भांगरभूंय | प्रतिनिधी
केपें: चावडी असोळणें केप्यां दवरिल्लीं 21.41 लाखांची वीज केबलाचीं चार बंडलां चोरी प्रकरणांत कागाळ नोंद केले उपरांत उत्तर प्रदेशांतल्या चार जाणांक 24 वरां भितर धरले.
केपें पुलीस स्टेशना खाला येवपी असोळणें वाठारांत वीज केबलाच्या चार बंडलांची चोरी जाल्ली. ताका लागून ह्या वाठारांत थळाव्या लोकां मदीं भंयाचें वातावरण पातळिल्लें. ह्या प्रकरणांत केपें पुलिसांनी मंगळारा राती गुन्यांव दाखल करून तपास सुरू केल्लो.
केपें पुलिसांनी दिल्ले म्हायती प्रमाण अनील कुमार हांणी वीज केबलाचीं बंडलां चोरयेक गेल्ल्याची कागाळ केल्या. 14 आनी 15 डिसेंबराचे राती कडेन ही चोरी जाल्ल्याचें कागाळेंत म्हणलां. ते प्रमाण पुलिसांनी तपास सुरू केलो तेन्ना ह्या प्रकरणांत खूब जाणांचो हात आशिल्ल्याचो अदमास काडिल्लो. ते दिशेन तपास करतना ही चोरी करतना गाडयेचोय वापर केल्लो, अशें दिसलें. थळाव्यांचे मजतीन चोरये खातीर वापरिल्ले गाडयेचो सोद सुरू केलो तेन्ना दोन भाड्याच्यो गाडयो ह्या कामा खातीर वापरिल्ल्याचें कळ्ळें. ही चोरी प्रकरणांतली चार जाणांची टोळी पोरण्यां गोया आशिल्ल्याची म्हायती मेळटाच केपें पुलिसांनी पोरणें गोंय पुलीस स्टेशनाचेर संपर्क करून तांचे मजतीन दुबावितांक अटक केली.
केपें पुलिसांनी दिल्ले म्हायती प्रमाण केबल चोरी प्रकरणांतले चारूय दुबावीत उत्तर प्रदेशांतले आसात. ते पोरण्या गोंया भाड्याच्या फ्लॅटांत रावताले. हे चोरये खातीर तांणी एक बोलेरो जीप आनी दुचाकी भाड्यान घेतिल्ली. चोरी केल्लें सामान तांणी बोलेरो जिपींतल्यान होंडा वाळपयच्या एका गुदावांत दवरिल्लें.
ह्या प्रकरणांत मेहताब अली (21), हैयदर अली (22), मोहम्मद सारी (18) आनी मोहम्मद वकार हांकां केपें पुलिसांनी अटक केल्या. तांचे कडल्यान चोरयेक गेल्लीं वीज केबलाचीं बंडलां तशेंच दोनूय गाडयो ताब्यांत घेतल्यांत. केपेंचे पुलीस निरिक्षक दीपक पेडणेंकार हांच्या मार्गदर्शना खाला उपनिरिक्षक शिवराम गांवस, संजीव पाटील, शाणू रायकार, धीरज कर्पे, कल्पीत रायकार, रुपेश सतरकार, शांताराम वेळीप, संदेश गांवस देसाय हांणी ही कारवाय कली. ह्या प्रकरणाचो फुडलो तपास केपें पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
