वीज खातें अत्याधुनीक जावचें

भांगरभूंय | प्रतिनिधी

नशाक जगपाक जेवण, उदक गरजेचें. तशीच लायटूय गरजेची. 1990 च्या दसका सावन तर लायट हो आमचे जिणेंतलो वेगळावं नजं असो वांटो जाला. संगणक, एसी, मोबायल फोन, ई – स्कुटर, ई- मोटार, ई- बस, ओव्हन, कुलर, ग्रायंडर हे नवे घटक आमच्या जिवितांत रुजल्यात. तांचे खातीर लायट लागता. पर्यटन केंद्र म्हणटकच गोंयांत लायटीचो वापर वाडला, रस्त्यांचेरूय सोडियमाचे दिवे वचून आतां फ्लोरोसंट ट्यूब, एलईडी लायटी झगझगतात. कांय कडेन स- स बल्ब एकठांय पेट्टात. ह्या सगल्यांची देखभाल गरजेची. तें काम अर्थांत वीज खात्याचें. लायट गेल्यार ते रोखडेच ती दुरुस्त करतात. पूण कांय गांवांनी हें जायना, अशी लोकांची कागाळ. वीज अधिकाऱ्यांचें, पंचायत वांगड्यांचेंय कांय वेळार लक्ष आसना. पणजे कुशीच्या गांवांनी 2- 2 दीस पसून लायट गेल्ल्याची उदाहरणां आसात.
लायनमन, हेल्पर हे सदांच तंदुरुस्त, शिटूक, जागृत आसूंक जाय. काम करतना विचारांत तल्लीन जावपी थंय उपकारनात. कारण लायट, उदक आनी उज्या कडेन फकांडां करीत जाल्यार कितेंय जावं येता. फाटल्या आठ वर्सांच्या काळांत लायटीचें काम करतना 15 जाणांक ताचे वा हेर कोणाचे तरी चुकीक लागून मरण आयलां. तितलेच जखमीय जाल्या आसतले. वीज मंत्री म्हणटात, चवकशी अहवाल मागयला. ह्या कामगारांक मुळाव्यो साधनसुविधा मेळनात, त्यो मेळुनूय बरेच कामगार तांचो वापर करिनात, असो अधिकाऱ्यांचो दावो. हाचेर कामगार संघटणांचें कितें म्हणणें?
पयरूच होंडा ट्रान्स्फाॅर्मराचेर दुरुस्ती करतना शाॅक येवन सूर्यकांत उर्फ चंद्रू गांवकार ह्या तरणाट्या लायनमनाक मरण आयलें. दोग जाण काम करताले. दोगांयकूय शाॅक बसलो. दुसरो आतां बरो आसा. चंद्रूचो लागींचो लायनमन इश्ट असोच कांय वर्सां पयलीं शाॅक लागून गेल्लो. दुरुस्ती करतना फ्यूज काडून व्हरतात. म्हणटकच चुकून कोणी लायट चालू करपाचो प्रस्न येना. 40 वर्सां पयलीं तशें घडटालें. काम जालें अशें समजून कोण तरी वीज पुरवण चालू करपाचीं घाळपणां करतालो.
कांय कारखान्यांनी हॅल्मेट घाले बगर भितरूच घेनात. तशी सक्ती वीज कामगारांक केल्या? तांकां काम कशें करपाचें तें प्रशिक्षण दितात? नोकरे खातीर तांची निवड कशी जाता? गुणवत्तेचेर काय…..? स्वताचो जीव कसो सांबाळपाचो तें तांकां शिकयतात? अदींमदीं कार्यशाळा जातात? सगले कामगार आपलें काम स्वताच करतात काय हाता सकयल्या कामगारां कडल्यान करून घेतात? दिवो आशिल्लें हॅल्मेट, शाॅक येना तसले ग्लावज, गमबूट, निसण, लायनींतलो फाॅल्ट सोदपाचें उपकरण, टेस्टर, रेनकोट, अर्थिंग राॅड हें सगल्यांक दिवपाक जाय. तांचो दर्जोय बरो आसूंक जाय. कामगारांक ह्यो सुविधा मेळटात? खांब्यार चडचे पयलीं खंयूच करंट ना हाची तपासणी जाता? बंद आशिल्ल्या इन्व्हर्टराचोय करंट खांब्या वयल्या सरयांनी वता, ताचेर कितें उपाय घेतला? हालींच व्हाळशे- दिवचले इन्व्हर्टरान एका लायनमनाचो जीव घेतला.
दुरुस्तीच्या कामार वतना लायनमन, हेल्परांक सुरक्षेच्यो सगल्यो सुविधा दिवंक जाय. कार्यालयांतल्या रजिस्टराचेर ताची नोंद केले बगर तांकां भायरूच सोडपाक जायना. कामगारांनीय कामाच्या वेळार बेफिकीरपणा, आबूजपणा, फकांडां करपाक जायना. कामा वेळार थंय अणभवी मनीस आसूंक जाय. ताचे परस म्हत्वाचें म्हणल्यार स्ट्रीट लायट, घरांनी, दुकानांनी, आस्थापनांनी, कार्यालयांनी, कारखान्यांनी लायट दिवपाक वापरिल्लें सगलें सामान, उपकरणां तपासून पळोवपाचो वेळ आयला. कांय कडेन 1970 च्या दसकांतल्यो सरयो आनी हेर उपकरणां आसात खंय? 55 वर्सां जावन गेलीं! हें जर खरें, जाल्यार ती गंभीर गजाल. गुन्यांवूच तो. आतां लायटीचे केबल जमनी पोंदच्यान घालपाचें काम चल्लां. 2047 मेरेन तरी पुराय गोंयची वीज पुरवण जमनी पोंदच्यान जावची. लायनमन वरभर भोंवतकच ‘फाॅल्ट खंय आसा तो मेळना मरे’ अशें सांगतात. तो सोदपाचीं उपकरणां सगल्यांक दिवचीं. पयस खंयतरी गडगड मारलो काय लायट चल्ली वा बंद करतात, तें जावचें न्हय. वीज खात्या कडेन अत्याधुनीक उपकरणां आसपाकूच जाय. आतां लायटीचें मोल वाडयलां. तो पयसो ह्या कामाचेर खर्च करचो. बजेटांत दवरला तोय वापरचो. वीज यंत्रणा आनी कामगार कल्याण हाचेर वीज खात्यान चड भर दिवंक नाका?
होंडाच्या लायनमनाच्या भुरग्याचो शिक्षणीक खर्च करपाची, कुटुंबाक अर्थीक आदार दिवपाची घोशणा थळाव्या आमदारान केल्या. पूण ही सगली वीज खात्याची जबाबदारी. खातें लुकसाण भरपाय म्हूण उणेच 25 लाख दिता. मरण आयिल्ल्या कामगाराचे बायलेक सरकारी नोकरीय दिता. पूण हो वेळ त्या कुटुंबाचेर येवचो न्हय म्हूण कितें करता? सगल्या कामगारांक सुरक्षेच्यो सगल्यो सुविधा दितात, अशें वीज अधिकारी म्हणटात, पूण अतिआत्मविस्वास आशिल्ले कांय कामगार त्यो वापरिनात, असो तांचो दावो. गोंयांत आतां तमनार कंपनी वतीन भायल्यान वीज येतली, गोंयांत तिचें वांटप जातलें. लायटीचो वापर हाचे मुखार उणो जावचो ना, तर वाडत वतलो. हें मतींत घेवन वीज खात्यान अत्याधुनीक जावंक जाय. आपल्या कामगारांचीय सुरक्षा पळोवपाक जाय.