विम्बल्डनः जोकोव्हीच, श्र्वीऑनटेक फुडले फेरयेंत

भांगरभूंय | प्रतिनिधी

खबरां संस्था
विम्बल्डनः दुसरो सिडेड नोव्हाक जोकोव्हीच आनी पयलो सिडेड स्पेनाचो कार्लोस अल्कराझ तशेंच तिसरो सिडेड डॅनील मेदवेदेव आनी स्टेफनोस त्सित्सिपास हांणी आपापल्यो मॅची जिखून विम्बल्डन टेनीस सर्तीचे दादल्याचे एकोडेन फुडले फेरयेंत प्रवेश केलो. बायलां मदीं पोलंडाची पयली सिडेड इगा श्र्वीऑनटकान आपली जैताची लय राखली जाल्यार सवी सिडेड ओन्स जाबेऊर, अमेरिकेची जेसिका पेगुला आनी युक्रेनच्या एलिना स्वितोलिनान जैत मेळयलें.
सर्बियाच्या जोकोव्हिचान स्विर्त्झलंडाच्या स्टॅन वाविरकाचेर 6-3, 6-1, 7-6 (7-5) अशें सरळ सेटांनी जैत मेळयलें. पयले दोन सेट जिखल्या उपरांत तिसऱ्या सेटांत वाविरकान ताका आव्हान दिलें. मात जोकोव्हिचान टायब्रेकरांत सेट जिखून जैताची नोंद केली. हेर मॅचींत अल्कराझान चिलीच्या निकोलस जॅरीचेर 6-3, 6-7 (6-8), 6-3, 7-5 अशें जैत मेळयलें. मेदवेदेवान हंगेरीच्या माटरेन फुक्सोव्हिक्साक 4-6, 6-3, 6-4, 6-4 अश्या फरकान हारयलें. त्सित्सिपासान आपली जैताची लय राखून सर्बियाच्या लास्लो जेरेलाक 6-4. 7-6 (7-5), 6-4 अशें हारयलें.
बायलांचे एकोडेंत श्र्वीऑनटेकाक मार्टिचान आव्हान दिलें. मात श्र्वीऑनटेकान चमक दाखोवन जैत मेळयलें. य़ुनिशियाच्या जाबेऊरान चीनाच्या बाइ हाचेर 6-1, 6-1 असें सोपें जैत मेळयलें. पोगुलान इटलीच्या एलिसाबेटा कोकिआरेट्टोलाक 6-4, 6-0 अश्या फरकान हारोवन फुडले फेरयेंत प्रवेश केलो. स्वितालिनान सोफिया केनिनलाक 7-6 (7-3), 6-2 अशें हारयलें.

बोपण्णा-एबडेन जोडयचें जैत
भारताचो रोहन बोपण्णा आनी ताचो ऑस्ट्रेलियन वांगडी मॅथ्यू एबडेन हांणी दादल्याचे दोट्टींचे पयले फेरयेंत अर्जेटिनाच्या गुईलेर्मो  डुरान आनी  टॉमस मार्टिना एचेवेरी जोडयेक 6.2, 6-7 (5–7), 7-6 (10-8) अशें हारयलें. भारतीय जोडी जीवन नेदुचचेझियान आनी एन श्रीराम बालाजीन अमेरिकेच्या ऑस्टिन क्राजिचेक आनी कोएशियाच्या इवान डॉडिज जोडये कडल्यान 6-7 (5-7), 4-6 अशी हार खावची पडली.