भांगरभूंय | प्रतिनिधी
कुडटरी सरपंच : प्रकल्प मंजुरी खातीर पयशे घेतिल्ल्याचें न्हयकारलें
भांगरभूंय । प्रतिनिधी
मडगांव : कुडटरी ग्रामसभेंत परतून एकदां प्रकल्पाचे मंजुरी वयल्यान चर्चा जाली. एक व्हायरल व्हिडियो दाखोवन प्रकल्पा खातीर कोणे प्रकल्पा खातीर कोणा कडल्यान पयशे घेतले, असो मरिनो रिबेलो हांणी प्रस्न विचारलो. ताचेर सरपंच आलेक्सिनो दा सिल्वा हांणी आपल्या वयले पयशे घेतिल्ल्याचे आरोप फटीचे आसात, प्रकल्प पंचायतीन रद्द केला, अशें स्पश्ट केलें. थळाव्या लोकांचो विरोध आशिल्लो प्रकल्प येवपाक दिवचों ना, अशेंय तांणी सांगलें.
कुडटरीची ग्रामसभा आयतारा सरपंच आलेक्सिनो दा सिल्वा हांचे अध्यक्षते खाला जाली. हे ग्रामसभेंत परतून एकदां कुडटरी वाठारांतलो प्रस्तावीत गृहप्रकल्पाचो मुद्दो चर्चो आयलो. हे आदीं गांवच्या लोकांनी एकठांय येवन पंचायतींत धांव घेवन गृहप्रकल्पाक विरोध केल्लो. ते प्रमाण पंचायती कडल्यान प्रकल्पाची परवानगी रद्द केल्ली. आतां ग्रामसभेंत लेगीत हो मुद्दो चर्चेक हाडलो. पंचायतीन परवानगी दिवंक नासतनाय प्रकल्पाचें काम थंय चालू आसा, अशें कांय लोकांनी सांगलें. ताचे वयल्यान मरिनो रिबेलो हांणी आक्रमक जावन गृहप्रकल्पाक लोकांचो विरोध आशिल्ल्यान तशेंच बेकायदो तरेन झाडां मारून सपाटीकरम केल्ले खातीर त्या प्रकल्पाक दिल्लो नाहरकत दाखलो रद्द केला. पंचायतीच्या आदेशाक मान दिना जाल्यार लोकूच हो प्रकल्प जावपाक दिवचे नात, अशें सांगलें.
हो प्रकल्प येता त्या प्रभागांतल्या पंचाच्या भावाचो व्हिडियो व्हायरल जाता. बिल्डरा वांगडा उलयतना सरपंच, सचीव आनी ज्योकी हांणी पयशे घेतल्यात, अशें तातूंत म्हणलां. हो व्हिडियो फटीचो आसा जाल्यार सरपंचान पुलीस कागाळ करची, अशें मरिनो हांणी सांगलें.
कसलेय चवकशेक तयार : आलेक्सिनो दा सिल्वा
ग्रामसभेंत भलायकी आनी कोयरा संबंदांत चर्चा जाली. हे चर्चे वेळार प्रकल्पाची परवानगी फाटीं घेतल्या, तरीय तोच विशय काडलो. कोयराचो प्रस्न सोडोवपाचो यत्न चल्ला. कोयर प्रक्रिया करपाची मशिनां आसून लेगीत सुवात नाशिल्ल्यान एमआरएफ शेडीची उबारणी जायना. आपणे पयशे घेतिल्ल्याचो आरोप पुराय फटीचो आसा. ते खातीर कसलेय चवकशेक आपूण तयार आसा. व्हायरल व्हिडियोंतल्या कोणाकूच आपूण वळखना, अशें सरपंच आलेक्सिनो दा सिल्वा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
