भांगरभूंय | प्रतिनिधी
राजकारणांत शह, काटशह, दावपेच हे आसतातूच, ताकाच लागून राजकारणांत सगलें माफ म्हणटात.
मोगांत आनी झुजांत सगलें माफ आसता. इंग्लीश साहित्यकार जाॅन लिली (1578) हांचें हें वाक्य. आतां राजकारणांकूय हो नेम लागता. थंय सदां खातीर इश्ट वा दुस्मान नासतात. फुडाऱ्यान चुकीचो वा योग्य निर्णय घेतलो म्हूण तो हारतलो वा जिखतलो हाची खात्री दिवपाक मेळना. फाटोफाट पक्षांतर करपी बरेच फुडारी भोवमतान जिखून आयल्यात. कट्टर विरोधी विचारसरणीच्या पक्षां वांगडा युती करूनय पक्ष जिखल्यात. ‘गोआ के लोग अजिब है’ अशें पं. नेहरून म्हणिल्लें, तें सगल्याच राज्यांक लागता. गोंयांत 50 जाग्यां खातीर जिल्हो पंचायतीची वेंचणूक जातली. वेंचून येवप्यांक व्हडलेशे अधिकार नासले तरी विधानसभेची वेंचणूक आशिल्ले भशेन सद्यां वातावरण तापलां. भाजपाक हारोवपाक काँग्रेस, आप, गोवा फाॅरवर्ड आनी आरजीपी हांची युती जावपाची आशिल्ली. पूण सगल्यांनीच आपापल्यो चुली मांडून आदनूय दवरलां. काँग्रेस आनी गोवा फाॅरवर्डाची मात युती आसतली, अशें तांच्या फुडाऱ्यांनी सांगलां.
‘युती जावची म्हूण आमी निमाणें मेरेन यत्न केल्ले, मात काँग्रेसीचे पाटकार आनी फाॅरवर्डाचे सरदेसाय हांकां ही युती नाका आशिल्ली. दोगांयकूय काँग्रेसीच्या फुटिरांक आडमार्गान परत हाडून मागीर तांकां भाजपाक विकपाचे आसात,’ असो आरोप आरजीपीचे अध्यक्ष मनोज परब हांणी काल केलो. गोवा फाॅरवर्डा वांगडा जाग्यां विशीं उलोवप करून काँग्रेसी कडेन उलोवपाक गेल्ले. थंय काँग्रेस 37 आनी आरजी 13 अशे जागे थारिल्ले. फुटिरांक धांवडायना जाल्यार फाॅरवर्डाक युतींतल्यान भायर दवरपाक काँग्रेस तयार जाल्ली, पूण पाटकार आनी सरदेसाय हांकां ही युती नाका आशिल्ली, असो आरोपूय परब हांणी केलो. काँग्रेस समिती बदलीत जाल्यार आमी विधानसभा वेंचणुकेक युती करपाक तयार आसात, अशें तांणी सांगलां. राजकारणांत शह, काटशह, दावपेच हे आसतातूच, ताकाच लागून राजकारणांत सगलें माफ म्हणटात. मनोज परब हांणी वयल्या दोगूय फुडाऱ्यांचो ‘भाटकार’ आनी आपलो ‘भोवजन समाजां’तले भुरगे असो उल्लेख केलो. तुमची बुद्द तकलेंत आसा, पूण आमची बुद्द धोंपरांत आसा, अशें समजूं नाकात, अशेंय म्हणलें. प्रत्यक्ष जातीचो उल्लेख करिनासतना केल्ल्या ह्या वक्तव्याचो भोवजन समाजाक पक्षा कडेन आकर्शीत करपाक उपेग जातलो, अशें कांय जाणांक दिसता. मात, आतां भाटकार, भोवजन समाजाचे फुडारी सगल्याच पक्षांनी आसात. 40- 50 वर्सां पयलींची अर्थीक, समाजीक, शिक्षणीक परिस्थितीय आयज उरूंक ना. अमक्याच समाजाचे अशे पक्षूय उरूंक नात. सगले सगले कडेन आसात. युती तुटिल्ल्याचे तिडकीन मनोज परब तशें उलयले काय ताचे फाटल्यान राजकी दावपेच बी आसात?
आमच्या भारतांत 1950 वर्सा 4147 जाती, उपजाती नोंद जाल्ल्यो. सोशियो इकाॅनाॅमिक्स अॅण्ड कास्ट सेन्सस 2011 त लाखभर लाख जाती, उपजातींची नोंद जाल्या, अशें म्हणटात. हे आंकडे भौशीक जावंक नात, ते विस्वास दवरपा सारकेय नात. पूण जातींक समाजाच्या कांय मळाचेर आनी राजकारणांत खूब म्हणजे खूबच म्हत्व आयलां. अर्थांत तें कित्याक तें वेगळें सांगपाक नाका. जाती नश्ट जावन सगले एक जावचे, हे खातीर रगत आटयिल्ल्या समाजसुदारकांचें हें अपेस म्हणपाचें?
भाजपाक भोवमत आसा. तांचे वटेन 33 आमदारूय आसात. म्हणटकच जिल्हो पंचायत वेंचणुकेंत तांकां सहज 30 तरी जागे मेळटले असो जाणकारांचो अदमास. भाजपाक उणें जागे मेळ्ळे जाल्यार तें अजापूच. विरोधी पक्षांची विचारधारा सादारण एकसारकीच आसा. युती नाशिल्ल्यान मतां वांटून वतलीं, ताचोय फायदो भाजपाक जातलो. अर्थांत, खेळां प्रमाण राजकारणांतूय कोण जिखत, हारत हें सांगपाक येना. निकाल लागसर वाट पळोवया. पूण, राजकारणांत सगलें माफ आसलें तरी जातीय वक्तव्याक लागून तणाव जावचो न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
