विरोधकांचो एकवट फोडपाक भाजपाक येसः विजय सरदेसाय

भांगरभूंय | प्रतिनिधी

भांगरभूंय । प्रतिनिधी
पणजीः राज्यांत विरोधकांचो एकवट फोडपाचो भाजपाचो प्रयोग येसस्वी जालो. गोंयची जनता हुशार आसा. वेंचणूक येता मेरेन कोणी एकवट मोडला, कोणाक मत दिवचें हाचो निर्णय घेवन लोक योग्य तो न्याय दितले. युती फुटपा फाटल्यान जाल्ले घडणुकेचो नियाळ घेवन लोकांनीच विचार करचो, असो उलो गोवा फॉरर्वडचे अध्यक्ष विजय सरदेसाय हांणी मारला.
गोवा फॉरर्वडचे झेडपी उमेदवार कृष्णा परब हांणी उमेदवारी अर्ज दाखल केलो. ह्या वेळार उलयतना विजय सरदेसाय हांणी सांगलें, गोंयकारांक जो एकवट जाय तो घडोवन हाडपाक आनी लोकांक दाखोवपा खातीर आरजीपीक बरोबर हाडपाचो फुडाकार हांवेन पयली घेतिल्लो.
भाजपाकडे संसाधन खूब आसा. हो एक व्हडलो पक्ष, तो सादो पक्ष न्हय. भाजप फाल्यां भावा भितर केस्तांव घडोवपाक शकता. घरा भितर फुट हाडपाक शकता. गोंयात विरोधकांचो एकवट फोडपाचो प्रयोग भाजपान येसस्वी केला. पूण हो एकवट फोडलो म्हूण कांय जावचे ना. गोंयची हुशार जनता वेंचणूके मेरेन कोणाक मत मारप वा कोणें एकवट मोडला ते पळयतले आनी फावो ताका न्याय दितले ही म्हाका खात्री आसा, असो विश्वास सरदेसाय हांणी उक्तायलो.
लोकांक एकवट जाय म्हणून हांवेन हो फुडाकार घेतलो. उपरांत खुबश्यो घडामोडी जाल्यो. आता दिसून येता की काँग्रेसीच्या हायकंमडान आरजी वांगडचे एक पर्व सोंपला अशें सांगला. हो पर्व सोंपपा फाटल्यान जो घडणुको जाल्यात ताचो नियाळ घेवन आनी हाका जापसालदार कोण हे विशींचो निर्णय लोकांनी घेवचो. हांवेन एकवटा खातीर फुडाकार घेतिल्लो आनी हो एकवट आताय आनी वेंचणूके उपरांतय आसतलो, अशें सरदेसाय हांणी सांगलें.
हे आघाडीत काँग्रेस हो वरीश्ठ घटक आसा. आघाडीची घोशणा ही काँग्रेसीनच करची हांवेन न्हय. हांव विरोधकां मदीं वरीश्ठ आमदार आसपाक शकता, एक बरो मागपी आसपाक शकता. पूण हांव आघाडीचो वरीश्ठ घटक न्हय. हांव म्हजे उमेदवारांक जिखोवन हाडपा खातीर कितें करपाक शकता हाचेर हांव उलोवपाक शकता, अशें स्पश्टीकरण सरदेसाय हांणी दिले.
विजय सरदेसाय हांणी काँग्रेसीतल्या फुटून भाजपात गेल्ले पक्ष फुटीरांक फाटल्या दारांतल्यान परत येवकार दिला हे आरजीपीच्या आरोपांचेर जाप दितना सरदेसाय हांणी सांगलें, की प्रादेशिक पक्षाची माची ही पक्ष फुटीरांक वापरची न्हय हे आरजीच्या मतांचे हांव समर्थन करता.