भांगरभूंय | प्रतिनिधी
पणजे बाजारांत नुस्तें जालां सवाय, ताल्ले- बांगड्यांच्यो राशी
भांगरभूंय । प्रतिनिधी
पणजीः गोंयांत चवथ आशिल्ल्यान नुस्त्यांक मागणी उणी आसा. ताका लागून नुस्तें सवाय जालां. चवथी आदीं 900 रुपया किलो ह्या दरान विस्वण विकताले, तो आतां 600 रुपया किलो जाला. तशेंच 200 रुपयांचो बांगड्यांचो वाटो आतां 100 रुपयांक दितात.
गोंयांत सध्या नुस्तेमारीचो मोसम सुरू जाला. नुस्त्याची आवक लेगीत वाडल्या. पूण चवथ आशिल्ल्यान नुस्त्याची मागणी देंवल्या. चवथी उपरांत ही मागणी व्हड प्रमाणांत वाडटली. ल्हान- व्हड सगळेच ट्रॉलर दर्यांत गेल्यात. पेडवे, ताल्ले, बांगडे खूब प्रमाणांत मेळटात. ताका लागून गोंयांतल्या सगळ्याच नुस्तें मार्केटांनी नुस्त्याची आवक वाडल्या. हे खातिरूय नुस्तें सवाय जालां. जून आनी जुलय अशे दोन म्हयने नुस्तेमारी बंद आशिल्ली, ताका लागून नुस्तें खूब म्हारग जाल्लें. ट्रॉलरा वयले कामगार परतून आयिल्ल्यान चडशे ट्रॉलर दर्यांत नुस्तें मारतना दिसता.
शेनवारचो पणजे नुस्ते मार्केटांतलो दर
विस्वण 600 रुपया किलो, बांगड्यांचो वांटो 100 रुपया, सुंगटां किलाक 300 रुपया, माणक्यो 200 रुपया वांटो, कुल्ल्यो 300 रुपया वांटो, पेडवे आनी ताल्ले 50 रुपया वांटो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
