भांगरभूंय | प्रतिनिधी
कितली म्हारगाय गे सायबिणी, संवसार कसो करचो आमी… ही फुगडी जाणें बरयल्या, ताका पुरस्कार फावो. आतां हे म्हारगायेंत आनीक थोडी भर पडटली. लायटीचे दर वाडल्यात. 2029- 2030 मेरेन ते सरासरी चार टक्के वाडटले. मदीं वेंचणूक येतली तेन्ना देंवतलें, पूण ती थाकाय कांय म्हयन्यां पुरतीच आसतली! संयुक्त वीज नियामक आयोगान पांच वर्सां खातीर दरवाड करपाक पाचवो बावटो दाखयला. कालच्यान ही वाड लागू जाल्या. म्हणटकच म्हारगायेन हुलपुवपी कुटुंबांक आतां शाॅक बसपाचो आसा.
कांय वर्सां पयलीं दिल्लींत केजरीवाल सरकारान मुफत वीज दिल्ली. गोंयांतूय तें वारें पाविल्लें. वीज मंत्री काब्राल हांकां चर्चेचें आव्हानूय दिल्लें. वेंचणूक सोंपतकच ही हवा विरघळ्ळी. तशीं सगलींच सरकारां आतां कसली ना कसली ‘रेवडी’ मतदारांक वांटूंक लागल्यांत. मतदारांनी भुल्लुसून मतां दितकच कांय म्हयने ह्यो रेवड्यो वांटप, उपरांत ल्हवूच निमतां सांगून त्यो बंद करप. थोड्यांक मात ते रेवडेची खरेंच गरज आसता. कारण देशांत अजून दळडीर रेशे सकयल रावपी लाखांनी लोक आसात. तांकां दोन वेळाचें अन्न पसून मेळना. सध्या अंत्योदय आनी हेर येवजण्यां खाला 80 कोटी 10 लाख भारतीयांक धान्य मेळटा. लायटीचे दर वाडिल्ल्यान ह्या लोकांक फटको बसतलो. आमचें वीज खातें म्हणटा, 5.85 रुपया युनिटान वीज विकत घेतली आनी घरगुती गिरायकांक 2.87 रुपया युनिट विकली. अर्थात उद्देगां खातीर वेगळे दर. गोंय स्वता वीज तयार करिना. ती विकत घेवची पडटा. हेर राज्यां परस हांगा खंय लायट सवाय. तरीय विजेची बचत जावपाक जाय.
गोंयांत हाचे मुखार अखंड वीजपुरवण जाय. वीज उणी आसा जाल्यार कांय म्हयन्यांनी सोडियम दिव्यांच्या खांब्यां पोंदा नवे खांबे उबारून ताचेर चार- चार एलईडी लायटी कित्याक बसयल्यात? आतां चकचकीत जालां खरें, पूण पालिकांचें बील वाडचें ना? काय ह्यो लायटी सौर उर्जेचेर चलतात? कांय कडेन सकाळीं आठ जालीं तरी लायटी पेटिल्ल्यो आसतात. ताचें कितें? गोंय हें पर्यटन थळ. हांगां येता तितली वीज उणीच. एका अदमासा प्रमाण, आमकां वर्साक 5000 ते 5840 जीडब्ल्युएच लायट लागता. दिसाक 14 ते 16 कोटी युनिट्स (केडब्ल्यू). सणां परबां वेळार, गरमेच्या दिसांनी, डिसेंबराची निमाणी पंद्रस हे युनिट्स वाडटात. सगली वीज शेजारी राज्यांतल्यान येता. ती चड हाडपाकूय मेळना. कारण ती व्हरपी यंत्रणा आमचे कडेन ना. आतां तमनार कंपनीक लागून ती तयार जाता.
तंत्रीक कारणांक लागून विजेची गळटी जाता. अवैध कनेक्शन, मिटरा बगर वीज वापरप, मिटरांत बदल करप, वीज गुपचूप खाजगी उद्देगांक विकप… देशांत खंय 20 टक्के विजेची चोरी जाता. गोंयांतूय तशे आरोप केल्ले. मात ते बोगस हें उपरात सिद्ध जालें. कारण दुबावीत निर्दोश सुटले. घडये, वीज हवेंत विरघळ्ळी आसतली वा अर्थिंगांतल्यान जमनीत जिरली आसतली!!! अशें जालें काय मागीर तिजोरेक फटको बसता आनी मोल वाडोवचें पडटा. विजेची बचत गरजेची. उर्जा वाटावपी उपकरणां वापरूंक जाय, काम जालें काय तीं बंद दवरचीं. भुरग्यांक हें शिकोवचें. फॅन रेग्युलेटराचेर बंद केलो आनी बटन चालूच दवरलो, जाल्यार वीज वापर जाता, अशें कांय जाणकारांचें मत. सौरउर्जा वापरची. सरकारी अनुदानूय मेळटा ताचेर. सैमीक उजवाड, हवेचो वापर वाडचो. मिटर सारको आसा काय ना तें तपासचें. लायटीचीं आरसीसीबी, लिंक करंट डिव्हायस साधनां बसोवप बरें.
लायटीचे दर वाडटात, तशी वीज पुरवणेंत सुदारणा जावंक जाय. वीज खात्याक आतां ताचेर भर दिवचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
