भांगरभूंय | प्रतिनिधी
पणजी : मधलोमाज- मांद्रें, पेडणेंच्या रस्त्या लागसारा आशिल्ल्या शेकड्यांनी वर्सांचें आंब्याचें झाड सोमारा १२ मेक सांजेवेळार कोसळ्ळें. ह्या झाडा पोंदाक आयिल्ल्यान दुचाकी चालक विशाल कृष्णनाथ साळकार (रा. धुळेर, म्हापशें) ह्या तरणाट्याक मरण आयलें. झाडा पोंदाक एक गाडीय आडकली. हातूंत वाहनाचें व्हडा प्रमाणांत लुकसाण जालें. मात गाडयेंत आशिल्ले चार जाण वाटवले.
मजगतीं हातांत आयिल्ले म्हायती प्रमाण, ज्या जमीन धनयाचे मालमत्तेंत हें झाड आशिल्लें ताचेर निश्काळजीपणाचो थपको दवरून मांद्रें पुलिसांनी भादंसंच्या कलम १६१ (१), ३ (५) अन्वये गुन्यांव नोंद केला.
नेमकें प्रकरण कितें?
मदलो माज मांदर्यां रस्त्याचे कुशीक आशिल्लें आंब्याचें झाड पडून धुळेर म्हापशेंचो मोटार सायकल चालक विशाल कृष्णनाथ साळकार हाका मरण आयलें. ही घडणूक सोमारा सांजेच्या पावणे पाचांक सुमार घडली.
विशाल आपले मोटार सायकली वयल्यान हरमलच्यान मांद्रयां वतालो. तेन्नाच ताच्या फुडल्यान एक गाडी येताली. अचकीत ह्या दोनूय वाहनांचेर आम्याचें झाड पडलें. झाड पडिल्ल्यान विशाल गंभीर जखमी जालो आनी गाडयेंत आशिल्ल्या चार जाणांक किरकोळ जखम जाली. गाडयेचें बरेंच लुकसाण जालें.
थंय जमा जाल्ल्या लोकां मदल्या कांय जाणांनी १०८ ऍम्बुलन्सी कडेन संपर्कूय केलो. पूण सांजेचीं ५ वरां जावन गेलीं तरी एम्बुलन्स घडणुके सुवातेर पावूंक ना. हाका लागून विशालाक थंय आशिल्ल्या लोकांनीच तुयेंच्या हॉस्पिटलांत व्हेलो. मात उपचारा पयलींच विशालाक मरण आयलें.
विशाल हो धुळेर- म्हापशेंचो. ताचे फाटल्यान ताची घरकान्न आनी एक तीन वर्सां पिरायेचें चली असो परिवार आसा. तो आगरवाडचो जावंय.
मधलोमाज- मांद्र्या जें झाड कोसळून विशालाक जीव वगडावचो पडलो, तें शेकड्यांनी वर्सां आदलें. ताचे पोंदां दर दिसा आंबे विक्रेते आनी नुस्तें विक्रेते सकाळ ते दनपार मेरेन बसताले. काल हांगा कोणूच नाशिल्लो. मात वाटेन वचपी विशालाक जीव वगडावचो पडलो. हे घडणुके उपरांत पावसा पयलीं पोरणीं, धोक्याचीं झाडां कापून उडोवपाची मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
