भांगरभूंय | प्रतिनिधी
६ विरोधी आमदारां कडल्यान विजयाचेर फिक्सिंगचो आरोप
पणजी : कॉंग्रेस, आप, आरजी आनी गोवा फॉरवर्ड ह्या विरोधी आमदारां मदीं फूट पडिल्ल्यान आयज अधिवेशन तहकूब केले उपरांत सिद्ध जालें. सरकारा कडेन सॅटींग कांय कमांडर आसात, असो आरोप विरोधी पक्ष फुडारी युरी आलेमाव हांणी केलो. आमच्या ६ जाणां वांगडा विजय सरदेसाय आमचे वांगडा ना. हाचोच अर्थ कोणी सॅटींग केलां हें स्पश्ट जाता, अशें आमदार विरेश बोरकार हांणी म्हणलें.
फोंडें पोटवेंचणुकेंत आचारसंहितेक लागून आयज विनियोग विधेयक संमत करून अधिवेशनाचो समारोप केलो. हाका विजय सरदेसाय सोडून हेर विरोधी आमदारांनी पत्रकारां कडेन उलयतना हरकत घेतली. ह्यान पयलीं पोटवेंचणूक अधिवेशनां जाल्यांत. सभाघर सर्वोच्च आशिल्ल्यान अधिवेशन सूरू उरपाक कसलीच हरकत नाशिल्ली. विनियोग विधेयक चर्चे बगर संमत जावपूय लोकशायेचो खून जावन आसा. सरकारा वांगडा सॅटींग करपी कांय कमांडरांचो हातूंत हात आसा, असो आरोप युरी आलेमाव हांणी केलो.
विवीध प्रस्न तशेंच समस्याचेर चर्चा करपा खातीर अधिवेशन सूरू उरपाची गरज आशिल्ली. आमी खाजगी विधेयकांचो मुद्दो मांडलो तेन्नाच एकल्यान आचारसंहितेचा मुद्दो मांडलो. ६ विरोधी आमदारां वांगडा आमचे मदीं विजय सरदेसाय ना. हाका लागून कोण फिक्सींगांत आसा हें स्पश्ट जाता, अशें विरेश बोरकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
