विम्बल्डनांत आगळ्या वेगळ्या विक्रमाची नोंद

भांगरभूंय | प्रतिनिधी

संवसारांतली सगल्यांत पोरणें टॅनीस सर्तींतली एक विम्बल्डनांत काल एक आगळो वेगळो संवसारीक विक्रम घडलो. सर्तीच्या 146 वर्साच्या इतिहासांत बायलांच्या एकोड्या गटांतले मॅचींत सगल्यांत व्हडलो टायब्रेकर जालो. हो टायब्रेकर सुमार अर्द वर चल्लो. हो विम्बल्डनांतलोच न्हय जाल्यार चारूय ग्रॅण्ड स्लॅमांतलो सगल्यांत व्हडलो टायब्रेकर आसा. विम्बल्डनाची आयोजन संस्था ऑल इंग्लंड क्लबान आपल्या सोशल पोस्टाचेर ह्या संवसारीक विक्रमाची पुश्टी केल्या.

38 पॉयण्ट्साचो हो टायब्रेकर युक्रेनाचे लेसिआ सुरेंकोन जिखलो. ह्या जैता सयत तिणें चवथे फेरयेंत सुवात मेळयली. तिणें तिसरे फेरयेंत रोमानियाचे एना बोगडान हिका 4-6, 6-3, 7-6 (20-18) अशा फरकान हारयली. तिसरो सेट टायब्रेकरांत गेलो.

मजगतीं, संवसारीक क्रमवारींत पयले सुवातेर आशिल्ले इगा स्वियातेकान आनी आदली पयल्या क्रमांकाची खेळगडी व्हिक्टोरिया अझारेंकान आपआपली मॅच जिखून बायलांच्या एकोड्या गटाचे चवथे फेरयेंत सुवात मेळयली.

पोलंडाचे स्वियातेकान क्रोएशियाचे पेट्रा मार्टिकाक 6-2 आनी 7-5 अशा सरळ सेटांनी हारयली. जाल्यार 2012 आनी 2013ची ऑस्ट्रेलियन ओपन वस्ताद 33 वर्सां पिरायेची अझारेंकान रशियेचे दारियाक सात्किनाक 6-2 आनी 6-4 अशा फरकान हारयली.

चवथे सिडा वयली अमेरिकेची जेसिका पेगुलान इटलीचे इलिसाबेता कोसियारेट्टो हिका 6-4 आनी 6-0 अशा फरकांनी, स्वित्झर्लेण्डाची बेनसिचान पोलंडाचे मॅग्डा लिनेटे हिका 6-3 आनी 6-1 अशा फरकांनी आनी कॅनाडाचे एंड्रेस्कून युक्रेनाचे एल कालिनिनाक 6-4, 4-6 आनी 7-6 अशा तीन सेटांनी हारोवन फुडले फेरयेंत सुवात मेळयली.

दादल्यांच्या एकोड्या गटांत आंद्रेई रुबलेव, रोमन सफीउलीन, डॅनीस शापोवालोव, क्रिस्तोफर युबॅंक्स, अलेक्झेंडर बुब्लिक, जैनिक सिनर हांणी आपआपली मॅच जिखली.

ताचे पयलीं दुसरे फेरयेंत स्टेफानोस त्सित्सिपास आनी टॉप सीड कार्लोस अल्कारेज हांणी जैत जोडून फुडले फेरयेंत सुवात मेळयली.

रुबलेवान बेल्जियमाच्या डॅव्हिड गॉफिनाक 6-3, 6-7. 7-6 आनी 6-2 अशा चार सेटांनी हारयलो. सफिउलिनान अर्जेंटिनाच्या पेलाक 7-6, 6-4 आनी 6-0 हारयलो. कॅनडाच्या शापोवालोवान ब्रिटेनाच्या लियाम ब्रॉडी आड 4-6, 6-2, 7-5 आनी 7-5 अशा फरकान जैत जोडलें. अमेरिकेच्या युबॅंक्सान ब्रिटेनाच्या नोरीक 6-3, 3-6, 6-2 आनी 7-6 असो हारयलो.