भांगरभूंय | प्रतिनिधी
शिक्षणीक वर्सा विशीं मुख्याध्यापकांक मार्गदर्शन
भांगरभूंय । प्रतिनिधी
पणजी : राष्ट्रीय शिक्षण धोरणाच्या (एनईपी) कार्यवाही खातीर नवें शिक्षणीक वर्स 1 एप्रील सावन सुरू करपाचो इतिहासीक निर्णय शिक्षण खात्यान घेतला. विशयां खातीरच्या वर्गाचो वेळ तशेंच अभ्यासक्रमा विशींचें परिपत्रक बेगिनूच जारी जातलें. राष्ट्रीय शिक्षण धोरणा प्रमाण शिकोवपा विशींचे निर्देश परिपत्रकांत आसतले, अशी म्हायती शिक्षण संचालक शैलेश झिंगडे हांणी दिली.
शिक्षणीक वर्स एप्रील सावन सुरू करपा विशीं विद्यालयाच्या मुख्याध्यापकांक शुक्रारा मार्गदर्शन केलें. उत्तर गोंयच्या मुख्याध्यापकां खातीर पर्वरे जाल्यार दक्षीण गोंयच्या मुख्याध्यापकां खातीर मडगांवां मार्गदर्शन जालें.
यत्ता सवी ते धावी आनी बारावेचे वर्ग एप्रीलांत सकाळीं 11.30 वरां मेरेन चलतले. 1 मे ते 3 जून मेरेन गिमाळी सुटी आसतली. उपरांत 4 जून सावन आदले वरीं वर्ग सुरू जातले. शिक्षण संचालकान हे विशींचें परिपत्रक जारी केलां. मुख्याध्यापक तशेंच शिक्षकां खातीर स्वतंत्र परिपत्रक जारी जातलें.
शिक्षणीक वर्स एप्रील सावन सुरू करपा विशीं तरेकवार प्रतिक्रिया आयकुपाक येतात. गोंय मुख्याध्यापक संघटणेच्यो अध्यक्ष लिबेर्था फर्नांडीस हांणी निर्णयाक येवकार दिला. शिक्षक तशेंच मुख्याध्यापक पुराय एप्रीलांत विद्यालयांत येतात. हाका लागून वर्ग घेवपाक कसलीच आडखळ येवची ना. तशेंच कांय विद्यालयांनी एप्रीलांत धावे खातीर अतिरिक्त वर्ग घेवपाची पद्दत आसा. एप्रीलांत वर्ग सुरू जाल्ल्यान अभ्यासक्रम पुराय करपा खातीर फावो तसो वेळ दिवप शक्य जातलें. तशेंच मे म्हयन्याचे सुटयेंत शिकयल्लो अभ्यासक्रम पुराय करपाची संद विद्यार्थ्यांक मेळटली, अशें संघटणेच्यो अध्यक्ष लिबेर्था फर्नांडीस हांणी सांगलें.
नव्या राष्ट्रीय शिक्षण धोरणा प्रमाण सप्तकाक शिकोवपाचीं 36 ते 39 वरां जावप गरजेचीं. हीं वरां भरून येवपाक एक तर शिक्षणीक दीस वाडोवचे पडटले वा शाळा/ विद्यालयांचो वेळ वाडोवचो पडटलो. शिकोवपाचीं वरां भरून काडपाक एप्रीलांत वर्ग घेवपाचो निर्णय जाला, अशी म्हायती सुत्रांनी दिली. 1 ते 30 एप्रील मेरेन सकाळीं 11.30 वरां मेरेन वर्ग घेतिल्ल्यान शिकोवपाचीं वरां भरून येतलीं. धावेचो निकाल लागता म्हणसर यत्ता इकरावेचे प्रवेश प्रक्रियेक उशीर जाता. हाका लागून इकरावेचें शिक्षणीक वर्स ह्या वर्सा जूनांतूच सुरू करपाचो सरकारान निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
