भांगरभूंय | प्रतिनिधी
सा डेतीन- चार म्हयन्यांच्या भारत जोडो यात्रेंतल्यान काँग्रेसान जें कितें थोडें जोडिल्लें ताचेर राहुल गांधीन आपूण जावन उदक ओतपाचें काम केंब्रिज विद्यापिठांतल्या आपल्या व्याख्याना मजगतीं केले उपरांत हेर विरोधी पक्षांनी काँग्रेस पक्षा पसून पयस रावपांत आपलें हित आसा, असो विचार केन्ना नाशिल्लो जाल्यार तें एक अजाप थारपाचें. राहुल गांधी अजून तांचे भारत जोडो यात्रेंतल्यान भायर पडल्यांत अशें दिसना. तपस्वीचो भेस तितलो बदल्ला. खाड ट्रीम केलें, पूण केंब्रिज विद्यापिठांत तो जें कितें उलयलो तें भारत जोडो यात्रेंत उलयता अशें दिसलें. व्याख्याना खातीर दिल्ल्या विशयाक राहुल गांधीन चुकून लेगीत हात लायलो ना आनी जें जावपाचे अपेक्षीत आशिल्लें तेंच जालें. विदेशी भुंये वयल्यान भारतांतल्या नरेंद्र मोदी सरकाराचेर टिका करपाचें काम करतना चीनाची तुस्त करपाक राहुल फाटीं रावलो ना. भाजपान ताचे वयल्यान राहुल गांधीचेर तोंणसुख घेवप अपेक्षीतूच आशिल्लें. मात हेर विरोधी पक्षांक लेगीत राहुलबाबाचो हो अवतार पसंत पडलो ना. ताका लागूनच विरोधी पक्षाच्या एकवटा खातीर यत्न करतना काँग्रेसाक पयस दवरपांत सगळ्याचें हित आशिल्ल्याचो निश्कर्श काडून तांणी पावलां घाल्लीं दिसतात. देशांतल्या ज्या विरोधी पक्षांच्या फुडाऱ्यांनी प्रधानमंत्री नरेंद्र मोदी हांकां पत्रां बरोवन केंद्रीय तपास यंत्रणांचो वापर करून विरोधकांचेंच चेपण हाडटात, अशें म्हणिल्लें त्या फुडाऱ्यां मदीं एकाय काँग्रेस फुडाऱ्याचें नांव दिसना. काँग्रेस पक्षाक घडये तशें दिसना हेंच दाखोवन दिवपाचो हो यत्न आसा काय काँग्रेस पक्षाची लडाय आतां तांकांच नडल्या आमचें ताचे कडेन कांय देणे-घेणें ना अशें तर तांकां सुचोवपाचें ना मूं?
आठ मुखेल विरोधी पक्षांच्या फुडाऱ्यांनी प्रधानमंत्री नरेंद्र मोदी हांकां हें पत्र धाडून ‘इन्साफ’ मेळचो अशी मागणी केल्या. तातूंत शरद पवार, अरविंद केजरीवाल, उद्धव ठाकरे, चंद्रशेखर राव, भगवंत मान, तेजस्वी यादव, अखिलेश यादव आनी ममता बॅनर्जी हांचो आसपाव आसतना आजय मुखेल विरोधी पक्ष म्हणून जाचें नांव घेतात त्या काँग्रेसा खातीर ही गाडी कशी चुकली वा चुकयली हें कळपाक मार्ग ना. मात राहुल गांधी हाका आतां तशें कोणून गंभीरतायेन घेनात हें मात हातूंतल्यान सामकार येतना दिसता. नरेंद्र मोदी सत्तेर येत सावन म्हणल्यार 2014 उपरांत देशांतल्या विरोधी पक्षांतल्या फुडाऱ्यांचेर कारवाय जावपाचें प्रमाण वाडलां, अशें ह्या फुडाऱ्यांनी ह्या पत्रांत म्हणलां. आनी पत्रांत उक्तायल्या मतां कडेन काँग्रेस असहमत आसा अशेंय म्हणपाक मेळचें ना, मागीर काँग्रेसाक कुशीक दवरपाचो हेर विरोधी पक्षांचो विचार आसचो ना असो कोणें समज करून घेतल्यार तांतूंन कितें चुकलें? देशांतल्या जायत्या स्वायत्त सरकारी यंत्रणांचे केंद्रांतल्या भाजप सरकारान खाजगीकरण करून उडयलां असो आरोप हे विरोधी फुडारी करतात. दिल्लीचे उपमुख्यमंत्री मनीष सिसोदिया हांकां हजारांनी कोटींच्या सोरो घोटाळ्यांत अटक केल्ल्यान तर विरोधकांच्या पांयां पोंदची आशिल्ली नाशिल्लीं रेंव निसरून गेल्या आनी तातूंतल्यान इन्साफ मेळचो हे खातीर लोकांचें लक्ष ओडपा खातीर विरोधकांनी हो मार्ग आपणायला अशें दिसता.
आठ विरोधी पक्षाच्या णव फुडाऱ्यांनी प्रधानमंत्री नरेंद्र मोदी हांकां धाडिल्ल्या ह्या पत्रांतल्यान कांय प्रश्न सामकार येतात आनी ताच्यो जापो मेळनात. काँग्रेस, जनता देल युनायटेड अशा जायत्या विरोधी पक्षांक सरकारी तपासणी यंत्रणेचो दुरुपयोग करनात वा तशें जायना अशें दिसता दिसता काय ह्या प्रश्नाचीय जाप मेळपाक जाय. ना जाल्यार ह्या पक्षांक विस्वासांत घेवनच हें पत्र धाडपाक जायनाशिल्लें?
मनीष सिसोदियांक जाल्ली अटक ही तपास यंत्रणेचो दुरुपयेग करूनच केल्या असो लोकांचो निश्कर्श कसो काडपाक जातलो. न्यायालयांचेरूय हांचो विस्वास उरिल्लो ना तर? सिसोदिया हांचे वयल्या आरोपांत अजिबात तथ्य नाशिल्लें जाल्यार सीबीआयची सिसोदियाक रिमांडाचेर घेवपाची मागणी मानून घेतल्ली आसतली काय, हाचीय जाप कोणे तरी दिवपाची गरज आसा. आनी अर्थांतूच सगल्यांत म्हत्वाची गजाल म्हणल्यार, दिल्ली सरकाराच्या सोऱ्या विशयक धोरणांत कांयच घोटाळो नाशिल्लो जाल्यार ताचेर गडबड गोंदळ जातगीर सरकारान हें धोरण फाटीं घेवपाची ताकतीक कित्याक केली? स्वता अरविंद केजरीवाल आतां कितलेंय सांगूं, मात सिसोदिया हांणी तांची सामकी पंचाईत करून सोडल्या. आनी तांचो फुडलो राजकी प्रवास चडून आडमेळ्यांचो जावपाक शकता. ज्या विरोधी फुडाऱ्यांची केंद्रीय तपासणी यंत्रणा वरवीं चवकशी चालू आसा त्या सगल्याच फुडाऱ्याचें निरपराधीत्व तुमी खंयच्या निकशांचेर सिद्ध करतात हें एक फावट सांगून उडोवपाकूच जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
