विस्वासाचेर तिगल्यात भारत – रशियेचे संबंद

भांगरभूंय | प्रतिनिधी

पुतीन : 2030 मेरेन 100 अब्ज डॉलरांच्या वेपाराची मोख

खबरां संस्था

नवी दिल्ली : भारत – रशियेचे संबंद विस्वास आनी सन्मानाचेर तिगल्यात. दोनूय देश 2030 मेरेन 100 अब्ज डॉलर वेपाराची मोख मेळयतले, अशें रशियेचे राष्ट्राध्यक्ष व्लादिमीर पुतीन हांणी सांगलें. तशेंच युक्रेन मुद्द्याचेर शांतीपूर्ण उपायाचें समर्थन केलें. हे प्रक्रियेंत अमेरिकेचो लेगीत आस्पाव आसा, अशेंय तांणी पत्रकार परिशदेंत सांगलें.

पुतीन हांची भारत भोंवडी खुबूच म्हत्वाच्या पांवड्यार पावल्या. शुक्रारा पुराय दीस राजनितीक चर्चा, राजकी सन्मान आनी उच्च पांवड्या वयल्या बसकांनी भरिल्लो. सकाळीं राष्ट्रपती भवनांत पुतीन हांकां 21 तोफांची सलामी, तिनूय सैन्या दळां वतीन गार्ड ऑफ ऑनर आनी राष्ट्रपती द्रौपदी मुर्मी आनी प्रधानमंत्री नरेंद्र मोदी हांच्या फुडारपणा खाला भव्य येवकार दिलो. ते उपरांत पुतीन हांणी राजघांटार वचून महात्मा गांधी हांकां आर्गां ओंपलीं आनी उपरांत थेट हैदराबाद हावस वचून प्रधानमंत्री मोदी वांगडा द्विपक्षीय बसका सुरू केली.

पुतीन हांणी प्रधानमंत्री मोदी हांचे सरबरायेची तुस्त करतना म्हणलें, तुमचें घरचें जेवण रुच्चीक आशिल्लें. रशियेन अणू उर्जा, सैमीक गॅस, शिपींग, संरक्षण आधुनिकीकरण आनी मेक इन इंडिया येवजणेंत आदार चालू दवरपाचो भरवसो दिलो. तशेंच भारत – रशियेची भागिदारी भोवध्रुवीय संवसारींक वेवस्थेक घटमूट करतली, हे गजालीचेर दोनूय फुडाऱ्यांनी सहमती दाखयली.

शुक्रा वट्ट स व्हड समजिकाय कबलातीचेर सयो जाल्यो. तातुंत मॅनपावर मोबिलिटी, भलायकी मळार दोन समजिकाय कबलाती, शिपींग खाला दोन समजिकाय कबलाती आनी फर्टिलायजर- कॅमिकल सेक्टराची एक कबलात आसा. तेचवांगडा एक संयुक्त निवेदन जारी केलें, तातूंत फुडाराची दिशा थारायली. पुराय दिसाचे कार्यावळीन स्पश्ट केलें, संवसारीक तणाव आनी अस्तंत चेपण आसून लेगीत भारत- रशियेची भागिदारी नवी उर्जेन मुखार सरता आनी हो प्रवास येता त्या दसकांत राजनितीचें एक म्हत्वाचें मोडण थारतलें.

सुमार 2 वरां चलिल्ले हे बसकेंत संरक्षण, उर्जा, वेपार, शिपींग, कनेक्टिवीटी, अन्न- रसायन आदार आनी शांतीच्या यत्नांचेर खोलायेन चर्चा जाली.

प्रधानमंत्री मोदी आनी राष्ट्राध्यक्ष पुतीन हांणी, आतंकवाद्यांक शिमे वयल्यान जावपी हालचाली, आतंकवाद्यांक अर्थीक आदार दिवपी जाळें आनी सुरक्षीत आलाशिरो ह्या सारक्या सगल्या प्रकारांतल्या आतंकवादाक आडावपाक आनी ताका आळाबंदा हाडपा खातीर आपली खर बंदिलकी उक्तायली. 22 एप्रील 2025 ह्या दिसा भारतांतल्या जम्मू- काश्मीरांतल्या पहलगामांत आनी 22 मार्च 2024 ह्या दिसा रशियेंतल्या मॉस्कोच्या क्रोकस सिटी हॉलांत जाल्ल्या आतंकवादी हल्ल्याचो तांणी खर निशेध केलो. अल कायदा, इसीस, दाएश आनी तांचे संबंदीत संयुक्त राष्ट्रांचे वळेरेंत आशिल्ल्या सगल्या दहशतवादी गटां आनी संस्थां आड समन्वयीत कारवाय करची, आतंकवाद्यांचो सुरक्षीत आलाशिरो नश्ट करप, आतंकवादी विचारधारेचो प्रसार आडावप, तशेंच आतंकवाद्यांची शिमे वयली येरादारी थांबोवपा खातीर तांणी उलो मारलो.