भांगरभूंय | प्रतिनिधी
खबरां संस्था
वेलिंग्टनः फॉलोऑन घेवून खेळटना न्यूझिलंडाक साल्वार करपाचें काम आदलो कॅप्टन केन विलियम्सनान केलें. 226 बॉलांत 8 चौक्याचें मजतीन ताणे आपल्या टॅस्ट कारकिर्दींतलो 26वो शेंकडो करून रॉस टेलराक फाटी उडोवन नवो इतिहास रचलो. न्यूझिलंडान दुसऱ्या डावांत 483 धांवड्यो केल्यो. इंग्लंडाक ही दुसरी टॅस्ट मॅच जिखपा खातीर आतां 210 धांवड्यो करपाची गरज आसा.
विलियम्सान 12 चोक्यांचे मजतीन 282 बॉलांत 132 धांवड्यो केल्यो. तो आतां न्यूझिलंडा खातीर सगल्यांत चड धांवड्यो करपी बॅट्समन थारला. ताणे रॉस टेलराचो एक विक्रम मोडलो. आपल्या 92वे टॅस्ट मॅचींत व्हो पराक्रम केलो. हो विक्रम पयलीं रॉस टेलराच्या नांवाचेर आशिल्लो. ताणे 112 मॅचींत 44.66चे सरासरीन 7683 धांवड्यो केल्ल्यो. विलियम्सनाच्या नांवार आतां 7787 धांवड्यो जाल्यात.
हे कामगिरी खातीर रॉस टेलरान केन विलियस्मनाक परबीं भेटयल्यांत. ताणे ट्विट करून न्यूझिलंडा वतीन टॅस्ट क्रिकेटींत सगल्यांत चड धांवड्यो करपी विलियम्साक परबीं दिल्यांत. तुगेली ही कामगिरी टॅस्ट क्रिकेटी खातीर तूं कितली मेहनत घेता आनी समर्पीतपणान खेळटा हाची गवाय आसा. अजून बरींच वर्सां बाकी आसात, अशें टेरलान म्हणलां.
न्यूझिलंडाचें पुनरागमन
इंग्लंडाच्या पयल्या डावांतल्या 435 धांवड्यांच्यो दोगरा खाला चेपल्ल्या न्यूझिलंडाचो पयलो डाव 209 धांवड्यांत सोपलो आनी तांका फॉलोऑन खेळचें पडलें. ही मॅच आमी सहजपणान जिखतले अशें इंग्लंडाक दिसतालें. मात दुसऱ्या डावांत पयली डेव्हॉन कॉनवे (61), टॉम ब्लंडेल (90) आनी टॉम लॅथम (83) आनी उपरांत केन विलियम्सन (132) हांणी खडेगांव बॅटिंग करून न्यूझिलडांक पुनरागमन करून दिलें.
वेलिंग्टन मैदानार न्यूझिलंड आनी इंग्लंड हांचे मदी निमाणी टॅस्ट मॅच 2013 वर्सा जाल्ली. त्या वेळार तेन्नाचो इंग्लंडाचो कॅप्टन अॅलिस्टर कुकान न्यूझिलंडाक फॉलऑन दिल्लो. आनी तांणी दुसऱ्या डावांत बरी बॅटिंग करून मॅच ड्रॉ केल्ली. आतांय तशीच परिस्थिती दिसता. अशे परिस्थितींत कॅप्टन बेन स्टोक्सान तीच चूक परत केल्या काय किदें, अशें प्रस्न विचारले वतात. इंग्लंडान तांच्या दुसऱ्या डावांत फॉर्मांत आशिल्लो हॅरी बूक आनी जो रुटाच्या विकेटी बेगीन पडल्यार इंग्लंडाक तें म्हारग पडपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
