भांगरभूंय | प्रतिनिधी
खबरां संस्था
मावंट माउनगानुईः दक्षीण आफ्रिके आडचे पयले टॅस्ट मॅचींत केन विलियमसन आनी रचीन रवींद्र हांच्या शेंकड्यांच्या नेटार न्युझिलंडान पयल्या दिसाचो खेळ सोपलो तेन्ना 2 आवट 258 धांवड्यो करून व्हडली धांवस्ख्या रचपाचे दिकेश पावलां घातली.
दक्षीण आफ्रिकेन टॉस जिखून न्युझिलंडाक पयलीं बॅटिंग करपाक सागलें. ओपनर डॅव्हन कॉनव्हेक (1) मोरेकीन एलबीडब्ल्यू करून न्युझिलंडाक सुरवेक धपको दिलो. पंगडाच्या 39 धांवड्यांचेर दुसरो ओपनर टॉम लाथन (20) कॅच आवट जालो. उपरांत विलियमसन आनी रवींद्र ही जोडी जमली आनी तांणी तिसरे विकेटी खातीर खेळ सोपमेरेन 215 धांवड्यांची नाबाद भागिदारी केली. विलियमसनान 259 बॉलांत 15 चौक्यांनी 112 आनी रचीन रवींद्र 13 चौके आनी एक सक्यान 118 धांवड्यांचेर खेळटा. न्युझिलंडाच्यो ज्यो दोन विकेटी पडल्यो त्यो शेफो मोरेकी आनी डॅन पीटरसन हांणी घेतल्यो.
6 खेळगड्यांचें पदार्पण
न्युझिलंडा आडचे ह्या पयले टॅस्ट मॅची खातीर दक्षीण आफ्रिकच्या 6 खेळगड्यांनी टॅस्ट पदार्पण केले. तातून कॅप्टन नील ब्रांड, एडवर्ड मूर, रेनार्ड वान टोन्डर, शेफो मोरेकी, रुआन डे स्वार्ट आनी क्लायड फॉर्च्यून हांचो आसपाव आसा. तांच्या पयलीं जुबैर हम्जा, डेविड बेडिंघम, किगन पीटरसन, डुआन ओलिवर आनी डेन पीटरसन हांणी टॅस्ट पदार्पण केल्लें. ह्या सगल्यांनी मिळून आतां मेरेन फकत 38 टॅस्ट मॅची खेळ्ळ्यात. ओलिवर टीम हाचे कडेन 15 टॅस्टी मॅची खेळपाचो अणभव आसा. न्युझिलंडाचो कॅप्टन टिम सावदी एकलोच 96 टॅस्ट मॅची खेळल्लो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
