भांगरभूंय | प्रतिनिधी
रामा हल्लांतल्या सुत्रधाराक धरपाचे मागणे खातीर आंदोलन
मास्टरमायंडाक धरपाचें शिश्टमंडळाक मुख्यमंत्र्यांचें आस्वासन
आंदोलकांनी आडायलो बांदोडकार मार्ग, येरादारीची कोंयडी
भांगरभूंय । प्रतिनिधी
पणजी : शुक्रारा पणजी पेटून उठली. रामा काणकोणकार हांचेर हल्लो करपी हो मास्टरमायंड कोण हाची जाप मुख्यमंत्री डॉ. प्रमोद सावंत हांकां विचारपा खातीर समाज वावुरपी आनी विरोधी आमदारांनी पणजे शारांत खवदळ घातलो. आंदोलकांनी दयानंद बांदोडकार मार्ग आडावन दिवरिल्ल्यान पुराय पणजी शारांत येरादारीची कोंयडी जाली. उपरांत मुख्यमंत्री डॉ. प्रमोद सावंत हांणी आंदोलकांच्या शिश्टमंडळाची भेट घेवन मास्टरमायंडाक सोदून काडपाचें आस्वासन दितकत परिस्थिती शांत जाली.
रामा काणकोणकार हांचेर दिसा उजावाडा जाल्ल्या हल्ल्याचो निशेध करपा खातीर आझाद मैदानाचेर समाज वावुरप्यांनी सभा आपयल्ली. हे सभे वेळार व्हडा संख्येन समाज वावुरपी, विरोधी पक्ष फुडारी युरी आलेमांव, गोवा फॉरर्वडचे आमदार विजय सरदेसाय, आम आदमी पक्षाचे आमदार वेन्झी व्हिएगस, रेव्ह्युलेशनरी गोवन्स पक्षाचे आमदार विरेश बोरकार, दक्षीण गोंय खासदार विरियातो फर्नांडीस आनी हेर राजकी पक्षाचे फुडारी हजर आसले.
आझाद मैदानाचेर जाहीर सभा सोंपले उपरांत ह्या हल्ल्याची सुपारी दिवपी मास्टर मायंड कोण हाची जाप पुलीस म्हासंचालकांक विचारपा खातीर पुलीस मुख्यालया कडेन वचून घेराव घातलो. पुलीस म्हासंचालक मेळना म्हूण मास्टरमायंड कोण हाची जाप विचारपा खातीर तांणी आपलो मोर्चो मुख्यमंत्र्याच्या आल्तिना वयल्या सरकारी बंगल्यार घुंवडायलो. पूण पुलिसांनी तांकां थंयच आडयले. पूण आंदोलक विरोधी आमदारांच्या बळग्यार फुडें सरले आनी पणजी चर्च स्क्वेराचेर वचून रस्तो आडयलो आनी मुख्यमंत्र्या आड घोशणा दिवपाक सुरवात केली. मुख्यमंत्र्या कडल्यान कसलोच प्रतिसाद मेळूंक नाशिल्ल्यान तांणी आपलो मोर्चो दयानंद बांदोडकार मार्गाचेर घुंवडायलो. थंय पोरणें सचिवालय ते पाटो पुला मजगतीचो मुखेल रस्तो आडोवन दवरलो आनी मुख्यमंत्र्यांचे भेटीची मागणी केली.
उपरांत पुलीस अधिक्षक राहुल गुप्ता घडणूक थळाचेर पावले आनी परिस्थिती नियंत्रणांत हाडपाचे यत्न केले. मुख्यमंत्री आंदोलकांची भेट घेवपाक तयार आसा अशें सांगले उपरांत सगळे आंदोलक मुख्यमंत्र्याच्या बंगल्यार पावले. पूण बंगल्यार पावतकत फक्त आंदोलकांच्या एका शिश्टमंडळाक भितर धाडपाक मुख्यमंत्र्यान सांगलें. पूण मुख्यमंत्र्यान सगळ्या आंदोलका मुखार येवन जाप दिवची ही मागणी नेटान लावन धरली. कांय बोवाळा उपरांत आमदार आनी आंदोलकांचें शिश्टमंडळ मुख्यमंत्र्याक वचून मेळ्ळें.
बसके उपरांत म्हायती दितना शिश्टमंडळान सांगलें, आमची भेट घेतले उपरांत मुख्यमंत्री गोंय वैजकी महाविद्यालयांत वचून रामा काणकोणकार हांचे भलायकेची खबर घेतले. ह्या हल्ल्यांत कोण मास्टर मायंड आसा ताका दोन दिसां भितर धरपाचें आस्वासन मुख्यमंत्र्यान दिलां. तशेंच पुलीस अधिक्षक राहुल गुप्ता हांणी कांय वेळ मागला आनी ह्या प्रकरणा विशीं मिडिया वरवीं दर 24 वरां भितर अपडेट दिवपाचें आस्वासन दिलां, अशें शिश्टमंडळान सांगलें.
