भांगरभूंय | प्रतिनिधी
पणजी: राज्यांत सध्या सुरू आशिल्ल्या विवीध मुळाव्या सुविधांच्या प्रकल्पांक लागून जनतेक जावपी त्रासाची दखल राज्यपाल पुसापती अशोक गजपती राजू हांणी घेतल्या. मात, हे प्रकल्प पुराय जाले उपरांत गोंयच्या संचारण मळाचेर व्हड क्रांती जातली आनी ताचे फायदे बरोच काळ जनतेक घेवपाक मेळटले, अशें तांणी सोमारा विधानसभा अधिवेशना मजगतीं नमूद केलें.
सध्या सुरू आशिल्ल्या म्हत्वाच्या कामांचो उल्लेख करतना राज्यपालान म्हणलें, सांगोल्डा जंक्शन ते हॉटेल मॅजेस्टीक मेरेनचो एलिव्हेटेड कॉरिडॉर, राष्ट्रीय महामार्ग ६६ क जोडपी रस्ते आनी धारगळच्या उड्डाणपुलाचें काम जावपाचे वाटेर आसा. ह्या व्हड प्रकल्पांक लागून येरादारीचेर ताण आशिल्ल्यान सदच्या प्रवासांत नागरिकांक आडमेळ्यांक तोंड दिवचेंच पडटलें, हें सत तांणी मान्य केलें.
हे प्रकल्प पुराय जातांच राज्यांतल्या भितरल्या कनेक्टिव्हिटींत व्हड सुदारणा जातली, असो विस्वास तांणी उक्तायलो. हाका लागून प्रवासाचो कितलोसोच वेळ वाटवतलो, पर्यटना सयत राज्याच्या अर्थीक वेव्हारांतूय मोट्या प्रमाणांत बदल जातलो. गोंयच्या येरादारी मुळाव्या सुविधांचें आधुनिकीकरण करपाक सरकार बांदील आशिल्ल्याचें राज्यपालान म्हणलें. रस्ते विकास ही उदरगतीची गरज आशिल्ल्यान, हे उदरगतीच्या काळांत नागरिकांनी सहकार्य करचें, अशेंय आवाहन तांणी केलें. ‘आयची गैरवेवस्था ही फाल्यांच्या सुखी प्रवासाची वाटचाल’ अशें सांगत तांणी विकसीत गोंयचें चित्र मांडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
