विमानाचो सोद

भांगरभूंय | प्रतिनिधी

भावंडांनो,
म्हज्या घरांतलीं जाण्टेलीं म्हाका सांगतालीं की आसा ते परिस्थितींत समादान मानचें म्हूण. पुणून भावंडांनो, तेन्ना आमकां भुरग्यांक तें पटनाशिल्लें. कारण सगळ्याच कडेन वा सगळ्याच परिस्थितींनी तें लागू पडटाच अशें नाशिल्लें. कांय प्रमाणांत तें सत दिसतालें, जाल्यार कांय प्रमाणात तें फटच दिसतालें. समजात, तुमचे लागीं शक्त आसा, तांक आसा, जिद्द आसा जाल्यार तुमचे ते परिस्थिती वेळार तुमी समादान मानप योग्य न्हय आनी जर तुमी निराधार आसात जाल्यार तुमचे इत्से प्रमाण तुमच्यांनी चड मेळोवं नज, तेन्ना मात आसा ते परिस्थितींत समादान मानप योग्य. पुणून एक सांगूं..?
केन्ना केन्नाय, सांगलां ते परिस्थितींत समादानी जावपाचें सभावान आपली उदरगत जावपाक पावना. असंतुश्ठतायेक लागुनच मनीस नवी धडपड, नवे यत्न करूंक पावता आनी ते धडपडीक लागूनच ताची उदरगत जाता. असंतुश्टताय हेंच उदरगतीचें वा विकासाचें मूळ कारण म्हणल्यार अतिताय जावंची ना.
भावंडांनो, कसलेंय काम करतना तातूंत आपणाक रोखडेंच येस मेळटाच अशें ना. अपेस वांट्याक आयलें म्हणून आपणें खंत करून घेवपाची नासता. परतून यत्न करचे, जिद्दीन, चिकाटेन, कल्पकतायेन यत्न करीत रावचें. तें काम तडीक, पुर्णत्वाक पावताच पावता. तातूंत तुमकां येस मेळटाच मेळटा. कार्य कितलेंय अशक्य वा जड दिसलें तरी जिद्द, चिकाटी, कल्पकताय आपणावन यत्न करीत रावल्यार तें कार्य सोंपें जावन तडीक पावता.
भावंडांनो, सादी देख दितां. ओरवील आनी विलबर्ट रायट हे दोग अमेरिकन भाव. हांवें आतां तांचीं नांवां घेना फुडें तुमकां पयल्या विमान उड्डाणाची याद जाली न्हय ?
हय. तांणी 17 डिसेंबर 1903 दिसा विमानाचो सोद लायलो. भावंडांनो, हे दोगूय भाव म्हणल्यार सायकलीच्या दुकानाचे धनी. सायकली तयार करप तशेंच विकप, दुरूस्त करप अशें काम करी. सदांच सायकलीच्या मशीना कडेन तांचो संपर्क आनी प्रयोग. तातूंत एक दीस तांणी सेफ्टी बायसिकल तयार केली. त्या संशोधनांतल्यान तांची उमेद आनीक वाडीक लागली. मशिना घडयता आसतना एका दिसा उडटें मशीन घडोवपाचें पिशें लागलें. उडटें मशीन करपाक ते यत्न करीत रावले. उडट्या मशिनाच्या प्रयोगा खातीर तांणी किट्टी हॉक हे दर्या देगेची सुवात वेंचून काडली. दोगांयनी मेळून सातशे खेपे उड्डाणाचे प्रयोग केले. त्या यत्नातूंच तांणी निर्माण केल्ल्या मशिनांत सोंपेपणा आयलीं. तांणी यत्न थांबयले ना. चिकाटी सोडली ना आनी देखूनच भावंडांनो, अखेरेक 17 डिसेंबर 1903 दिसा तांकां तांणी निर्माण केल्लें मशीन वाऱ्यार हुबोवपाक येस आयलें.
खर कश्टां उपरांत ओरविलान 12 सेकंदानी विमान 120 फूट वयर हुबयलें. दुसरे खेपे, विल्बर ह्या भावान 59 सेकंदानी विमान ८५२ फूट वयर चलयलें. आनी विज्ञानीक मळार नवो इतिहास घडयलो. संवसाराक नवें देणें दिलें. तांच्या संशोधनान आयज मेरेन विज्ञानीक मळार ओरवील (जल्म: 19-08-1871 मरण : 30-01-1948 आनी विल्बर जल्म:16-04-1867, मरण :30-05-1912) हे रायट ब्रदर अज्रंवर उरल्यात. 17 डिसेंबराच्या निमतान भावंडांनो, ओरवील आनी विल्बर ह्या रायट भावांची याद काडून तांकां आमी मानाचो सलाम दिवया हां ? याद्दीन. बरें तर.
उल्हासभाई