भांगरभूंय | प्रतिनिधी
दिल्ली विधानसभा वेंचणुकेंत भारतीय जनता पक्षा खातीर एक लाख कोटींचो ‘आयकर’ प्रस्ताव मास्टरस्ट्रोक थारलो अशें हांवें म्हज्या फाटल्या सप्तकांतल्या लेखांत म्हणिल्लें. जालेंय तशेंच. दिल्लींत भाजपाचो ‘न भूतो न भविष्यती’ अशें म्हणूंक येतलें अशा जैताची आनिकूय कारणां आसूं येतात, पूण एक लाख कोटीचो मास्टरस्ट्रोक निर्णायाक थारलो हाचे कडेन कोणाचें दुमत नासुये. दिल्लींतल्या भाजपाच्या जैतां फाटलीं कारणां खूबशीं आसलीं तरी समेस्त राजकारण्यांच्या दोळ्यांत झणझणींत अंजन घालपी हें जैत थारुये हातूंत दुबाव ना. भारताच्या राजधानीतली सत्ता हातासपा खातीर प्रधानमंत्री नरेंद्र मोदी हांकां दुसरो जल्म घेवचो पडटलो अशी अहंकाराची भाशा उलोवपी अरविंद केजरीवाल हांकां आतां दिल्लींत परतून सत्तेर येवपा खातीर घडये नवो जल्म घेवचो पडटलो अशी वेळ दिल्लींतल्या मतदारांनी तांचेर हाडिल्ली दिसता. दिल्लींतली आम आदमीचो भक्कम असो गड भाजपाच न्हय जाल्यार हेर खंयच्याय राजकी पक्षाक भेदूंक येवचो ना अशी काल पयर मेरेनची थंयची एकूण परिस्थिती आसतना अरविंद केजरीवाल हांच्या शिशमहल रुपी घराचे वांशे घुंवलेच कशे हाचेर विश्लेशण करतना आतां खूब कितें बरोवंक येतलें. पूण ज्या मतदारांनी दिल्लीत निमाणें ‘अशक्यही शक्य’ केलें तांकां सलाम करचोच पडटलो. जैत हातासपा खातीर सुमार तीस पस्तीस सुवातांचो फरक भरून काडपा खातीर जाय आशिल्ली इर्शा, जिद्द, धमक आनी इत्साशक्तीचें अनोखें अशें दर्शन ह्या वेळार भाजपाच्या टिमीन दाखयलें आनी सुमार सत्तावीस वर्सां उपरांत दिल्लीची गादी निमाणें काबीज केली.
हरियाणा आनी महाराष्ट्र हीं दोन राज्यां परतून जिखले उपरांत एके नवे इर्शेन नरेंद्र मोदी आनी अमीत शाह हांच्या फुडारपणा खाला भारतीय जनता पक्षान अरविंद केजरीवाल हांचे दिल्लीचेर स्वारी करतना अर्थांतूच हातचे कांयच राखून दवरूंक ना. एक लाख कोटीच्या महसुलाचेर यमुनेचें उदक सोडपाचो केंद्र सरकाराचो निर्णय ते पैकींच एक आशिल्लो. दिल्लीची गादी जिखपा खातीर हातचे कांयच राखून दवरिनासतना मतदारांच्या बोल्सांत सगलेच कितें उडोवपाचो घेतिल्लो निर्णय रामबाण थारलो आनी दिल्लीची गादी काबीज केली. लोकसभा वेंचणुकेंत भारतीय जनता पक्ष खूबशा प्रमाणांत फाटीं पडिल्लो. ताका लागून आम आदमी, काँग्रेसी सयत मुखेल विरोधी पक्ष आक्रमक जाल्ले दिसून येताले, पूण आतां मध्य प्रदेश, हरयाणा, महाराष्ट्र हीं राज्यां फाटोफाट जिखले उपरांत दिल्ली जिखप तितलेंच उरिल्लें. दिल्लीय आतां भाजपाच्या बोल्सांत गेल्ल्यान लोकसभा वेंचणुकेंत ‘पिछेहाट’ फाटीं पडल्या आनी एका नव्याच ताकदीन भाजपाचे झुजारी पाटण्याचेर परतून बावटो हुबोवपा खातीर कूच करपाचे तयारेंत सद्या सज्ज जाल्यात. लोकसभा वेंचणुकेंत मेळिल्ल्या धपक्यांतल्यान भाजपा आतां पुरायपणान सांवरल्या अशेंय तांच्या दिल्लींतल्या जैता उपरांत म्हणूंक येतलें. देशांत चडशा म्हणल्यार वीस बावीस राज्यांनी सत्तेर आशिल्ल्या भाजपाक राजधानी दिल्ली जिखूंक येवची न्हय हें एके तरेन भाजपाच्या फुडारपणा खातीर मोटें आव्हान जावन राविल्लें.
