भांगरभूंय | प्रतिनिधी
बर्च, कॅश फॉर जॉब, युनिटी मॉल मुददे केले उपस्थीत
भांगरभूंय । प्रतिनिधी
पणजी : बर्च दुर्घटणा, कॅश फॉर जॉब तशेंच युनिटी मॉलाच्या प्रस्नाचेर विरोधी आमदारांनी सरकाराक कातरेंत धरपाचो यत्न केलो. बर्च दुर्घटणेचेर सभाघरांत चर्चा जाली नासली तरी राज्यपालांच्या अभिभाशणाचेर उलयतना विरोधी आमदारांनी हो मुद्दो मांडलो.
पांच दीस चलिल्या शिंयाळ्या अधिवेशनाचो समारोप शुक्रारा 16 जानेवारीक जालो. पयल्या दिसा फक्त राज्यपालांचें अभिभाशण जाल्ल्यान कामकाज फक्त चार दीस चल्लें. चार दिसांच्या कार्यकाळांत उणो वेळ आसून लेगीत सगल्या विरोधी आमदारांनी कामकाजांत वांटो घेवन सरकाराचेर टिका केली. बर्च बाय रोमियो लेन क्लबाक 6 डिसेंबरचे रातीक लागिल्ल्या उज्याक लागून 25 जाणाक मरण आयलें. हाचेर चर्चा करपाची मागणी विरोधी आमदारांनी राज्यपालांच्या अभिभाशणा वेळारूच केली. ही मागणी मान्य जावंक नाशिल्ल्यान विरोधी आमदारांनी सभाघराच्या हौदांत प्रवेश केलो. अभिभाशणा वेळार विरोधी आमदारांनी घोशणाबाजी केली. हाका लागून मार्शला वरवीं तांकां सभाघरा भायर काडले. बर्च दुर्घटणे प्रकरणांत राज्यपालांनी फक्त दुख्ख उक्तायलें. सभाघरांत बर्च दुर्घटणेचेर खासा अशी चर्चा जावंक ना.
सत्ताधारी आमदार मायकल लोबो हांची ह्या विशयाचेर लक्षवेधी सुचोवणी कामकाजात दाखल जाल्ली. मात लक्षवेधी सुचोवणी चर्चेक येवच्या वेळार ते गैरहाजीर रावले. हाका लागून बर्चा वयली लक्षवेधी सुचोवणी चर्चेक येवपाक पावली ना. तरी लेगीत विरोधी पक्ष फुडारी युरी आलेमांव, कार्लुस फेरेरा, गोवा फॉरवर्डाचे विजय सरदेसाय हांणी अभिभाशणा वयले चर्चेंत वांटो घेतना बर्चाचो मुद्दो मांडलो. बर्च दुर्घटणेची सरकारान दंडाधिकाऱ्या वरवीं चवकशी केल्ली. हो चवकशी अहवाल उक्तो करपाची मागणी विरोधी आमदारांनी केली. बर्च दुर्घटणेचो विशय हो न्यायप्रविश्ट आसा. तपास जावन आरोपपत्र दाखल करपाचे आसा. दोशींचेर कारवायेचे प्रक्रिया सुरू आसा. कोणूच दोशी सुटचो ना, अशें आस्वासन मुख्यमंत्री डॉ. प्रमोद सावंत हांणी चर्चेक जाप दितना दिलें. बर्च दुर्घटणा विशयाचेर सभाघरांत खाशेली चर्चा जावंक नासली तरी अभिभाशण चर्चे वेळार हो मुद्दो विरोधकांनी मांडलो.
कॅश फॉर जॉब प्रकरणांतली दुबावीत पूजा नायक हिच्या आरोपाक लागून ह्या प्रकरणाची बरीच चर्चा जाल्ली. प्रस्न जापेच्या वरांत तशेंच लक्षवेधी सुचोवणे वेळार हो मुद्दो विरोधकांनी मांडलो. युरी आलेमांव तशेंच हेर विरोधकांनी बरोजगारीच्या विशयाचेर लक्षवेधी सुचोवणी मांडिल्ली. कॅश फॉर जॉब प्रकरणांत पुराय चवकशी जावन कागाळदारांचे पयशें परत दिवचे, अशी मागणी चर्चे वेळार जाली. न्यायालयाच्या आदेशा उपरांत नोकरे खातीर जांणी पयशें दिल्यात, तांचे पयशें परत दितले, अशें आस्वासन मुख्यमंत्री डॉ. प्रमोद सावंत हांणी दिलें.
विरोधकां वतीन विजय सरदेसाय हांचे सगल्यांत चड 68 प्रस्न
शिंयाळी अधिवेशनांत विरोधी आमदारां वतीन विजय सरदेसाय हांणी सगल्यांत चड 68 प्रस्न विचारले. हाचे उपरांत युरी आलेमांव 67, वेंन्झी व्हिएगश हांणी 61, क्रुज सिल्वा हांणी 64, विरेश बोरकार 43, एल्टन डिकोस्ता 32 जाल्यार कार्लुस फेरेरा हांणी 56 प्रस्न विचारले. हातूंत तारांकीत आनी अतारांकीत प्रस्नांचो आस्पाव आसा.
क्रुज सिल्वा, विजय सरदेसाय, विरेश बोरकार, युरी आलेमांव, वेंझी व्हिएगश हांणी दरेकी 4 शुन्य वराक मुद्दे मांडले. हाचे उपरांत एल्टन डिकोस्ता हांणी 3 जाल्यार कार्लुस फेरेरा हांणी शुन्य वराक 1 मुद्दो उपस्थीत केलो. आमदाराक दिसाक चडांत चड शुन्य वराक एक मुद्दो मांडपाक मेळटा. क्रुज सिल्वा, विजय सरदेसाय, विरेश बोरकार, युरी आलेमांव, वेंन्झी व्हिएगश हांणी दर दिसा एक मुद्दो शुन्य वराक मांडलो. विरोधी आमदारां वतीन सादर जाल्या 4 लक्षवेधी सुचोवण्यांतल्यो 3 सुचोवण्यो ह्यो सगल्यांनी मेळून दाखल केल्यो. हातूंत बेरोजगारी आनी कॅश फॉर जॉबचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
