भांगरभूंय | प्रतिनिधी
मोगाळ भुमी,
बाय, तुजी अपुरबाय खंयच्या उतरांनी करपाची तेंच कळना. हालींच तुज्या बाबान म्हळ्यार राजदिपान पिरायेची पन्नास वर्सां पुराय केलीं आनी तुंवे पांच वर्सां. खेळू गो खेळू करपाची पिराय तुजी. पांच वर्सांचे पिरायेचेर जागतिक विक्रम? तोवूय बी आवयभास कोंकणीची घुडी खांदार घेवन! वालोर तुका. तुजो बाबा राजदिप नायक आनी आई सुचिता नार्वेकार हांणी आयजवेर खुब विक्रम केल्यात. तांची आनी कलाचेतनाच्या सगळ्याच वांगड्यांची तोखणाय तर आमकां आसाच. पुण शाण्या आयची ही चीट तुज्या विश्वविक्रमाची तोखणाय करपा खातीर.
बाय, ‘गांव जाला जाण्टो ‘ ह्या एकाच नाटकाचे एकाच दिसा, एकाच थेटरांत, फाटोफाट सात प्रयोग करुन विश्वविक्रम करपाचॆर कलाचेतना आनी तुज्या आई- बाबान थारायलें. पोरुं 15 ऑगस्ट 2024 ह्या दिसा श्रीछत्रपती शिवाजी महाराज नाट्य मंदिर, दादर, मुंबय राहूल भांडारे निर्मित अद्वैत थियेटरान सादर केल्ल्या “अलबत्या गलबत्या” ह्या बालनाट्याचे (प्रत्येकी दोन वराचे) एकाच दिसा स प्रयोग करुन जागतिक विक्रम केल्लो. आतां कलाचेतना संस्थेन ‘गांव जाला जाण्टो’ नाटकाचे एकाच दिसा सात प्रयोग करुन विश्वविक्रम केलो. ताची तोखणाय आनी अभिमान आसाच गो आमकां शाण्या. पुण फांतोडेर पांच वरांचेर फोंडेच्या रवींद्र भवनांत येवन तुवें रातीं साडेबारा मेरेन सातूय प्रयोगांत भुमिका करुन तुजें भुमी नाव सार्थ केलें. तुज्यांतली उमेद पळोवन घडये हेर कलाकारांचीय उमेद वाडपाक मदत जाल्या आसूये.
बाय, आमी टिव्हीचेर भुरग्यांचे वेगवेगळे शो पळयतात. डान्स आसता, संगीत आसता, पूण तांतूत केन्ना पांच वर्सांचे भुरगें पळयल्ल्याची याद जायना. आठ वर्सांचे, स वर्सांचे लेगीत भुरगे आसतात. आनी टिव्ही कार्यक्रमाचे शुटींग केन्ना अशे लायव्ह नासता. सेगीत साडेसात ते साडेबारा मेरेन नासताच नासता. तांका मदीं विसव घेवपाची संद आसता. तुकाय बाबान संद दिल्ली. जमता जाल्यार पांच शो करुन तुज्यान विसव घेवं येतालो. तशी परवानगी राजदिपान घेतिल्ली. पूण तुजी कापाझदाद! तुंवे कशेंच बें म्हणलें ना. सातूय प्रयोगाक तूं तेच तांकीन रंगमाचयेर आयले. एकेवटेन आई आनी बाबाचें सपन साकार जातना दुसरे वटेन त्या साकार सपनाक तुवें तुज्या ह्या विक्रमान इंद्रधोणूचे सात रंग चडयले. अभिमान आसा तुजो आमकां गोंयकारांक.
तुमी केला तो विश्वविक्रम केवळ तुचो न्हय, सगळ्या कोंकणी समाजाचो.
