भांगरभूंय | प्रतिनिधी
सध्या पावसाक नेट आयला. त्या वेळार बियो रोंवपाचें जायत्या पर्यावरण मोगींच्या मनांत येता. अशा वेळार आमचे भोवमानेस्त प्रधानमंत्री नरेंद्र मोदीची हांणी तांचे लोकप्रीय मन की बात कार्यावळींत दरकेल्यान आपल्या आवयच्या नांवान एक तरी रोंप लावचें, असो उलो भारतीयांक मारला. जांचे कडेन व्हडलो जागो, शेत आसा तांणी शेत रोंवपाक सुरवात केल्या. कांय जाणांक अडचणी येतात. थोड्यांच्या शेतांनी मानगीं येवपाच्यो घडणुको घडल्यात. तरीय तांचेर मात करून जमनीची भलायकी सुदारप, उदकाचें वेवस्थापन करप हे सारकें काम आसता. ताचें कारण म्हायती नासप. मात आतां सावयवेऱ्यां शेतकी म्हाविद्यालय सुरू जालां. उच्च माध्यमीक पांवड्याचेर हाॅर्टिकल्चर सारको अभ्यासक्रम वेवसायीक फांट्यांत सुरू जाला. देखून ल्हान व्हड शेतकार शेताची म्हायती घेवपाक शकतात. हे खेरीज सरकारी शेती खातें आसा.
गोंयच्या सगल्या वाठारांनी शेता खातीर उदक आसाच अशें ना. कांय तालुक्यांनी आतां उदक आडावपाचे यत्न करतात. हे बाबतींत जागृताय करपाची गरज आसा. आमी ते यत्न व्हड प्रमाणांत करीनात, तो मेरेन आमकां मुखार पावासाची वाट पळयत रावचें पडटलें.
एक मात खरें, शेती ही जायच, नाजाल्यार आमी करतले कितें? शेत कसयतलो जाल्यार उदक जाय. जर मातयेंत वा टांकयांनी उदक सांठोवन दवरलें जाल्यार ताचो व्हडलोसो लाव जावचो ना. मात फुडले पिळगेक आमी उदक दवरपाक शकले, हाचें समाधान मेळटलें. हालींच करियर उपक्रमा खातीर म्हापशेंच्या काकुलो काॅलेजींत वचपाक मेळ्ळें. प्राचार्य संतोष पाटकार उमेदी, विद्यार्थ्यां खातीर कितें ना कितें उपक्रम करीत आसतात. तांचे लागीं वाणिज्य फांटो आसा. तशेंच बीबीए हो सेल्फ फायनान्स अभ्यासक्रम लेगीत आसा. तांचें म्हणणें आमी मुलाखतीक तयार करूंक जाय. तशेंच तांचे कडेन नोकरे खातीर जें – जें लागता तें सगलें जाय. ते खातीर ते सुरवेक पसून जाणकारांक आपोवन तांचें उलोवप आयकुपाची तजवीज करतात. ते म्हणटात, काॅमर्स हो वेपार, उद्देजक हांकां चड लागींचो. गोंयांत उद्देगाक लागपी मनशांची गरज आसा. म्हणटकच आमची जापसालदारकी वाडत आसा. आमचो शिक्षकवर्ग त्रास घेतात, पूण विद्यार्थ्याक नोकरेक फावो तें सगलें दिवपाचो यत्न करतात. लेक्चरुच न्हय, तर विंगड विंगड कार्यावळी लेगीत आमी अश्यो आंखतात, की तांचो लाव आमच्या विद्यार्थ्यांक जाता.
फाटल्या कांय वर्सांनी आमची सर्टिफिकेट कोर्स घेतले. हे सगले कुशळटायेक संद दिवपी आशिल्ले. देखीक संगणकाचें मुळावें गिन्यान, डिटीटल मार्केंटीक, जीएसटी, ब्युटिशियन… अश्या जायत्या कोर्सांचो आमच्या विद्यार्थ्यांनी लाव घेतलो. हातूंतल्यान कांय जाणांनी स्वताचो वेवसाय सुरू केला, हें पळोवन बरें दिसता. विद्यार्थ्यांक बँकेची परिक्षा सोंपी वच्ची म्हूण आमी कोर्स सुरू केला. ताचो फायदो आमकां कांय वर्सांनी दिसतलो. आमच्या विद्यार्थ्यांक परिक्षेची वळख नाशिल्ल्यान कारणान ते फाटीं पडटात आसुंये.
पाटकार हांणी सांगलें, कोर्स दवरपाक तज्ञ नेमलेले आसात. ते सर्वेक्षण करतात आनी कितें करचें तें सांगतात. ते प्रमाण आमी ते दवरतात. नेकाची बी ग्रेड आमकां मेळ्ळ्या. हाचे वयल्यान आमचे काॅलेजीचो दर्जो कितें तें वेगळें सांगपाक नाका. आमचे शिक्षक शिक्षणा विशीं जागृत आसात. काॅलेजींत शिस्त दवरपाक तांची खूब मजत जाता. आमचे कडेन बीसीए, बीबीए हे अभ्यासक्रमूय आसात. ताचो लाव विद्यार्थी घेतात. काॅलेजीचो हाॅल केन्नाच रिकामी आसना. तो सेगीत कसले ना कसले कार्यावळींत व्यस्त आसता. विद्यार्थीय हे कार्यावळींचो लाव घेतात. आमचे काॅलेजीचो 34 वो स्थापना दीस आमी ह्याच सप्तकांत मनयतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
