवाड लागू केल्या. आतां स्मार्ट मीटर, टायम ऑफ डे दर हाका लागून गिरायकांक अर्थीक भुरदंड सोसचें पडटलें. हाका लागून वीज बिलांत दुपेटीन वाड जातली. दरवाड तशेंच टायम ऑफ द डे फाटीं घेवंक ना जाल्यार आम आदमी पक्षा वतीन खर आंदोलन करतले, अशी शिटकावणी प्रदेशाध्यक्ष अमित पालेकार हांणी दिली. सोमारा पक्षाच्या शिश्टमंडळान मुखेल वीज अभियंतो स्टीफन फर्नांडीस हांची भेट घेतली. ह्या वेळार वाल्मिकी नायक हाजीर आशिल्ले.
पालेकर हांणी, स्मार्ट मीटर टायम ऑफ द डे हे विशीं खात्याचे मंत्री उद्धटपणान जाप दितात. अधिकारीय स्पश्टीकरण दिनात. हाका लागून लोकांच्या मनांत संभ्रम निर्माण जाला. घरगुती गिरायकांक टायम ऑफ द डे दर लागू जातलें काय ना, लागू जालें जाल्यार तें केन्ना सावन, हाच्यो जापो खात्यान दिवप गरजेचें. स्मार्ट मीटर आजूनय लावंक ना तरी खात्या वतीन लिपून शुल्क घेतात. स्मार्ट मिटर हो एक व्हड घोटाळो. जनतेक लुटपाचें नवें साधन.
तांणी म्हणलें, आमचें पंजाब सरकार २५० युनीट फुकट वीज दिता. आमी गोंय सरकाराक फुकट वीज दिवपा विशीं मागणी करिना. वीज खात्यान थकीत रक्कम वसूल करची. हे सरकारी खातींच वीज खात्याक सुमार ४०० कोटी रुपया दिवपाचीं आसात. टायम ऑफ द डेक लागून सरकार जनतेक परत एक फावट पाशाण युगांत धुकलता. जनतेन सांजेवेळार दिवे बंद करून काळखांत बसचें अशी सरकाराची अपेक्षा आसा. हाचे आड आमी घराघरांनी वचून जागृताय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
