भांगरभूंय | प्रतिनिधी
खात्याच्या प्रस्तावाचेर जातली भौशीक सुनावणी
भांगरभूंय । प्रतिनिधी
पणजी : वीज खात्यान जोड वीज नियमन आयोगा कडेन (जेईआरसी) अंदूं 2025 – 2026 वर्सा खातीर सरासरी 5.95 टक्के वीज दरवाडीचो प्रस्ताव सादर केला. फुडल्या पांच वर्सां खातीर 2025 – 26 ते 2029- 30 मेरेनच्या दरवाडीचो प्रस्ताव खात्यान सादर केला. जोड वीज नियमन आयोगा मुखार (जेईआरसी) 9 मे 2025 दिसा भौशीक सुनावणी जातली. पणजे मिनेझीस ब्रागांझा सभाघरांत भौशीक सुनावणी जातली, अशी म्हायती खात्याच्या अभियंत्यांनी दिली.
वीज खात्यान जेईआरसी मुखार दोन प्रस्ताव (याचिका) सादर केल्यात. एक प्रस्ताव मुळाव्यो सुविधा आनी खर्चा संबंदांत आसा. दुसरी याचिका दरवाड आनी येवपी येणावळी विशींची आसा. विजेचे दरवाडीक जोड वीज नियमन आयोगान मान्यताय दिवची पडटा. आयोगान मान्यताय दिले उपरांत सरकार वीज दरवाडीचो निर्णय घेता. आयोगान मान्यताय दिले बगर वीज दरवाड करप शक्य जायना. सध्याची येणावळ दरवाडी उपरांतची अदमासान येणावळ हांचो आराखडो याचिकेच्या स्वरुपांत आयोगाक सादर करचो पडटा. भौशीक सुनावणी घेतले उपरांत आयोग दरवाडी विशीं निर्णय घेता, अशी म्हायती वीज खात्याच्या अभियंत्यांनी दिली. वीज दरवाडीची याचिका (प्रस्ताव) वॅबसायटीचेर आसा. हाचेर खात्यान सुचोवण्यो मागयल्यात.
फुडल्या वर्सा म्हणल्यार 2026 – 27 त खात्यान 5.64 टक्के, 2027 – 28 त 4.88 टक्के दरवाडीचो प्रस्ताव आसा. 2028 – 29 आनी 2029 – 30 त वीज दरवाड मागूंक ना. घरगुती (एलटी) विजेचो दर सध्या म्हयन्याक पयल्या 100 युनिटा खातीर 1.90 रुपया आसा, तो 1.96 रुपया करपाचो प्रस्ताव आसा. 101 ते 200 युनीट मेरेन 2.80 रुपया वयल्यान 2.91 रुपया, 201 ते 300 युनीट मेरेन 3.70 रुपया वयल्यान 3.89 रुपया, 301 ते 400 युनीट मेरेन 4.90 रुपया वयल्यान 5.15 रुपया दर जातलो. 400 युनिटा फुडें सध्याच्या 5.80 रुपया बदला 6.15 रुपया दरवाडीचो प्रस्ताव आसा. वेवसायीक, उद्देगीक, शेती, मिलिटरी सेवा हांचे विजेचे दर वाडोवपाचो प्रस्ताव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
