भांगरभूंय | प्रतिनिधी
देवरिया, खबरां संस्था: उत्तर प्रदेशांतल्या देवरियांत चॅम्पियन्स ट्रॉफीची फायनल मॅच पळयतना एके विद्यार्थीनीक मरण आयलें. विराट कोहली आवट जातकच ते चलयेक काळजाचो आताक आयलो. न्यूझीलॅण्डाच्या मायकेल ब्रेसवेल हाणें कोहलीक एके धांवडेचेर आवट केलो.
मॅच सुरू आसतना, सोफाचेर बशिल्ली विद्यार्थिनी अचकीत बेशुद्ध जाली आनी सकयल कोसळ्ळी. घरच्यांनी तिका हॉस्पिटलांत व्हेली. थंय दोतोरांनी तिका मरण आयिल्ल्याचें सांगलें. ही विद्यार्थीनी विराटाची फॅन आशिल्ली.
अजय पांडे हे दिवाणी न्यायालयांत वकील आसात. ते शारांत सरकारी आयटीआय लागसारा बांदिल्ल्या घरांत रावतात. आयतारा तांची धूव प्रियांशी पांडे (१४) कुटुंबा सयत भारत आनी न्युझीलॅण्ड हांचे मदीं दुबयंत चलपी चॅम्पियन्स ट्रॉफीची फायनल मॅच पळयताली. ती ही मॅच आनी विराटाचे बॅटींगे खातीर बरीच उमेदी आशिल्ली. भारताचे पयले विकेटी उपरांत विराट कोहली मैदानाचेर आयलो. मात एका रन्सा उपरांत तो आवट जालो. हें पळोवन प्रियांशी अचकीत बेशुद्ध पडलें. हॉस्पिटलांत व्हेले उपरांत ताका मरण आयिल्ल्याचें समजलें.
राघव नगराच्या स्कॉलर्स माध्यमीक शाळेंत ही चली आठवेच्या वर्गांत शिकताली. ती अभ्यासांत खूब हुशार आशिल्ली. तशेंच आवय- बापायच्या लग्नाच्या धा वर्सां उपरांत तिचो जल्म जाल्लो. ती क्रिकेट मोगी आशिल्ली. तिच्या मरणान पुराय वाठार दुख्खांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
