भांगरभूंय | प्रतिनिधी
कर्मचारी संघटणे कडल्यान आयोगा वतीन कर्मचारी निवडीक येवकार
पणजी : कर्मचारी भरती आयोगा वतीन आतां मेरेन १११७ उमेदवारांची सरकारी नोकरे खातीर निवड जाल्या. निवड जाल्ले उमेदवार मंत्र्यांच्याच मतदारसंघांतले वा शारी वाठारांतले ना, विरोधकांच्या मतदारसंघांतल्या उमेदवारांकूय व्हडा प्रमाणांत संदी मेळ्ळ्या. तशेंच प्रियोळ, सांगें, काणकोण, पेडणें, मांद्रें, मयां ह्या गांवगिर्या मतदारसंघांतल्या बेरोजगारांचीय नोकरे खातीर निवड जाल्या. फक्त गुणवत्ता आनी पारदर्शकतेचेरुच आदारीत निवड जाल्ल्यान राज्यांतल्या सगल्या तरणाट्यांक नोकरेची संद मेळ्ळ्या.
अखील गोंय कर्मचारी संघटणेचे अध्यक्ष अभय मांद्रेंकार आनी आदले अध्यक्ष जॉन नाझारेथ ह्या दोगांनीय हे प्रक्रियेक येवकार दिलो. कर्मचारी भरती आयोगाक लागून आतां राज्यांतल्या सगल्यांक नोकरेची समान संद मेळटा. तशेंच गुणवान आनी पात्र उमेदवारांचीच सरकारी नोकरेंत भर जाता. हाका लागून विवीध खात्यां कडल्यान जनतेक दर्जेदार, प्रामाणीक सेवा मेळप शक्य जातलें, अशें अभय मांद्रेंकार हांणी म्हणलें.
सरकारी नोकरी म्हणल्यार वशिलेबाजी, मंत्र्यांचे मर्जेन वा तांच्याच मतदारसंघांतल्या तरणाट्यांक सरकारी नोकरी मेळटा, असो समज रूढ जाल्लो. आयज मेरेनचो अणभव पळयल्यार हो समज बरेच तरेन बरोबरूय आशिल्लो. मात कर्मचारी भरती आयोगाक लागून हो समज सामको चुकीचो थारला. आयोगा वतीन निवड जाल्ले उमेदवार सगल्या मतदारसंघांतले आसात. फोंडें मतदारसंघांतल्यान सगल्यांत चड ६३ जाणांची निवड जरी जाल्या तरी गांवगिरो मतदारसंघ आशिल्ल्या प्रियोळांतल्यान ६० जाणांची निवड जाल्या.
कुंकळ्ळी, हळदोण्यां आनी केपें हे मतदारसंघ कॉंग्रेसी कडेन आसात. ह्या मतदारसंघांतल्यान २८, १२ आनी ४५ जाणांक नोकर्यो मेळ्ळ्यात. आरजीचे विरेश बोरकार आमदार आशिल्ल्या सांत आंद्रे मतदारसंघांतल्यान १९ जाणांची निवड जाल्या. फातोड्ड्यां (गोवा फॉरवर्ड) मतदारसंघांतल्यान १० जाल्यार बाणावले आनी वेळ्ळी मतदारसंघांतल्यान ३ आनी ७ उमेदवारांची निवड जाल्या.
खात्यांची कार्यक्षमता वाडटली
कर्मचारी भरती आयोगा वरवीं कर्मचार्यांची भरती जाल्ल्यान सगल्यांक नोकरेची समान संद मेळ्ळ्या. फक्त गुणवत्तेक प्राधान्य मेळिल्ल्यान खात्यांची कार्यक्षमता नेटान वाडोवपाक मजत जातली. फकत विवीध खात्यांत जायतीं वर्सां जीं नोकरी करतात, तांकां योग्य वेळार बडटी मेळपाक जाय. तांचेर अन्याय जावपाक जायना. -अभय मांद्रेंकार, अध्यक्ष, अ. गो. कर्मचारी संघटना
देखून हेरांक नोकरी मेळना
कर्मचारी भरती आयोगा वरवीं कर्मचार्यांची भरती जाल्ल्यान फक्त गुणवान उमेदवारांक न्याय मेळटा. फकत एलडीसी पदा खातीर वकील तशेंच उच्च शिक्षा विभूशीत उमेदवार अर्ज करतात. हाका लागून धावी, बारावी जाल्ल्यांक नोकरेची संद मेळना. हे खातीर अदीक शिक्षणीक पात्रताय आशिल्ल्या उमेदवारांक एलडीसी पदा खातीर अर्ज करपाचेर निर्बंध घालपाक जाय. -जॉन नाझारेथ, आदले अध्यक्ष, सरकारी कर्मचारी संघटणा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
