वीज दरवाडीचेर आयज जातली भौशीक सुनावणी

भांगरभूंय | प्रतिनिधी

पणजी : वीज खात्यान जोड वीज नियमन आयोगा कडेन (जेईआरसी) जो दरवाडीचो प्रस्ताव दवरला ताचेर आयज सकाळीं पणजेंत मिनेझीस ब्रागांंझा सभाघरांत भौशीक सुनावणी जातली. राजकी पक्षांंचे प्रतिनिधी, एनजीओ तशेंच सामान्य नागरिकांक भौशीक सुनावणेक हाजीर रावपाक मेळटलें अशी म्हायती मुखेल वीज अभियंते स्टिफन फर्नांडीस हांणी दिली. सामान्य नागरिकां सयत एनजीओ कडल्यान दरवाडेक विरोध जातलो. हाका लागून ही सुनावणी गाजपाची चिन्नां आसात.

वीज खात्यान जोड वीज नियमन आयोगा कडेन (जेईआरसी) अंदूं म्हणल्यार 2025 – 2026 वर्सा खातीर सरासरी 5.95 टक्के वीज दरवाडीचो प्रस्ताव सादर केला. फुडल्या पांच वर्सां खातीर म्हणल्यार 2025 – 26 ते 2029- 30 मेरेनच्या दरवाडीचो प्रस्ताव खात्यान सादर केला.

वीज खात्यान जेईआरसी मुखार दोन प्रस्ताव (याचिका) सादर केल्यात. एक प्रस्ताव मुळाव्यो सुविधा आनी खर्चा संबंदी आसा. दुसरी याचिका दरवाड आनी येवपी येणावळी विशींची आसा. विजेच्या दरवाडीक जोड वीज नियमन आयोगान मान्यताय दिवची पडटा. आयोगान मान्यताय दिली काय सरकार वीज दरवाडीचो निर्णय घेता. आयोगान मान्यताय दिले बगर वीज दरवाड करप शक्य जायना. सद्याची येणावळ दरवाडी उपरांतची अंदाजीत येणावळ हांचो आराखडो याचिकेच्या स्वरपांत आयोगाक सादर करचो पडटा. भौशीक सुनावणी वेळार खात्याचे अधिकारी प्रस्ताव सादर करून दरवाडीची गरज आयोगा मुखार मांंडटले.

फुडल्या वर्सा म्हणल्यार 2026 – 27 वर्सा खात्यान 5.64 टक्के, 2027 – 28 वर्सा 4.88 टक्के दरवाडीचो प्रस्ताव आसा. 2028 – 29 आनी 2029 – 30 वर्सा वीज दरवाड मागूंक ना.

घरगुती (एलटी) विजेचो दर सध्या म्हयन्याक पयल्या 100 युनिटा खातीर 1.90 रुपया आसात तो 1.96 रुपया करपाचो प्रस्ताव आसा. 101 ते 200 युनिटा मेरेन 2.80 रुपया वेल्यान 2.91 रुपया, 201 ते 300 युनिटा मेरेन 3.70 रुपया वेल्यान 3.89 रुपया, 301 ते 400 युनिटा मेरेन 4.90 रुपया वेल्यान 5.15 रुपया दर जातलो. 400 युनिटा फुडे सध्याच्या 5.80 रुपया बदला 6.15 रुपया दरवाडीचो प्रस्ताव आसा. वेवसायीक, उद्देगीक, शेती, मिलीटरी सेवा हांच्या विजेचे दर वाडोवपाचो प्रस्ताव आसा.