आंदोलकांच्यो मुखेल मागण्यो
जे जामिनाचेर सुटल्यात तेच रामा काणकोणकार हांचेर हल्लो करपी हल्लेखोर आसात. तांचेर राष्ट्रीय सुरक्षा कायदो (एनएसए) खाला कारवाय करची. हल्लेखोरांचेर कलम 307 लावचें. हल्लेखोरांक गोंया सावन तडीपार करचे. हल्ल्याचो व्हिडियो ट्रेक करून ह्या हल्ल्या फाटल्यान आशिल्ल्या मास्टरमांयडाक धरचो. रामा काणकोणकार आनी तांच्या कुटुंबियांक पुलीस संरक्षण दिवचें. राजकारणी आनी गुंडा मदले संबंद सोदून काडपा खातीर टास्क फोर्साची थापणूक करची.
सभेंत पडले दोन गट
आंदोलना वेळार समाज वावुरप्यां मदीं एकवट नाशिल्ल्याचें दिसून आयलें. कांय जाण विरोधी आमदारांचेर टिका करपाक लागले. सभा चालू आसतनाच जेन्ना आमदारांनी भाशणां करपाक सुरवात केली तेन्ना हे सभेंत राजकारण कित्याक, असो प्रस्न उपस्थीत करून कांय जाणांनी बोवाळ घातलो. उपरांत हे सभेंत दोन गट जाले आनी किजिलां पेटून तणाव निर्माण जालो. पुलिसांनी उपरांत हस्तक्षेप करून वाद सोंपयलो.
विरोधी आमदार आनी आंदोलकांचें पेटलें
चर्च स्क्वेरा कडल्यान आंदोलक जेन्ना मुख्यमंत्र्याच्या बंगल्या कडेन वताले तेन्ना वेन्झी व्हिएगश हांणी एक कदंबची ईव्ही बस आडयली आनी ड्रायव्हराक बस मुख्यमंत्र्याच्या बंगल्या कडेन व्हरपाक सांगलें. उपरांत विजय सरदेसाय बशींत चडले आनी बस मुख्यमंत्र्याच्या बंगल्या कडेन व्हरपाचो आग्रो केलो. पूण ह्या प्रकारा वयल्यान समाज वावुरपी खुबळ्ळे. आमदार बशीन वता जाल्यार सामान्य लोकांनी चलत कित्याक वच्चें? आमदारांनीय आमच्या वांगडा चलत वच्चे, अशी मागणी केली. ह्या वेळार विजय सरदेसाय आनी वेन्झी व्हिएगश हांचें आंदोलकां कडेन तोंडाक तोंड लागलें. आंदोलना वेळार वेन्झी व्हिएगश आनी युरी आलेमांव हांची समाज वावुरप्या वांगडा झटपट जाली.
आंदोलनाचो सगल्यांकूच त्रास
आंदोलनांत दयानंद बांदोडकार रस्तो आडावन दवरिल्ल्यान पुराय शारांतली येरादारीक ब्रेक लागलो. रस्त्यार गाडयांच्यो रांको लागून कोंयडी जाली. आंदोलकांनी प्रवाश्यांक धमकोवपाचो यत्न केलो. शाळा सुटपाच्या वेळार हें आंदोलन जाल्ल्यान भुरगीं उपाशीं उरलीं. तशेंच जें दुयेंत हॉस्पिटलांनी वचपी आसले तांका लेगीत आंदोलकांनी वाट सोडूंक ना. पर्यटकांचीं विमानां चुकलीं. जेन्ना पर्यटक आनी गरजू प्रवाशी आंदोलकां कडेन विनवणी करपाक आयले तेन्ना आंदोलकांनी तांकां धमकावन धांवडावन घातले. पुलिसांनी हातूंत हस्तक्षेप केलो, पूण आंदोलकांनी पुलिसां कडेन धक्काबुक्की केली.
भाजपा कार्यालय लक्ष्य
आल्तीन मुख्यमंत्र्यांच्या बंगल्या कडेन वतना आंदोलकांनी भाजपाचें कार्यालय लेगीत लक्ष्य केलें. भाजपान हे विशीं खर आक्षेप घेतला. भाजप गोंय हांणी आपल्या फेसबूक पोस्टा वरवीं बरयलां, फुकट प्रसिध्दी खातीर अपेसी राजकी पक्षाच्या काय मुठभर वांगड्यांनी भाजपाच्या कार्यालयाचेर हल्लो केलो. तुमका आंदोलन करपाचें आसत जाल्यार प्रतिश्ठेन करात. हिंसा आनी गुंडागिरी करून न्हय. आमची गोंयांत चार लाख वांगड्यांचें आनी देशांत 14 कोटी वांगड्याचें बळिश्ट कुटुंब आसा. दोन फावटीं चितात आनी फुडाराक जापसालदारकेन वागात.
हल्लो करपी जे आसात तांकां कलम 307 लावचें, एनएसए कायदो लावचो आनी तडीपार करपाच्या शिश्टमंडळाचे मागणेचेर विचार करतले. तशेंच गँगवॉर 100 टक्के गोंयांतल्यान काबार करपा खातीर आमी पुलिसांक मेकळीक दिल्या. पुलीस फोन ट्रॅक करपाचे प्रक्रियेंत आसात आनी मास्टर मायंड बेगिनूच मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