बाय, पन्नास वर्सां भितर कोंकणी नाट्य चळवळ शुन्यांतल्यान संवसार निर्माण करुंक पावली ते तुज्या सारक्या कष्टाळू कलाकारां खातीर. पन्नास वर्सां आदीं कोंकणीत बरें नाटक ना म्हणून आमकां हिणयताले. पुण कोंकणीतल्या सिद्धहस्त नाटककारांनी उत्कृश्ट नाट्यसंहिता दिवन विरोधकांची तोंडां बंद केलीं. कोंकणी नाटक उत्सवी रंगमाचयेर जायना असो आरोप जातालो. आयज कोंकणी नाटक सोडून दुसरे भाशेंतलें नाटक गोंयच्या उत्सवी रंगमाचयेर क्वचितूच जाता हें सत. आनी हाचे सगळ्यांत चड श्रेय कलाचेतनाच्या सगळ्या कलाकारांक आनी राजदिपाक वता. कलाचेतनान कोंकणी नाटक गांवागांवानी खांचीकोणश्यांनी तर पावयलेंच त्या शिवाय गोंयां भायर देशाच्या हेर वाठारांनी आनी देशा भायर पावयलें हें विशेष. नाटक हें हिंदूंचे आनी तियात्र क्रिस्तांव समाजाचे असो सर्व सादारण समज आसलो. तो कलाचेतनान फट थारायलो. हिंदू आनी क्रिस्तांव अश्या दोनूय समाजांतले लोक कलाचेतनाच्या नाटकांक गर्दी करतात. आनी हें खरें तुमचें जैत बाय. तुमी जोडलां तें कोंकणीचे जैत.
बाय, ज्या वळवय गांवच्या मास्टर दत्तारामान मराठी रंगभूंय आनी अख्खो महाराष्ट्र गाजयलो त्याच वळवय गांवची तूं धुव. वळवय गांवचो नागरीक ह्या नात्यान तुजो आमकां चड अभिमान. आनी योगायोग म्हणल्यार एकाच दिसा सात प्रयोग करुन तुमी जो विश्वविक्रम केलो तोवूय बी मास्टर दत्ताराम नाट्यघरांत. जांणी आधुनिक कोंकणी नाटकाची बुनियाद घालून ताचेर उत्कृश्ट नाट्यसंहितांची इमारत उबी केली त्या श्रेष्ठ नाटककार पुंडलिक नायकाच्या शेजराक रावपी तूं. आनी जांणी कोंकणी नाटक समाजाभिमुख केलें त्या राजदिपाची आनी सुचिताची धुव तूं. एदी व्हड परंपरा आसा तुका. तरी तुजी वळख तुज्या विक्रमान आनी तुज्या नांवान घडयली तुंवे. ताचो आमकां चड अभिमान. हाचे मुखार भुमीची आई, भुमीचो बाबा ही वळख तुज्या आईबाबाकूय चड आवडटली हाची म्हाका खात्री आसा.
बाय भुमी, तुजी पिराय पांच वर्सां. तुजे जीवन आतांच घडटा. ह्या जैतान तूं भुल्लुसून वच्चें ना हाची म्हाका खात्री आसा. तूं खुब बरें शिकप घे. ज्ञानी जा. कलेच्या शिक्षणा वांगडा शालेय शिक्षण आनी संस्कारांनी व्हड जा. अशें समज की पयर आयतारा फोंडेच्या रवींद्र भवनांत सुमार पांच हजार पांचशे परस लोक सकाळीं साडेसात ते रातीं साडेबारां मेरेन पांच वर्सांच्या भुमीक आशिर्वाद दिवपाक आयिल्ले.
बाय भुमी, निमणे एकूच सांगन दिसता. “गांव जाला जाण्टो” हें विश्वविक्रमी नाटक पळयलें. पुण तुज्यांतली उमेद पळोवन इतलेंच म्हणन दिसता “गांव जाला भुरगो.”
तुजें निर्मळ भुरगेपण जप. खुब खेळ. आनी एक, कलाचेतनाच्या सगळ्या कलाकारांक आनी वांगड्यांक हांवे परबीं भेटयल्या म्हणून सांग.
भुरग्यां वांगडा भुरगो,
उदय म्हांबरो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