अरविंद केजरीवाल जाल्यार दिसानदीस गब्बर जायत चल्ल्यात काय कितें अशें दिसपा सारको माहोल देशभर तयार जाल्लो. सगल्यो भानगडी करून लेगीत अरविंद केजरीवाल नरेंद्र मोदी आनी तांच्या भाजपाचो जे भाशेंत समाचार घेताले ते पळयत जाल्यार लोकांकूय दिसतालें की भाजपा खातीर ‘दिल्ली तो बहुत दूर है’. पूण उपरांतूय अरविंद केजरीवाल आनी तांच्या पंगडाक जो धडो दिल्लीच्या लोकांनी शिकयलो ताची चर्चा आतां अजून खूब तेप मेरेन चालूच उरतली.
दिल्लीतल्या जैतान भाजपान कितें साद्य केलें हाचेरूय खूब कितें सांगूंक येतलें, पूण दिल्लीच्या लोकांनी जो कितें संदेश हातूंतल्यान दिला तो खूब म्हत्वाचो आसा. दिल्लींतल्या ह्या जैतान भाजपाक राजकी नदरेन आनीक घटमूट करपाचें काम केलां अशें निश्चीतपणान म्हणूंक येतलें. कारण राजधानींत भाजपाचें सरकार नाशिल्ल्यान तांच्या आंतरराष्ट्रीय प्रतिमेचेर तो एक दागूच थारिल्लो. निमाणें मुश्कीलपणान कांय जायना हो दाग पुसून उडोवपाक प्रधानमंत्री नरेंद्र मोदी हांकां येस आयलें. केंद्रांत सत्तेर येत सावन फाटलीं धा बारा वर्सां भाजपान ते खातीर खूब यत्न केले. निमाणे केजरीवाल आनी तांच्या इश्ट पक्षांनी मेळूनच तांकां मजत केली हें कोणूच न्हयकारूंक शकचो ना. अरविंद केजरीवाल हांचो शिशमहल भाजपाचें सरकार आतां केजरीवालांनी केल्ल्या भ्रश्टाचाराचें स्मारक म्हूण खास संवर्धन करतले काय आनीक कितें हें रोखडेंच कळटलें. ते विशीं कसलोय निर्णय घेतलो तरी केजरीवाल हांचें स्मारक म्हणूनच लोक ताचे कडेन पळयतले.
काँग्रेस पक्ष आनी त्या पक्षाचे फुडारी राहूल गांधी हांच्या राजकी फुडाराचेरूय दिल्लीतल्या मतदारांनी म्होर मारली. दिल्लीच्या रणांगणाचेर आम आदमी आनी काँग्रेस हे इश्ट पक्ष एकामेकां आड उबे रावले तेन्नाच ताचो थोडोभोव लाव तिसऱ्या पक्षाक म्हणल्यार भाजपाकूच जावंक शकतलो असो जो आशावाद आशिल्लो तो खरो थारलो, आनी काँग्रेसीन उण्यांत उण्यो सात सुवातो तांच्या बोल्सांत उडयल्यो. भाजपान तसो नेट लायिल्लोच आशिल्लो, तातूंत अनअपेक्षीत रितीन काय जायना काँग्रेसीन मजत केली आनी ती निर्णायाक थारली. विरोधकांनी लोकसभा वेंचणुके वेळार वाजयत गाजयत तयार केल्ल्या भाजप विरोधी आघाडीचें अक्षरशा बँड वाजलें आनी फुडली पांच-धा वर्सां हे पक्ष परतून एकठांय येवपाची आस्त धरप धाडसाचें थारतलें. काँग्रेसीक राजकी मैदानार परतून एकदां आपल्या स्वताच्या पांयार उबें रावपाचें आसा आनी ताची सुरवात राहूल गांधीन दिल्लीत करप फायद्याचें दिसलें. जो निकाल लागलो तो पळयत जाल्यार नव्यान स्वताच्या पांयार उबे रावपा खातीर यत्न करपी राहूल गांधी नाकान कशे आपटले हें देशान पळयलें. दिल्लींत शुन्यांतल्यान काय तें मुक्त जावंक शकले नात. लोकसभा आनी विधानसभा मेळून सुमार स फावटी फक्त शुन्यच जांच्या हाताक लागलां तांणी आतां स्वताच्या पांयार उबे रावपा खातीर अजून यत्न करूंक जाय काय कितें हाची जाप दिल्लीकारांनी हे वेंचणुकेंत दिल्या. घडये इंडीतले इश्ट पक्षूय हाचे उपरांत काँग्रेसी पसून पयस रावपांतच आपलो फायदो आसा हें जाणून राहूलाक स्वताच्या पांयार उबे रावपाचोच सल्लो दितले. आम आदमी पक्षाकूय आतां आपले स्वताचें अस्तित्व तिगोवन दवरप सोंपें वच्चें ना. तांचे मुखार जाल्यार आव्हानांची माळूच उबी रावल्या.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
