भांगरभूंय | प्रतिनिधी
मनोज परब: मेजक्याच सुवातांचेर उमेदवार दवरतलों
पणजी : दिल्लींतल्या माफियां पसून गोंयकारांच्यो जमनी सुरक्षीत दवरपा वांगडा गोंयची अस्मिताय राखपाक आरजी पक्ष नव्या नेटान परत कामाक लागतलो. गोंयकारांच्या बर्या खातीर खंयचेच गजालीचेर तडजोड करपाची पक्षाची तयारी ना. विरोधी पक्षांच्या आघाडीतल्यान आरजी भायर सरला अशें पक्षाचे मुखेली मनोज परब हांणी जाहीर केलें. निधी तशेंच पक्ष वांगड्यांचीं मतां जाणून घेवन येवपी विधानसभा वेंचणुकेंत वेंचीक सुवातांचेर उमेदवार उबे करपाचो निर्णय पक्षान घेतला अशें तांणी सांगलें.
रिवोल्युशनरी गोवन्स पक्षाचे मुखेली मनोज परब हांणी शुक्रारा पणजे पत्रकार परिशद घेतली. पक्षाची ध्येयधोरणां, येवपी वाटचाल आनी विधानसभा वेंचणुके विशीं ते उलयले.
फाटले विधानसभा वेंचणुकेंत पक्षान ३८ सुवातांचेर वेंचणूक लढयिल्ली. वेंचणुके खातीर पक्षाचे १७ लाख रूपया खर्च जाले. उपरांत ७ म्हयने पक्षाचे काम बंद आशिल्लें. हांवेंय विसव घेतिल्लो. गोंयकारांचे प्रस्न समजून घेतना कशे तरेन फुडें सरचें? हे विशीं चिंतपा खातीर हांवें विसव घेतिल्लो. तज्ञांचो सल्लो घेवन राजकारण तशेंच फुडले वाटचाली खातीर डावपेच आखपा खातीर कांय काळ शांतपणान विचार करपाची गरज आसता. हाचे खातीरूच फाटले ७ म्हयने आरजीचो खंयच्याच आंदोलनांत वांटो नाशिल्लो. हांवूय सकगीय नाशिल्लों, अशें स्पश्टीकरण तांणी दिलें.
आमदार विरेश बोरकार हे आरजी वांगडाच आसा. विधानसभेंत तांणी राज्याचे प्रस्न प्रभावीपणान मांडल्यात. ताका हेर विरोध पक्षाचो वांगोड मेळंक ना. दिल्ली विधानसभा वेंचणुकेंत भाजपा आड आशिल्ले आप आनी कॉंग्रेस हे एकमेकां आड आरोप प्रत्यारोप करतात.गोंयकारांच्यो जमनी आनी अस्मिताय सुरक्षीत दवरपाचो लढो चालूच दवरपा खातीर हेर विरोधी पक्षां पसून वेगळे रावपाचो निर्णय पक्षान घेतला. वांगडीपदाची मोहीम तशेंच निधी संकलन मोहीम नव्यान सुरू जावपाची आसा अशें तांणी सांगलें.
येवपी विधानसभा वेंचणुकेंत मेजक्याच सुवातांचेर पक्ष उमेदवार दवरतलो. हेर सुवातांचेर कोणाक फाटबळ दिवचें काय दिवचें न्हय, हाचो निर्णय आजूनय जावंक ना, अशें तांणी एका प्रस्नाचेर उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
