विरोधा खातीर विरोध नाका

भांगरभूंय | प्रतिनिधी

सगल्या शिक्षकांनी आनी पालकांनी जर सहकार्य दिलें जाल्यार विद्यार्थ्यांचो सर्वांगी विकास सादतलो आनी विकसीत भारत घडोवपाक व्हड आदार जातलो. सगल्यांनी एनईपी धोरणाक आपणावया.

एनईपी धोरणा प्रमाण मुळाव्या पांवड्यार प्रादेशीक भाशा सक्तीची आसा म्हणपाचें नमूद केलां. तरी आसतना गोंय राज्यांत कोंकणी/मराठी आनी इंग्लीश चलता हें कशें कितें? प्रादेशीक भाशा म्हणजे ते ते मातयेची भास, लोकभास. ते लोकभाभशेंतल्यानूच शिक्षण जावपाक जाय. मुळाव्या पांवड्या वेले शिक्षण हें भुरग्यांच्या आवयभाशेतल्यानच जावपाक जाय. हो जागतीक सिध्दांत जावन आसा. जो भुरगो ती भास सपनेता, जे भाशेंतल्यान तो विचार करता, सहजपणान उलयता. ताका ताचे भाशेचें कोण एक व्याकरण शिकयना, तरी व्यकरणशुध्द उलयता. पूण परकी भाशेचे A टू Z व्याकरण शिकोवचें पडटा. शिक्षणांत बारावी मेरेन आमी कोंकणी विशय सक्तीचो कित्याक लायनात. एनईपी यत्ता 6 वे सावन R1 म्हणजे पयली भास रिजनल लॅग्वेंज, R2 म्हणजे इंग्लीश R3 म्हणजे भारतांतली खंयचीय एaक भास R1 कोंकणी, R2 इंग्लीश, R3 मराठी/हिंदी/संस्कृत/कन्नड खरें म्हणल्यार R1 कोंकणी सक्तीची आसपाक जाय. आनी R3 मराठी /हिंदी/संस्कृत /कन्नड वा खंयचीय देशी भास ही आमी कित्याक आपणावची न्हय.
जेन्ना आमी सरकारी नोकरे खातीर अर्ज करतात तेन्ना कोंकणी भास कळटा म्हणपाचें प्रमाणपत्र गरजेचें आसता. कारण ती गोंय सरकाराक सरकारी नोकरी नीज गोंयकारांकूच मेळपाक जाय हो ताचे फाटलो उद्देश आसा. अशें केल्ल्यान हजारांनी प्रमाणपत्रां कोंकणी अकादेमीन वितरीत केल्यात. पूण 12 वी मेरेन कोंकणी विशय कंपलसरी करीत जाल्यार वेगळ्या प्रमाणपत्राची गरज पडची ना. तेन्ना बेठोच विरोधा खातीर विरोध करचो न्हय, आनी नस्त्या हट्टाहासान R1 आसा थंय मराठी मागची न्हय. मराठी R3 क लागू करची. जेणे करून कोंकणी उरली आनी मराठीय उरली. 35 -36 वर्सांनी म्हणटात तशें शिक्षणीक धोरण बदल्लां ताका आमी येवकार दिवपाकूच जाय.
उपक्रम आधारीत शिक्षण आनी कला कौशल्य बेज शिक्षण. भुरगयाच्या सर्वांगी विकासाचेर भर आसतलो. आठवी मेरेन पास हो नेम केंद्र सरकारान रद्द केला. राज्य सरकार केन्ना लागू करता पळोवया. बाल वाटिका 1 म्हणजे 3 ते 4 वर्सां, बाल वाटिका 2 म्हणजे 4 ते 5 वर्सां, बाल वाटिका 3 म्हणजे 5 ते 6 वर्सां, 6 वर्साचेर भुरगो/भुरगें पयले यत्तेंत वतलें. 6 वे यत्ते सावन विद्यार्थ्याचें वेवसायीक शिक्षण सुरू जाता तें 12 वी मेरेन चलता. 12 वी पुराय जाता म्हणल्यार ताचे कडेन एक दोन स्कील विकसीत जाल्ल्यो आसतल्यो. एनईपी न भुरगो शिक्षणाक वाजेवचो ना, कारण उपक्रमांतल्यान शिक्षण. तेच बराबर णवे यत्ते सावन बोर्ड परिक्षा कंडक्ट करतले. णवे यत्तेंत नापास जालो तरी धावेच्या वर्गांत बसपाक मेळटलें, पूण तीन फावटी णवेची परिक्षा दिवन पेपर सडोवचे पडटले. णवी पास जाल्यारूच धावेची परिक्षा दिवपाक मेळटली. णवे यत्ते सावन 10 विशय 1) R1 प्रादेशीक भाशा, 2) R2 इंग्रजी, 3) R3 खंयचीय देशी भाशा, 4) गणीत, 5) सायन्स, 6) सोशल सायन्स, 7) इंटर डिसिप्लिनरी, 8)वेवसायीक शिक्षण, 9) PE, 10) कला हातूंत चित्रकला, नाट्य, संगीत नाच आनी हेर अशा ह्या धा विशयांचो आस्पाव आसा.
