भांगरभूंय | प्रतिनिधी
सुदिन ढवळीकारः अनियंत्रीत वीज खरेदी आनी पगारां खातीर दरवाड
भांगरभूंय । प्रतिनिधी
पणजीः हालींच केल्ली वीज दरवाड कशीच फाटीं घेवचे नात. वीज दरवाड हो अर्द-न्यायिक प्राधिकरणांचो निर्णय. हे खातीर हो निर्णय आतां रद्द करप शक्य ना. नियंत्रणा भायर गेल्लो वीज विकती घेवपाचो खर्च आनी कर्मचाऱ्यांच्या पगारां खातीर ही वीज दरवाड केल्या, अशी जाप वीज मंत्री सुदिन ढवळीकार हांणी विधानसभेंतले लेखी जापेंत दिल्या.
सरकार वीज दरवाड फाटीं घेवपाचो निर्णय घेतलें काय ना, असो प्रस्न केपेंचे आमदार एल्टन डिकोस्टा हांणी विचारिल्लो. हाचेर जाप दितना वीज मंत्री हांणी विधानसभेच्या पटलार लेखी जापेंत सांगलें, संयुक्त वीज नियामक आयोग (जईआरसी) जें एक अर्द-न्यायीक प्राधिकरण आसा तांणी वीज दरवाडीचो निर्णय घेतला आनी ह्या निर्णयाक गोंय वीज खातें बांदील आसा. देखून, वीज दरवाड फाटीं घेवपाक वीज खात्या कडेन कसलेच अधिकार नात. 16 जूनाच्यान 3.50 टक्के वीज दरांत वाड केल्या. जो महसूल उणाव खात्याक भासता तातूंतलो इल्लो भाग दरवाड करून आनी उरिल्लो भाग बजेटांतले तरतुदींतल्यान भरून काडपाक जेईआरसीन वीज दरवाडीक मान्यताय दिल्या.
महसूल उणाव दोन गजाली खातीर जाता. एक म्हणल्यार नियंत्रण नासतना वीज विकती घेवप, जाचो भाग वट्ट खर्चांत 80 टक्के आसा. कोरोना म्हामारी काळा सावन हातूंत 40 टक्के वाड जाल्या. तशेंच कर्मचाऱ्यांचो पगारूय नियंत्रणा भायर गेला. वट्ट खर्चाचो हो 15 टक्के भाग आसा. टॅरीफ पॉलिसी 2016 च्या कायदेशीर तरतुदी प्रमाण सरासरी पुरवण दरांक तेंकून वीज पुरवण संस्थांनी ल्हवू ल्हवू दरवाड करून गिरायकांचे सरासरी बील दर 20 टक्क्यां भितर हाडपाक जाय. ताका लागून हाका पाळो दिवपा खातीर तशेंच अनुदानीत आनी अनुदान दिवपी गिरायका मदीं संतुळाय हाडपा खातीर जेईआरसीन अंदूं वीज दरवाडीक मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
