भांगरभूंय | प्रतिनिधी
पणजी ः भौशीक सुवातेर वापरिल्ल्या विजेचो भार वीज गिरायकांक सोंसचो पडटलो. आतां रस्त्यावेल्या भौशीक वीज लायटींचे शुल्क वीज गिरायकांक भरचे पडटले. हे संबंदी गोंय वीज खात्यान अधिसुचोवणी जारी केल्या.
हे अधिसुचोवणे प्रमाण, गिरायकांक 1 ऑक्टोबर सावन रस्त्या वयल्या लायटींचे शुल्क भरचो पडटा. रस्त्या वयल्या भौशीक लायटींचे शुल्क गिरायकांच्या वीज बिलांतल्यान वसूल करतात अशें वीज खात्याचे मुखेल अभियंते स्टीफन फर्नांडीस हांणी हे संबंदी जारी केल्ले अधिसुचोवणेंत सांगलां.
गिरायक कितली युनिट वीज वापरतात हाचे वयल्यान गिरायकांची श्रेणी थारायल्या. ते प्रमाण गिरायकांच्या वीज बिलांतल्यान रस्त्या वयल्या लायटींचे शुल्क काडून घेतात अशें अधिसुचोवणेंत म्हळां. तशेंच 1 ऑक्टोबर सावन हो शुल्क लागू जाला अशेंय नमूद केलां.
अधिसुचोवणे प्रमाण, ‘लो टेन्शन’ घरगुती वापरा खातीर, ‘लो टेन्शन’ शेतकी वापरा खातीर दर युनिटाक 5 पयशे शुल्क घेतात. हेर घरगुती, वेपारी आनी उद्देगीक वापरा खातीर दर युनिटाक 8 पयशे शुल्क घेतात.
‘लो टेन्शन’ गट, उणें उत्पन्न गट आनी इलेक्ट्रीक वाहनां चार्ज करपी स्टेशनां खातीर कसलोच अतिरिक्त शुल्क घेवचे ना. राज्यांत वीज दर 4 टक्क्यांनी वाडोवपाच्या प्रस्तावाक जेईआरसीन पयलींच मान्यताय दिल्या.
चालू अर्थीक वर्स 2026 ते 2027 , 2027 ते 2028, 2028 ते 2029 आनी 2029 ते 2030 मेरेन लागू हो वाडीव शुक्ल लागू जातलो. जेईआरसीन अधिसुचोवणेंत सांगलां की नवो वाडिल्लो दर 1 ऑक्टोबर सावन लागू जालो. हे संबंदी सविस्तर म्हायती जारी केल्ल्या अधिसुचोवणेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
