भांगरभूंय | प्रतिनिधी
राहुल गांधी हांकां दिल्लें उतर पाळपाचीय हमी
भांगरभूंय प्रतिनिधी
पणजीः राज्यांतल्या सगळ्या विरोधी पक्षांक एकठांय हाडून आमी येवपी विधानसभा वेंचणुकेंत क्रांती घडोवन हाडटले हें निश्चीत, अशें आमदार आनी गोवा फॉरवर्ड अध्यक्ष विजय सरदेसाय हांणी सोमारा प्रुडंट खबरा चॅनला वयले ‘हेड ऑन’ कार्यावळींत उलयतना हमी दिली.
2017 वर्साचे विधानसभा वेंचणुके उपरांत भाजपा कडेन हात जोडप ही म्हजी चूक आशिल्ली. हांवें तें परत परत मान्य केलां. ते उपरांत हांव रोखडेंच दिल्लींत काँग्रेसीचे फुडारी राहुल गांधी हांकां मेळून काँग्रेसी कडेन युती 2027 मेरेन चालू दवरपाची हमी दिली. ते प्रमाण लोकसभा वेंचणुकेंत आमी एकठांय येवन दक्षीण गोंयांत काँग्रेसीच्या उमेदवार विरियातो फर्नांडीस हांकां तेंको दिलो आनी तांकां वेंचून हाडले. आमी राहुल गांधी हांकां दिल्लें उतर कायम दवरतले, अशें सरदेसाय हांणी सांगलें.
हांव कितें सांगतां तें मनोज परब समजतलें
आयज हांव कितें सांगतां, ताचो परिणाम फुडाराक रिव्होल्युशनरी गोवन्साचे (आरजीपी) अध्यक्ष मनोज परबाचेरूय जातलो. ताचे वांगडा विरोधी पक्ष एकठांय येवपाची मागणी राज्यभरांतले लोक करतले अशें आमदार सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
