भांगरभूंय | प्रतिनिधी
पणजीः फोंडें पोटवेंचणुके खातीर आचारसंहिता लागू जाल्या अशें सांगून विधानसभेचें अर्थसंकल्पीय अधिवेशन गुठलायलें. हेर कांय राज्यांनी पोटवेंचणूक सुरू आसली तरी थंयचें अधिवेशन आजून सुरु आसा. फकत गोंयचें अधिवेशन स्थगित करप म्हणल्यार लोकशायेची हत्या. देखून राज्यपालान परतून एक विशेश अधिवेशन आपोवचें. नाजाल्यार राष्ट्रपतींक सांगून सरकार बरखास्त करपाची शिफारस करची अशी मागणी विरोधी पक्ष फुडाऱ्यांनी केली. बुधवारा तांणी राज्यपाल पुसापती अशोक गजपती राजू हांकां मेळून हे संबंदी निवेदन सादर केले.
हे संबंदी विरोधी फुडारी युरी आलेमांव हांणी सांगलें, सभापतीन हाचे पयलीं नेम 209 प्रमाण विधानसभा सभाघराचे अधिकार चड आसात अशें सांगिल्लें. पूण दनपारां तांणी आपलोच निर्णय बदलून अधिवेशन स्थगीत केलें. हाका लागून आमच्या घटनात्मक अधिकारांचे उल्लंघन जाला. तो दीस लोकशाये खातीर काळो दीस थारलो. गुजरात, कर्नाटक, त्रिपुरा, नागालँड, महाराष्ट्र हांगाय पोटवेंचणूक जावपाची आसा. पूण थंयची अधिवेशनां चालूच आसात. आचारसंहिता लागू आसतना त्रिपुराच्या अर्थमंत्र्यांन अर्थसंकल्प लेगीत सादर केलो.
तांणी म्हणलें, गोंयांत हुकूमशाय पद्दतीन अधिवेशन गुठलायलें. इतिहासांत पयलेच खेपे अशें घडलां. गोंयांत भारताचें संविधान लागू जायना? गोंयांत वेगळो कायदो आसा? हाची जाप सरकारान दिवपाची गरज आसा. ह्या अधिवेशनांत आमी 21 खाजगी विधेयकां मांडपाचे आशिल्ले. हाका लागून सरकारी कारभार उक्ताडार येवपाचो आशिल्लो. ह्या भंयान अधिवेशन गुठलायलें. राज्यपालांन विशेश अधिवेशन आपोवप गरजेचें आसा. अशें जालें ना जाल्यार राष्ट्रपतींक सांगून राज्य सरकार बरखास्त करपाची शिफारस राज्यपालांनी करची अशी मागणी आमी केल्या.
आमदार विरेश बोरकार हांणी सांगलें, गोंय तिगोवन दवरपा खातीर आमी वेगवेगळी खाजगी विधेयकां अधिवेशनांत मांडपाचें आशिल्ले. हाका लागून सरकाराचेर चेपण आयिल्लें. देखून आचारसंहितेचे कारण दिवन अधिवेशन गुठलायलें. वेंचणूक आचारसंहिता आसतना विधानसभा अधिवेशन जावंक शकता काय ना आनी वेंचणूक आयोगान अधिवेशन स्थगित करपाक सांगिल्लें काय कितें हे संबंदी आमी देशाच्या मुखेल वेंचणूक अधिकाऱ्यांक पत्र बरोवन विचारलां.
फुडलें पर्यायांचो विचार सुरू
दोन दिसांनी राज्यपालाकडल्यान जाप मेळटली अशी आमी अपेक्षा दवरतात. ते उपरांत आमी फुडले पर्याय विचारांत घेतले. हे विशीं आमी प्रधानमंत्री वा राष्ट्रपती हांकां कळयतले. गोंयांतलें भाजपा सरकार कितें करता तें देशांतल्या लोकांक कळपाक जाय अशें आमदार वेंजी व्हिएगास हांणी सांगलें.
आंदोलन सुरूच उरतलें
39 अ आड आमचे आंदोलन सुरूच उरतलें. आमी गांवां-गांवांनी वचून हे विशीं जागृताय निर्माण करतले. लोकांची समस्या मतींत दवरून आंदोलनाची येवजण जातली. हे संबंदी थळाव्यांनी आमचे कडेन संपर्क सादचो अशें वीरेश बोरकार हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
