भांगरभूंय | प्रतिनिधी
लोकसभेचे वेंचणुके खातीर आमी सज्ज जाल्ल्याचें भारतीय जनता पक्षान सुमार 35 टक्के लोकसभा मतदारसंघांतले आपले उमेदवार जाहीर करून दाखोवन दिलां. लोकसभे खातीर भाजपाचें बिगूल ताका लागून वाजलां आनी देशांत वेंचणुकेचें वातावरण तयार जावपाक ताची मजत जातली वा दोनशेक उमेदवार जाहीर केल्ल्यान ती तें जालांय अशें म्हणूं येता. भाजप नेतृत्वाक हातूंतल्यान नेमकें किदें सिद्ध करपाचें आसा हें तशें लिपून उरिल्लें ना. तरीय विरोधकांक कसलीच संद दिवप ना हाचे कडेन सादारणपणान तांचो कल दिसता. पयलींच मेल्ल्यांक आनी कितलें मारप, हो प्रस्न आसलो तरी खंयचेय परिस्थितींत तकली वयर काडपाची संद काँग्रेस वा तांच्या इश्ट पक्षांक दिवप ना हीच सद्या भाजपची रणनिती दिसता.
लोकसभा वेंचणूक जाहीर जावचे पयलींच भाजपान उमेदवारांची व्हडली वळेरी जाहीर करून हे आघाडेर आपूण कितली फुडली मजल मारल्या हें तांणी दाखोवन तर दिलांच, तशेंच विरोधकांच्या तंबूत भिरांत तयार करप हेंवूय ताचे फाटलें एक कारण आसुये. नाजाल्यार अशी ताकतीक भाजपान कित्याक करची, अशें दिसप सभावीक आसा. विरोधी पक्षांनी बरोच मोटो गाजोवाजो करून पांच-स म्हयन्यां आदीं बांदिल्ली म्हागठबंधनाची बोट जाल्यार केन्नाच तळाक पावल्या, आनी इन मीन तीन पक्षांचो ‘इंडिया’ सर्वशक्तिमान भाजपाक आव्हान दिवपा खातीर रिंगणांत उबो आशिल्ल्याचें चित्र सद्या दिसता. हें सगलें पळयल्यार भाजपाक इतलें आक्रमक जावपाची गरज आशिल्ली काय किदें, असो प्रस्न साबार लोकांक पडपाक शकता. पूण भाजपाक ‘इस बार चारशे पार’चो संकल्प पुराय करपाचो आशिल्ल्यान घडये तांणी हो पवित्रो घेतला आसुये अशें म्हणपाक जाता.
राहूल गांधी आनी मल्लिकार्जून खर्गे हांच्या काँग्रेस पक्षांत नांव घेवपा सारके पांच-स फुडारीय सध्या उरिल्ले नात. हें वास्तव देशा सामकार स्पश्ट दिसतनाय, लोकसभा वेंचणुकेंत अडेचशें-तिनशें जिखून केंद्रांत सत्तेर येवपाची उमेद बाळगून राहूल गांधी म्हणा वा तांचे आघाडेंत अपघातान राविल्ल्या इन मीन तीन पक्षांचें फुडारी भाजपाक थेट आव्हान दितात. हें पळयल्यार तांकां खऱ्यांनीच दाद दिवची पडटली. मतदारसंघ वांटून घेवपा वयल्यान तयार जाल्लो तिडो अजून सुटना. उमेदवार तर सोदून लेगीत मेळनात. अशे भिरांकूळ परिस्थितींतल्यान काँग्रेस पक्ष वता आसतना, पाटण्यांत आयतारा जाल्ले आघाडेच्या पयल्याच जनविश्व प्रचारसभेंत जो सगल्यांनीच थयथयाट घातलो, तो पळयल्यार ‘उथळ पाण्याला खळखळाट फार’ ह्या मराठींतल्या ओपारीची याद येता.
‘इंडिया’ नांवाच्या गठबंधनांत काँग्रेसी बगर उरल्यात ते फक्त तीन पक्ष. आनी ते म्हणल्यार अखिलेश यादवाचो समाजवादी पक्ष, आनी लोकांनी उंवाळून उडयिल्लो लालू प्रसाद यादव हांचो राष्ट्रीय जनता दल. केजरीवालाचो वांगड ताचे सोयी इतलो मर्यादीत आशिल्ल्यान आघाडेंत बिघाडी चड जावपाचो धोको दिसता. उत्तर प्रदेशांत अखिलेश यादव हाणें काँग्रेस पक्षाक ताच्या पांया कडेन लोटांगण घालपाक लायले उपरांत त्या राज्यांत सारकें किदें घडलां हें राज्यसभेचे हालींच जाल्ले वेंचणुकेंत दिसून आयलें, आनी ह्या दोन पक्षां सामकर वेंचणूक निकाला वेळार कसलें ताट फुडें येतलें हाचो अदमास आतांच जायत्या जाणांनी बांदला.
