भांगरभूंय | प्रतिनिधी
बर्च क्लब घडणुके वयल्यान सभाघरांत बोवाळ
भांगरभूंय । प्रतिनिधी
पणजी : शिंयाळ्या अधिवेशनाच्या पयल्याच दिसा बोवाळ पळोवपाक मेळ्ळो. राज्यपालांचें अभिभाशण चालू आसतना बर्च क्लब घडणुके वयल्यान विरोधी आमदारांनी सभाघरांत बोवाळ घालीत सभापतीच्या हौदात धांव घेतली. उपरांत मार्शलांनी विरोधी आमदारांक सभाघरांतल्यान भायर काडले.
सोमारा सभाघराचें शिंयाळें अधिवेशन सभापतीच्या अभिभाशणान सुरू जालें. जेन्ना सभापती पुसापती गजपती अशोक राजू हांणी आपल्या अभिभाशणाक सुरूवात केली तेन्ना विरोधी पक्ष फुडारी युरी आलेमांव हे उबे रावून तांणी बर्च घडणुकेंत जे 25 निश्पाप जीव गेल्यात तांकां एक मिनटा खातीर शांती दवरून तांकां आर्गां ओंपपाची मागणी केली.
मात राज्यपालान आपलें अभिभाशण चालूच दवरिल्ल्यान युरी आलेमांव हांणी बरोच बोवाळ करीत बर्च घडणुके फाटल्यान जापसालदारकी निश्चीत करूत आपल्या अभिभाशणांत बर्च घडणुकेचो उल्लेख करचो अशी मागणी केली. उपरांत सगल्या विरोधी आमदारांनी बर्च घडणुकेचे तकटे घेवन सरकाराचो निशेध करपाक सुरवात केली.
मात राज्यपालान आपलें भाशण चालूच दवरलें आनी सगल्या विरोधी आमदारांनी सभापतीच्या हौदांत धांव घेतली आनी बोवाळ घालपाक सुरवात केली. सभापतीन तांकां आपली बसका घेवपाची विनवणी केली. मात मागणी करून लेगीत विरोधकांनी बोवाळ चालूच दवरिल्ल्यान सभापतीन तांकां सभाघरा भायर घालपाचो आदेश दिवन मार्शला वरवीं सगल्या आमदारांक सभाघरांतल्यान भायर काडले.
उपरांत विरोधी आमदारांच्या चॅबरांत हे विशीं अदीक म्हायती दिवपा खातीर विरोधी आमदारांनी पत्रकार परिशद आपयली. ह्या वेळार युरी आलेमांव हांचे सयत, हळदोणचे आमदार कार्लुस फेरेरा, केपेंचे आमदार एल्टन डिकोस्टा, गोवा फॉरवर्डचे आमदार विजय सरदेसाय, आम आदमी पक्षाचे आमदार वेन्झी व्हिएगस, क्रुझ सिल्वा आनी आरजीपीचे आमदार विरेश बोरकार हजर आशिल्ले.
बर्च घडणुकेंत सरकारान 25 निश्पाप लोकांचो खून केला, असो आरोप आलेमांव हांणी ह्या वेळार केलो.
ज्या निश्पाप लोकांचो जीव गेलो तांचे खातीर आर्गां ओंपपाची मागणी करून हे घडणुकेचेर पयलीं उलोवपाची आमी मागणी केल्ली. मात जी स्क्रिप्ट सरकारान दिल्या तीच राज्यपाल वाचता. हे घडणुकेंत हडफडेंचे सरपंच, सचीव आनी हेर अधिकार्यांक बळीचे बोकडे केल्यात. हातूंत पंचायत मंत्री, पर्यावरण मंत्री आनी गृह मंत्री हांकां जापसालदार धरपाक जाय आसले, अशें आलेमाव हांणी सांगलें.
सीझॅडएमपी 2011 प्रमाण, बर्च क्लब खाजन सुवातेंत आसा. सीझॅडएमपी आराखड्यांत बागा न्हंये कुशीक 2 लाख चौ. मि. खाजन दाखयलां. पूण प्रत्यक्षांत आठ लाख चौ. मि. खाजनां आसात.
– विजय सरदेसाय, गोवा फॉरर्वड आमदार
नैतीक जापसालदारकी म्हूण पंचायत मंत्री, गृह मंत्री आनी पर्यावरण मंत्र्यान राजिनामो दिवपाक जाय आशिल्लो. हांगासर मुख्यमंत्री आमकां भायर काडपाच्यो सुचोवण्यो सभापतीक दिता. हाचे वयल्यान हो हुकूमशायेचो सरकार म्हूण सिध्द जाता. फाटल्या विधानसभा अधिवेशनांत म्हज्या मिठागराच्या थारावाचेर ह्या क्लबाचो उल्लेख हांवें केल्लो, पूण तेन्ना म्हजीं फकाणां केल्लीं.
– विरेश बोरकार, सांत आंन्द्रे आमदार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
