भांगरभूंय | प्रतिनिधी
फोंडें : फोंडें मतदारसंघांतले पोटवेंचणुके आदीं नाट्यमय घडामोडींक सुरवात जाल्या. भाजपान रितेश नायक हांकां उमेदवारी जाहीर केल्ल्यान बेजार जाल्ल्या कार्यकर्त्यांनी विश्वनाथ दळवी हांच्या घरा मुखार धडक दिली. ते उपरांत भाजप प्रदेशाध्यक्ष दामू नायक, आदले खासदार विनय तेंडुलकार आनी आदले आमदार सिद्धार्थ कुंकळकार भेट दिवन विश्वनाथ दळवी तशेंच हेर कार्यकर्त्यां कडेन चर्चा केली. पूण कार्यकर्त्यांनी विश्वनाथ दळवी हांकांच तिकेट दिवपाचो आगरो केल्ल्यान पोटवेंचणुकेंत भाजपांत निश्चीत फूट पडिल्ल्याचें मानतात.
फोंडें मतदारसंघांतले पोटवेंचणुके आदीं बिरेस्तारा दीसभर नाट्यमय घडामोडी घडल्यो. सकाळीं रितेश नायक हांकां भाजपाची उमेदवारी जाहीर केले उपरांत सांजे वेळार भाजप कार्यकर्त्यांनी विश्वनाथ दळवी हांच्या घरा मुखार गर्दी केली. बेजार जाल्ल्या कार्यकर्त्यांच्या शिश्टमंडळा कडेन दामू नायक, विनय तेंडुलकार आनी सिद्धार्थ कुंकळकार हांणी चर्चा केले उपरांत रितेश नायक हांचे कडेन चर्चा केली. बेजार जाल्ल्या कार्यकर्त्यांनी बसका घेवन फुडल्या दोन दिसांत निर्णय घेवपाचें थारायलां. अंतर्गत वादाचेर बेगिनूच उपाय येतलो, अशी म्हायती कांय कार्यकर्त्यांनी दिल्या.
दामू नायक हांणी सांगलें, अंतर्गत वाद चालू आसा. फुडल्या दोन दिसांत ताचेर गरजेचो निर्णय घेतले. विश्वनाथ दळवी हे भाजपाचे निश्ठावंत कार्यकर्ते आसात. हो वाद निश्चिकूच सुटावो जातलो.
फोंडें मतदारसंघांत जावपी पोटवेंचणुकेंत भाजपांत बंडखोरी जावची ना. विश्वनाथ दळवी आनी तांच्या कार्यकर्त्यांची निश्चीत समजूत काडटले, अशें विनय तेंडुलकार हांणी सांगलें.
विश्वनाथ दळवी भरतले अपक्ष उमेदवारी?
सुत्रांनी दिल्ले म्हायती प्रमाण बेजार जाल्ल्या विश्वनाथ दळवी हांच्या कार्यकर्त्यांनी तांकां अपक्ष उमेदवारी दाखल करपाची विनवणी केल्या. हे खातीर सोमारा विश्वनाथ दळवी अपक्ष उमेदवारी दाखल करपाची शक्यताय वाडल्या. ताचो परिणाम भाजपाचेर निश्चीत जातलो, अशे संकेत मेळपाक लागल्यात. पूण मुख्यमंत्री डॉ. प्रमोद सावंत बेगिनूच विश्वनाथ दळवी हांची भेट घेवन हे संबंदांत उपाय काडपाची शक्यताय कार्यकर्ते उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
