भांगरभूंय | प्रतिनिधी
पणजी ः इंटरनेट आनी केबल सेवा पुरवणदारांनी फुडल्या धा दिसां भितर वीज खात्याच्या खांब्या वयले केबल आनी इंटरनेट सेवा दिवपी केबल काडून उडोवचे असो आदेश वीज खात्यान जारी केला. कार्यकारी अभियंते काशीनाथ शेट्ये हांणी ही म्हायती दिली. सोमारा वीज खातें आनी संघटनेच्या अधिकाऱ्यां कडेन जाल्ले बसके उपरांत शेट्ये हांणी मिडिया कडेन संवाद सादलो.
उच्च न्यायालयाच्या 22 जानेवारीच्या आदेशा प्रमाण, सेवा पुरवणदारांनी वीज खात्या कडेन अर्ज करप गरजेचें आशिल्ले अशें शेट्ये हांणी सांगलें. नव्या दूरसंचार नेमा प्रमाण खात्याकडेन अर्ज करपाचो आदेश जारी केलो. ह्या अर्जांचेर खात्या वतीन विचार करपाचे आशिल्ले. पूण आतां मेरेन खात्या कडेन असो एकूय अर्ज आयलो ना. हाका लागून आमी सेवा पुरवणदारांक केबल काडपाची सुचोवणी दिल्या अशें शेट्ये हांणी सांगलें.
शेट्ये हांणी सांगलें, केबल आनी इंटरनेट सेवा पुरवणदारांनी फुडल्या धा दिसां भितर स्वता केबल काडले नात जाल्यार ते खात्या वतीन काडून उडयतले अशें तांणी सांगलें. ते भायर खात्यांतल्या मालमत्तेचो बेकायदेशीर वापर केल्ल्यान आमी तांकां दंड दितले. नव्या नेमाच्या कलम 18 प्रमाण आमी तांकां ही सुचोवणी जारी केल्या. तांणी सर्वेक्षण करून वीज खांब्या खातीर स्थिरताय प्रमाणपत्र घेवप गरजेचें. पूण तशेंय करुंक ना.
हाचे आदीं सेवा पुरवणदारांनी 1 तारखे मेरेन सगळे केबल काडटले अशें सांगिल्लें. पूण आजूनय ते तशेच आसात. नेमा प्रमाण एका खांब्याचेर केबल घालपाक वर्साक तीनशें रुपया शुल्क आसता. पुराय गोंयांत अशे तरेचे 3.20 लाख खांबे आसात. पूण शुल्क भरूंक नाशिल्ल्यान खात्याचे कोटी रुपया महसूल लुकसाण जाता. हाचे भायर फाटलीं दोन-तीन वर्सां पुरवणदारांनी शुल्क भरूंक ना अशेंय शेट्ये हांणी सांगलें.
कलर कोड वापरचो…
वीज खात्याचे केबल काळ्या रंगाचे आसात. इंटरनेट वा केबल पुरवणदारांनी तांची केबल सहजपणान वळखुपाक मेळची म्हूण कलर कोडचो वापर करचो अशी शिफारस आमी केल्या. ते प्रमाण तांकां काळ्या रंगाचे सोडून हेर खंयच्याय रंगाचे केबल वापरूं येतात अशें शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
