विस्वासघातकी सभाव सोडत जाल्यारूच इश्टागत

भांगरभूंय | प्रतिनिधी

प्र धानमंत्री नरेंद्र मोदी हांणी चीन भोंवडेर राष्ट्राध्यक्ष शी जिनपींग हांची भेट घेतली. हे भेटींत दोनूय संवसारीक फुडाऱ्यांनी सुमार 50 मिणटां चर्चा केली. हे भेटींत खूबश्या विशयांचेर चर्चा जाली. दोनूय देशां मदीं इबाडिल्ले संबंद सुदारपाचेर हे भेटीत भर दिलो. 2018 उपरांत नरेंद्र मोदी हांची ही पयलीच चीन भोंवडी. मोदी हांचे भोंवडे कडेन भारताचेंच न्हय जाल्यार संवसाराचें लक्ष लागून आसा. कारण अमेरिकेचे राष्ट्राध्यक्ष डोनाल्ड ट्रम्प हांणी भारताचेर 50 टक्के अतिरिक्त शुल्क (टॅरीफ) लायले उपरांत भारत आनी अमेरिकेचे संबंद इबाडल्यात. ट्रम्प हांणी फक्त भारताचेरूच न्हय जाल्यार चीन, मेक्सिको, कॅनडा, ब्राझील ह्या आनी ह्या सारक्या खूबशा देशांचेर लेगीत टॅरीफ लायलां. ताका लागून भारता सयत ह्या देशांतूय अमेरिके आड निरशेणी आसा. पूण सगल्यांत चड तिडक भारत आनी चीन ह्या देशांनी आसा. भारत आनी चीन ह्या दोनूय देशांचेर अमेरिकेन सुमारा भायर टॅरीफ लायलां, ताका लागून अमेरिकेच्या ह्या धोरणा आड हे देश एकठांय येत आसात. ताका लागून हे भोंवडेक विशेश म्हत्व दितात.
कांय दिसां पयलीं भारताचे विदेश मंत्री एस. जयशंकर रशियेचे भोंवडेर गेल्ले. थंय दोनूय देशांनी मेळून अमेरिकेची दडपशाय मोडून काडपाचो निर्णय घेतलो. रशिये फाटोफाट आतां चीना कडेनूय भारत बरे संबंद वाडोवपाचो यत्न करता. ताका लागून अमेरिके आड ह्या तिनूय देशांची युती आसा अशें मानतात. चीन आनी रशिया ह्या संवसारीक महासत्ता अमेरिके आडूच आशिल्ल्यो. भारताचे अमेरिके कडेन लागींचें संबंद आशिल्ले. पूण डोनाल्ड ट्रम्प हांच्या हेकेखोर सभावाक लागून भारतूय आतां अमेरिके आड वचून चीन आनी रशिया हांचे बरोबर वचत जाल्यार ताचे संवसारीक राजकारणाचेर खूब वेगळे परिणाम जातले. अमेरिकेक शह दिवपा खाीतर हे तीन देश एकठांय आयले जाल्यार अमेरिकेक निश्चीतपणान पर्याय निर्माण जातलो. हाकाच लागून हे
भोंवडे कडेन संवसाराचें पुराय लक्ष लागून आसा.
भारत आनी रशिया हे परंपरीक इश्ट देश आसात. संकश्टा वेळार ह्या दोनूय देशांनी एकामेकांक मजत केल्या. हाचें उरफाटें भारत आनी चीन हे एकामेकाचे केन्नाच इश्ट नाशिल्ले. भारत आनी चीन हांची दुस्मानकाय जगजाहीर आसा. चीनान भारताक सदांच दुस्मान मानला. भारतान चीना कडेन इश्टागतीचे संबंद दवरपाचो यत्न केलो, पूण चीनान मात भारताचो विस्वासघातूच केलो. 1962 वर्सा भारताचे तेन्नाचे प्रधानमंत्री पंडित नेहरू हांंणी जाल्यार हिंदी चीनी भाई भाई अशें म्हणून चीना कडेन इश्टागतीचो हात मुखार केल्लो. पूण चीनान भारताचो केंसान गळो कापून भारताचेर आक्रमण करून भारताची कांय भूंय काबीज केली. उपरांतूय चीनान खूबशे फावटी भारताची कळ काडली. 2020 वर्सा गलवान देगणांत चीनी आनी भारतीय सैनिकांची जाल्ली लटाफट अजूनय ताजीच आसा. हे लटाफटींत भारताचे 20 जवान शहीद जाल्ले. चीन भारताच्या गलवान देगणां सयत अरुणाचल प्रदेशाचेर दावो सांगता. अरुणाचल प्रदेश हो चीनाचोच भूंय भाग आसा अशें चीन म्हणटा. ताका लागूनच चीना कडेन भारताची दुस्मानकाय आसा.
भारत पाकिस्तान हांचे मदीं जाल्ल्या सिंदूर संघर्शांत चीनान पाकिस्तानाची उक्तेपणान बाजू घेतिल्ली. इतलेंच न्हय जाल्यार पाकिस्तानान ह्या संघर्शांत वापरिल्लें लश्करी साहित्य लेगीत चीनानूच दिल्लें, म्हणून चीनाचेर भारत कसो विस्वास दवरतलो हो प्रस्न आसा. चीन हो संवसारांतलो सगल्यांत अविस्वासू देश आसा. जेन्ना जेन्ना भारतान चीना कडेन इश्टागतीचो हात मुखार केलो त्या त्या वेळार चीनान भारताचो विस्वासघात केला ताचीच पुनरावृत्ती आतां जातली काय कितें असो दुबाव उपस्थीत करतात आनी तो खरोय आसा.
पूण बदलिल्ले राजकी परिस्थितीक लागून ह्या दोनूय देशांक एकठांय आयले बगर पर्याय ना. अमेरिकेक शह दिवपाचेंच आसत जाल्यार भारत, रशिया आनी चीन हांकां एकठांय येवचेंच पडटलें. संवसारीक राजकारणांतले हे तीन देश एकठांय येतात जाल्यार ताका येवकारूच दिवचो पडटलो. भारत, रशिया आनी चीन हांचो त्रिकोण जायत जाल्यार ताचो संवसारीक राजकारणाचेर परिणाम जातलो हें निश्चीत. पूण ते खातीर हातूंतलो तिसरो कोण आशिल्ल्या चीनान जर आपलो विस्वासघातकी सभाव सोडून दीत जाल्यारूच शक्य आसा.
अमेरिकेक शह दिवपाची चीनाची खरेंच इत्सा आसत जाल्यार तांणी मना पसून भारता कडेन इश्टागत करूंक जाय आनी आपल्या आंगार लागिल्लें
विस्वासघातकी हें खत काडून
उडोवंक जाय. फाटलो अणभव पळयत जाल्यार हें अशें जातलें अशें कोणूच सांगूक शकचो ना. पूण खंयच्यान तरी सुरवात जाली हें लेगीत सुदैवूच म्हणचें पडटलें. दोनूय देशांक मजबुरीन काय
जायना एकठांय येवचें पडटा. आतां एकठांय रावप, इश्टागतीचे संबंद
प्रस्थापीत करप हें चीनाच्या हातांत आसा. ही एक चीना खातीर बरी संद आसा. हे संदीचें भांगर करप काय सदचे प्रमाण माती करप हें सद्या तरी चीनाच्या हातांत आसा.