विरोधी एकवट आतां ना, जाल्यार केन्नाच ना !

भांगरभूंय | प्रतिनिधी

विरोधकांचें फकत एकवटाचेर भागतलें अशें दिसना तर ताच्याय फुडें वचून थोडो त्याग करपाची मनाची तयारी दवरची पडटली.

भोव चर्चित विरोधी एकवटाची फाटल्या वर्सभरयां जायत्या आडमेळ्यांक तोंड दीत कुटूकुटू करीत चलिल्ली गाडी फुडल्या
तीन दिसांत बिहारांतल्या पाटणा स्टेशनाचेर पावतली. तिका येवकार दिवपाक प्रधानमंत्री नरेंद्र मोदी हांकां विरोध करपी वीस- बावीस विरोधी पक्षांचे फुडारी हाजीर रावतले. सादारण 22- 23डब्यांची ही गाडी फुडल्या आठ- णव म्हयन्यांत सगल्यांक घेवन प्रतिकूल परिस्थितींत दिल्लींत पावपाची आसा. ते खातीर खंयच्या सारक्या मार्गान वचपाचें, गाडयेंत कोणाक घेवपाचें, फुडल्या पांच -स डब्यांत खंयचे फुडारी आसपाचे, गाडी कोणे चलोवपाची, ताका पालव दिवपी कोण आसचो, खंयची स्टेशनां घेवप वा घेवपाची नात, अश्या जायत्या प्रस्नांचेर चर्चा करून ताचेर एकमत घडोवन हाडपाचो सगळ्याच विरोधी फुडाऱ्यांचो यत्न आसतलो. लोकसभेचे वेंचणुकेंत भारतीय जनता पक्षाक शह दिवपाच्या उन्मादांत आपापसांतले वाद, झगडीं कुशीक दवरून खंयचेय परिस्थितींत म्हाएकवोटाची ही ‘एक्सप्रेस’ दिल्लीक आनी पर्यायान नव्या संसद भवनांत पावोवपा खातीर ही सगळी धांवपळ, धडपड सुरू आसा. ‘आतां ना जाल्यार केन्नाच ना’ हाचें भान दरेका पक्षाक आसा.
विरोधी एकवोटाची ही गाडी तशी पोरणीच. फाटले लोकसभा वेंचणुकेंत लेगीत ती दिल्लीक व्हरपाचे यत्न जाले नात, अशें न्हय. मात पांच वर्सां उपरांत नव्यान शक्य जाता जाल्यार चडांत चड डब्यांची जोडणी करून आनी थारायिल्ल्या वेळांत ती दिल्ली वचपा खातीर सुटची हे खातीर कांय राजकी पक्षाचे प्रामाणीक म्हणपाक जाय अशे यत्न नक्कीच चल्ल्यात, मात सगळ्याच डब्यांची जोडणी वेळार पुराय जावन एकवटाची ही एक्स्प्रेस पाटण्यांतल्यान फुडें वचपाक शकतली काय, ह्या प्रस्नाची जाप मात सध्या कोणाकूय दिवपाक जावची ना.
विरोधी म्हाएकवट एक्स्प्रेसीक ह्या वेळार कांय नवे डबे जोडटले अशी चर्चा आसा. फाटले लोकसभा वेंचणुकेच्या वेळार अशा एक्स्प्रेस गाडयेची आमकां कसलीच गरज ना, आमी आमच्या बळग्यार वेंचणुको लडोवपाक पुराय समर्थ आसात, अशें सांगपी आम आदमी पार्टीचे सुप्रिमो आनी दिल्लीचे मुख्यमंत्री अरविंद केजरीवास आसूं वा ‘एकला चलो’ चो पुरस्कार करीत हेर विरोधकांक कस्पटा समान मानपी तृणमूल काँग्रेसची सर्वेसर्वा आनी अस्तंत बंगालाची मुख्यमंत्री ममता बॅनर्जी आसूं, सगळ्यांक पांच वर्सांत आमी सारके खंय आसात हें कळून आयिल्ल्यान अशे बरेच नवे डबे घेवन ते दिल्ली, कोलकाता, मुंबय अशा कांय शारांतल्यान पाटणाचे वाटेर आसात. मुंबयच्यान ऊबाठा शिवसेनेचे उद्धव ठाकरे आनी पत्राचाळ फेम संजय राऊत हेय आपलो डबो हे एक्स्प्रेशीक जोडचो हे खातीर डबो घेवन पाटणा वतले. राष्ट्रवादीच्या डब्यांत शरद पवार आनी सुप्रियाताई सुळे निश्चीतच आसतलीच, पूण अजितदादा आसतलो हाची खात्री कोणूय दिना. खुद्द पाटणा स्टेशनाचेर जनता दल युनायटेडाचे नितीशकुमार आनी राजदचे तेजस्वी यादव वीस- पंचवीस हार घेवन येवकार दिवपाची तयारी करतना आपलो डबो सगल्यांत फुडें कसो आसतलो हे खातीर दक्षताय घेतात. समाजवादी पक्षाचे सर्वेसर्वा अखिलेश यादव हांणी आयतारा एके मुलाखतींत आपल्या डब्याक वट्ट जोडणींत खासा सुवात मेळल्यारूच ही एक्स्प्रेस कशी फास्ट धावपाक शकतली, हाचो ट्रेलर हेर फुडाऱ्यांक दाखोवपाची संद सोडली ना.
