भांगरभूंय | प्रतिनिधी
विशाखापटनम : आंध्र प्रदेशांतल्या विशाखापटनम हांगा एका भाड्याच्या फ्लॅटांत घडिल्ल्या भिरांकूळ खून प्रकरणाक लागून बरोच बोवाळ जाला. भारतीय नौदळांतल्या ३० वर्सां पिरायेच्या चिंतडा रवींद्र हाका ताचे इश्टीणीचो खून करून ताचे कुडीचे कुडके केल्ल्याच्या आरोपा खाला पुलिसांनी अटक केल्या
रवींद्र INS Dega हांगा कार्यरत आसा तो फाटल्या दोन वर्सां सावन गाजुवाका वाठारांत भाड्याक रावतालो. आयतारा दनपरां तांणी २८ वर्सां पिरायेच पॉलिपल्ली मौनिका हिका आपल्या फ्लॅटार आपयली. त्या दोगांयची वळख २०२१ वर्सा एका डेटिंग ऍपा वरवीं जाल्ली.
मौनिका फ्लॅटार आयले उपरांत कांय वेळांत त्या दोगांय मदीं वाद जालो. पुलिसांचे म्हायती प्रमाण मौनिकाने रवींद्र कडल्यान ३.५ लाख रुपया घेतिल्ल्याचो आनी तांच्या संबंदाची म्हायती तिचे बायलेक दिवपाची धमकी दिल्ल्याची धमकी दिल्ली. हो वाद उपरांत वाडिल्ल्यान रवींद्रान तिचो गळो दामून खून केलो.
रविंद्रान पयलींच सुरी घेवपाचे यत्न केल्ले, अणें पुलिसांनी सांगलें. थळाव्या दुकानांत ताका मेळूंक नाशिल्ल्यान ताणें ऑनलायन ऑर्डर दिली. खून जाले उपरांत ताणें कुडीचे तीन कुडके केल्ले. कुडीचो एक भाग रेफ्रिजरेटरांत दवरलो, दुसरो भाग पोतयेन भरून खाटी सकयल लिपोवन दवरलो, जाल्यार तकली आनी हात आशिल्लो तिसरो भाग अडविवराम वाठारांत व्हरून लाशिल्ल्याचें पुलिसांनी सांगलें.
रविंद्राची बायल हालींच बाळंतपणाक आपल्या आवयच्या घरांत रावताली. घरांत कोणूच नाशिल्ल्याचो फायदो घेवन ताणें मौनिकाक घरा आपयल्ल्याचें उक्तें जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
