भांगरभूंय | प्रतिनिधी
मुंबय, खबरां संस्था: भारत आनी पाकिस्ताना मदल्या ताणाच्या संबंदाचे फाटभूंयेर फाटल्या कांय सप्तकां सावन देशांतल्या खुबश्या म्हत्वाच्या शारांचे सुरक्षेत व्हडा प्रमाणांत वाड केल्या. राज्याची अर्थीक राजधानी आशिल्ले मुंबयतूय सुरक्षेत वाड केल्ली आसतनाच काल मुंबय विमानतळावेल्या विमानांत बॉम्ब आशिल्ल्याचे धमकेचो फोन आयले उपरांत यंत्रणांची धांवपळ जाली. मुंबय पुलिसांच्या नियंत्रण फाट्याक हो फोन आयिल्लो. हो फोन आयले उपरांत यंत्रणां वेगान कामाक लागलीं.
अंधेरी वाठारांतल्यान घेतले ताब्यांत
यंत्रणांनी विमानाची तपासणी केली तेन्ना तातूंत खंयचीच दुबावीत वस्त वा प्रकार सांपडूंक ना. हे विशीं एका दुबाविताक अंधेरी वाठारांतल्यान ताब्यांत घेतला. अटक केल्ल्या मनशा आड आझाद मैदान पुलीस स्टेशनांत अदखलपात्र गुन्यांव दाखल केलो. नोटीस दिवन त्या मनशाक पुलिसांनी सोडलो.
धमकी दितना कितें सांगलें?
मुंबय पुलिसांच्या नियंत्रण कुडीक मंगळारा सकाळीं सुमार ९ वरांचेर धमकेचो फोन आयिल्लो अशी म्हायती सुत्रांनी दिली. फोन करपी मनशान दनपरां २ वरां मेरेन छत्रपती शिवाजी महाराज विमानतळ बॉम्बस्फोटांत उडोवपाची धमकी दिली. ह्या फोना उपरांत यंत्रणांनी सगले कडेन तपासणी केली तेन्ना तांकां संबंदीत विमानांत कसलेच तरेची दुबाव येवपा सारकी गजाल सापडूंक ना. तेन्ना फोन करपी मनशाच्या फोनाची चवकशी केली तेन्ना तो साकीनाका पुलीस स्टेशनाच्या वाठारांत आशिल्ल्याचे पुलिसांक समजलें.
तांत्रीक म्हायतीच्या आधारार घेतलो सोद
तांत्रीक म्हायतीच्या आधारार मुंबय पुलिसांचो गुन्यांव प्रकटीकरण पंगड फोन आयले उपरांत कांय वेळान साकीनाका हांगा गेलो. मात त्या मनशाचो मोबायल बंद आशिल्ल्याचें समजलें. निमाणें पुलिसांनी तांत्रीक मजत घेवन तपास केलो. पुलिसांनी मोबायल लोकेशन आनी सीम कार्डा विशीं म्हायतीच्या आदारार दुबावीत मनशाचो फोटो आनी नांव मेळ्ळें. ते म्हायतीच्या आदाराचेर पुलीस एमआयडीसी पंगडान अंधेरी वाठारांतल्या कपड्यांच्या ल्हान कारखान्यांत काम करपी मजुराक ताब्यांत घेतलो. दुबावीताची वळख मनजीत कुमार गौतम अशी पटली. ताची चवकशी करून आझाद मैदान पुलिसांच्या ताब्यांत ताका दिलो. उपरांत ताका समजावन सोडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
