भांगरभूंय | प्रतिनिधी
पणजी : केबल, इंटरनेट सेवा पुरवण करप्यांक केबल घालपा खातीर वीज खात्याचे खांबे वापरपा खातीर ऑनलायन परवाने दितले. हाका लागून केंद्रीय दूरसंचार खात्याच्या गतिशक्ती संचार पोर्टलाचो वापर करचो. https://gatishaktisanchar.gov.in/ ह्या पोर्टलावेल्यान ऑनलायन परवाने दिवप १५ फेब्रुवारी सावन सुरू जाल्ल्याचें गोंय म्हायती आनी प्रसारण खात्यान कळयलां. अर्ज सादर केले उपरांत ताचेर वीज खातें प्रक्रिया करतलें आनी उपरांतूच परवाने दितले.
हे विशीं खात्यान काडिल्ल्या प्रसिध्दी पत्रकांत म्हणलां, दूरसंचार नेम २०२४ च्या तरतुदीं प्रमाण हे खातीरचे सगळे अर्ज ऑनलायन पद्धतीन भरचे पडटले. हाका लागून ह्यान पयलीं जांणी हार्ड कॉपी वरवीं अर्ज सादर केल्यात तांचे वांगडा हेर सगळ्या सेवा पुरवणदारांनी राज्यांतल्या वीज विभागाच्या बुन्यादी सुविधांच्या वापरा खातीर, केबल्स बसोवपा खातीर ह्या पोर्टलाचेर अर्ज करपाचीं कारणां दिवप गरजेचें आसतलें. ऑनलायन अर्ज मेळ्ळो काय वीज खातें ह्या अर्जांचेर प्रक्रिया करतलें. उपरांत गरजेचो शुल्क भरले उपरांत गुणवत्तेच्या आधारार तांकां मान्यताय दितले.
वीज खातें आनी सेवा पुरवठादार हांचे मदीं उलोवप जावचें म्हणून उत्तर आनी दक्षीण गोंयांत नोडल अधिकारी नियुक्त केल्यात. सेवा पुरवणदारांनी केबल घालतना सुरक्षेची उपाय येवजण करप, त्या भागाची सोबीतकाय सांबाळप, केबलाक लागून खात्याच्या लायनमॅनांची कसलीच गैरसोय जावची ना हाची खात्री करप गरजेचें आसतलें. पुरवणदारांनी वापरीनाशिल्ले वा आदले केबल सगळ्या ऍक्सेसरीज सयत बेगोबेग काडून उडोवचे. डक्ट उपलब्ध आसल्यार जमनी पोंदच्यान डक्ट्सांत केबल घालचे असोय उलो म्हायती आनी प्रसारण खात्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