आतां धावी पास जावप सामकें सोंपें तरी पूण भुरगीं नापास जातातूच. कारण 20 गूण स्कुलांतल्यान धाडपाचे आसतात, तातूंत चडशीं हास्कुलां 17-18 गूण धाडटातूच. बोर्डाचे परिक्षेक 80 पैकीं 16 गूण पडटकीच भुरगो पास जाता. तांतूत 7 पैकीं 6 विशय सुटल्यार पुरो. आठवी मेरेन पास ह्या नेमाचो परिणाम विद्यार्थ्यांच्या अभ्यासाचेर बरोच जाल्लो आसता. जायते शिक्षक टायमपास म्हूण नोकरी करतात. तांकां भुरग्यांचे मातूय पडिल्लें आसना. शिक्षकान डेली अपडेट जावचें पडटा. कसलीच तयारी करिनासतना वर्गांत भितर सरतकूच विद्यार्थी बोवाळ करतलेच. कारण शिक्षकूच जेन्ना बेशिस्त वागता, तेन्न विद्यार्थीय तशेच वागतले? राजहंस प्रकाशन पणजी भौ. प्रभाकर भिडेबाब दर वर्सा 100% निकाल आयिल्ल्या हायस्कुलाच्या हेडमास्तराचो आनी धावेच्या भुरग्यांक शिकयतल्या शिक्षकांचो राज्यव्यापी तोखणाय करपी कवतूक सुवाळो घडोवन हाडटा. ही प्रेरणादायी गजाल आसा. ह्या भोवमान सुवाळ्याक वांटेकार जावपाक सगलेच जाण खर कश्ट घेतात.
राजहंसाचो तो सुवाळो म्हणल्यार हेडमास्ताराचो आनी शिक्षकांचो व्हडलो गौरवूच. भिडेबाबाचे आनी त्या राजहंस परिवारचे व्हड उपकार आमी मनपकूच जाय. कारण तो आमची सगल्यांची उर्बा वाडयता. कार्यावळीची आंखणी आनी मांडणी ही देखदिणीं दर एका शिक्षकान देख घे सारखी. दर एका हेडमास्तराक दिसता आपल्या हायस्कुलाचो 100% निकाल येवचो, ते नदरेंतल्यान कांय हेडमास्तर भरपूर यत्न करतात. पूण पालकां कडल्यान आनी विद्यार्थ्या कडल्यान फावो तसो प्रतिसाद मेळना. कांय पालकांक आपल्या भुरग्याच्या फुडाराचे मातूय पडिल्लें आसना. जाल्यार कांय भुरगीं आपल्या पालकांक मातूय किंमत दिनात.
पालकांनी आपल्या घरांत हेल्दी वातावरण दवरपाक जाय. भुरग्यां कडेन संवाद करपाक जाय. घरांत वाचन संस्कृती राबोवंक जाय. सकारात्मक बोध दिवपाक जाय. समाजांत आपलो भुरगो एक बरो नागरीक घडचो म्हूण यत्न करपाक जाय. इतलीं वर्सां आमचे शिकप जें चलतालें तें गुणांक म्हत्व दिवपी आसले. शिक्षक केंद्रीत आसले. परिक्षेंत पास जावपा पुरतेंच शिकप. 33 मार्क पडल्यार पास. 67 मार्काचें म्हाका येना तरी हांव पास. ही पद्दत समा न्हय. भुरगो कितें शिकता हें महत्वांचे नासून भुरगो कसो शिकता हें महत्वाचें. एनइपी न भुरगो आळशी जावचो ना, आनी ड्रॉपावटूय जावचो ना. तो उमेदीन शिकतलो. सगल्या शिक्षकांनी आनी पालकांनी जर सहकार्य दिलें जाल्यार विद्यार्थ्यांचो सर्वांगी विकास सादतलो आनी विकसीत भारत घडोवपाक व्हड आदार जातलो. सगल्यांनी एनईपी धोरणाक आपणावया. ताची आयज गरज आसा. विरोधा खातीर विरोध नाका.

काशिनाथ नायक
9158345844