केंद्रातले सत्तेचो मार्ग उत्तर प्रदेशांतल्यान वता अशें सांगून हेर विरोधी पक्षांनी भाजपाक घरा धाडपा खातीर आपल्याच पक्षा कडेन येवचें पडटलें अशें सांगून उत्तर प्रदेश आमचे कडेन सोंपयात आनी उपरांत तुमचें कितें तें तुमी पळोवन घेयात, असोच प्रस्ताव अखिलेश यादवान विरोधी म्हाएकवोटा खातीर दवरला अशें दिसता. केजरीवालान दिल्ली आनी पंजाबांत हेर खंयच्याय पक्षाचे उमेदवार आसचे न्हय असो आग्रो धरला जाल्यार पश्चीम बंगालांत ममना बॅनर्जीक कोणा येऱ्यागेऱ्यांचे थंय कामूच ना, अशें दिसता. पंजाब आनी दिल्ली आमचे खातीर मेकळी सोडल्यार मध्यप्रदेश, छत्तीसगड, राजस्थानांत आमी वेंचणुकेंत देंवचे नात अशेय आस्वासन केजरीवाल हांणी दिलां. अशे फाटभुंयरे विरोधी म्हाएकवोटाची ‘एक्स्प्रेस’ पाटणा स्टेशना वयल्यान मात्सी जरी हाल्ली जाल्यार ती विरोधी एकवटा खातीर मोठी उपलब्दी थारपाक शकता.
महाराष्ट्रांत जाल्यार राष्ट्रवादी काँग्रेस आपलो सगल्यांत व्हड भाव असो उल्लेख करता. ऊबाठाचे संजय राऊत जाल्यार एकोणीस जाग्यां वयल्यान मातून फाटीं सरपाक तयार नात. अशे परिस्थितींत कर्नाटक जिखले उपरांत देशाचें फुडारपण परत करपाची उमेद आनी सपनां पितारत आशिल्ल्या काँग्रेसा खातीर कितें बाकी उरतलें हो संशोधनाचो विषय थारपाक शकता. विरोधी म्हाएकवोटाच्या एक्स्प्रेसाचें सारथ्य कोण करतलो हाचेरूय सगळो गोंदळ दिसता. भाजपा कडेन प्रधानमंत्रीपदा खातीर फकत एकूच चेरो आसा, मात आमचे कडेन अशें आठ- धा चेरे आशिल्ल्याचो दावो पयर अखिलेश यादव हांणी मुलाखती मजगतीं केलो, तेन्नाच ही एक्स्पेस पाटणा स्टेशनाचेरूय सासणाची आडकून तर पडची ना मू, अश्या दुबावाची पाल मनांत चुकचुकपाक लागल्या.
विरोधी एकवटाची एक्स्प्रेस पाटण्यांतल्या डबे जोडणी उपरांत सुरळीतपणान धांवपाक शकतली अशें आज तरी कोणूच सांगपाक शकना. विरोधी एकवटाच्या मार्गांत सतराशें विघ्नां ठाण मांडून बसल्यांत आनी ताचेर विचार करून तोडगो काडचो अशें जरी सांगलें तरी तो मेरेन लोकसभा वेंचणुकांच्यो तारखो जाहीर जावपाक शकतात.
राहुल गांधी, मल्लिकार्जुन खरगे आयज विरोधी एकवटाची बातां मारतात तरी ममता बॅनर्जी, अखिलेश, केजरीवाल हांच्या मना सारकें जावपाक दिल्यार ते आपल्याच पायांचेर कुराड मारून घेवपा सारकें जातलें आनी देशांतल्यान काँग्रेस पार हद्दपार जावपा खातीर ते एक निमीत्त थारपाक शकतलें. मध्यप्रदेश, राजस्थान आनी छत्तीसगड काबीज करपाची सपनां काँग्रेस पक्ष सद्या पळयता आनी अशा वेळार फकत जुजबी तडजोड करपाचेरूच तांचो भर रावल्यार ताचें अजाप दिसपाचें कारण ना. अखिलेश हाणें काँग्रेस हो पोरणा पक्ष आनी तांचे विचारूय पोरणे असो थोमणो मारला. तोय काँग्रेशीक पचतलो काय ना हो लेगीत प्रस्न आसा. विरोधी एकवटा खातीर वातावरण तयार जाता अशें चित्र दिसतनाच जीतनराम मांझी हांणी मारिल्ली पलटी खूब कितें सांगून वता. माझी हे भाजपाचे गुप्तहेर आशिल्ले अशें सांगून तांचें म्हत्व उणें करपाचे यत्न जाता तरी अजून अशे गुप्तहेर भाजपान विरोधी एकवटाच्या मार्गार नेमिल्ले नासत अशें गृहीत धरून चलचें ना. भाजपाचो नेटान धांवत्या त्या घोड्याक आडावपा खातीर विरोधकांचें फकत एकवटाचेर भागतलें अशें दिसना तर ताच्याय फुडें वचून थोडो त्याग करपाची मनाची तयारी दवरची पडटली.

वामन प्रभू
9823196359