लालू प्रसाद यादवाच्या राष्ट्रीय जनता दलाक काँग्रेस अजून चिकटून आसा. तरी सुवातो वांटपाचेर निर्णय जाय मेरेन हें सगलें तिगून उरतलें हाची शाश्वती दिवपाक मेळची ना. काल मेरेन जयंत चौधरी हांचो लोकदल निदान पक्ष ‘इंडिया’त तिगून उरतलो अशें दिसतालें. पूण निमाणें तेय भारतीय जनता पक्षाच्या आलाशिऱ्या खातीर एनडीएंत दाखल जालें आनी ‘इंडिया’ च्यो मर्यादा स्पश्ट जाल्यो. हे फाटभुंयेर बिहारांत पाटण्यांत आयतारा जाल्ली ‘इंडिया’ची पयलीच जाहीर सभा देशाक खूबशे संदेश दिवन गेली. राहूल गांधीन ताच्या भारत जोडो न्याय यात्रेंतल्यान मात्शी सवड काडून थंय भाशणूय केलें. पूण ‘नफरत की दुकान’ आनी ‘मोदींके दो अरबपती दोस्त’ हीच आपली सदची टेप ताणें थंय लायली. आतां हातूंतल्यान सारको कसलो परिणाम सादतलो हाचो विचार केल्यार, लोकसभा वेंचणुके खातीर काँग्रेस पक्षान आपणायिल्ली रणनितीच चुकीची असें म्हणपाक जाता. एक वडीलधारी पक्ष ह्या नात्यान काँग्रेस पक्षान सुरवेक सावनूच जंय फावो तीं पावलां घाल्लीं जाल्यार तांचेर सद्याचो वेळ येवचो नाशिल्लो. हाचोच फायदो धूर्तपणान भारतीय जनता पक्षान घेवंक नाशिल्लो जाल्यार तें एक नवल थारतलें आशिल्लें. राहूल गांधीची भारत जोडो न्याय यात्रा पुरायपणान फ्लॉप थारिल्ल्याचें त्या पक्षाचे कांय फुडारी मानून घेतात. उरफाटें हे यात्रेंतल्यान पक्षाचें चड लुकसाण जाल्ल्याचो दावो करपी बरीच मंडळी आसा. फाटल्या दोन एक म्हयन्यांत भाजपान काँग्रेस फुडाऱ्यांचेर मारिल्लो ‘डल्ला’ खूब किदें सांगून वता.
वेंचणूक समझोता करतना कांय मुळाव्या गजालीं कडेन लक्ष दिवपाची गरज आसता. पूण काँग्रेस फुडाऱ्यांची बुद्ध इतली भ्रश्ट जाल्या की आपले कृतींतल्यान जावपी वायट परिणामांचेंय तांकां भान आसना. आम आदमी पार्टी कडेन दिल्ली आनी हेर एक दोन राज्यांत काँग्रेसीच्या पदरांत किदें पडटलें हो तसो संशोधनाचो विशय थारतलो. पूण ताकाच लागून पक्षाची सर्वेसर्वा सोनिया गांधी हांचेर हे फावटी आपल्या पक्षाच्याच न्हय जाल्यार आम आदमीच्या उमेदवाराक मत दिवपाचो वेळ येतलो.
हाका किदें म्हणप?
भारतीय जनता पक्षाच्या आक्रमकताये सामकार काँग्रेस पक्षाची सद्या जाल्ली अावतिकाय हेंच ताचे फाटलें एक कारण आसा. ‘इंडी’ गठबंधनांतल्यान तृणमूल, जनता दल युनायटेड, लोकदल ह्या सारके पक्ष गेल्ल्यान हे आघाडेंत उरलें किदें हो प्रस्न पडटा. पूण तरीय राहूल गांधी आनी कांय फुडारी ‘इंडी’ आघाडी भाजपाक येता तें वेंचणुकेंत पुरून उरतली अशें सांगपाचें धाडस करतात तेन्ना तांच्या ह्या धाडसाचें इस्तिमसांव दिसता. आमी सदांच वेंचणुकांच्या मोडांत आसतात अशें भाजपाचे फुडारी जायते फावटी सांगतना आमी आयकलां. येता ते लोकसभा वेंचणुकेंतली तांची सज्जता ताका पुश्टी दिवपी आसा. काँग्रेस आनी हेर विरोधी पक्षांची सद्याच्या वेळार जाल्ली वाताहात पळयल्यार भाजपाक इतलें आक्रमक जावपाची गरज आसा काय किदें असो प्रश्न पडपाक शकता. पूण विरोधकांक सामकें चिड्डून उडोवपाचें अशीच ही निती दिसता. तातूंत भाजपाक कितलें मेरेन येस मेळटलें हाची जाप फुडें मेळटली.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
