भांगरभूंय | प्रतिनिधी
नवी दिल्ली, खबरां संस्था ः विमानतळार खाणां परवडपी दरांत मेळटलीं. हे खातीर एअरपोर्ट अथॉरिटी ऑफ इंडिया (AAI) विमानतळांचेर इकॉनॉमी झोन सक्तीचें करपाचे आसात. म्हणल्यार दरेका विमानतळार कांय सुवात इकोनॉमी झोन म्हणून राखून दवरतले, थंय प्रवाशांक सवाय दरांत खाणां विकतीं मेळटलीं.
ह्या इकोनॉमी झोनांत सुमार 60- 70 टक्क्यांनी सवाय खाणां मेळटलीं अशें एएआयचे अधिकाऱ्यांनी सांगलें. सध्या विमानतळार एक च्या 125- 200 रुपयांक मेळटा, पूण इकोनॉमी झोनांत च्या 50- 60 रुपयाक मेळटलीं.
विमानतळार जेवण इतलें म्हारग आसा की सामान्य प्रवाशांक तें परवडना अशी कागाळ बरोच तेंप दरेका राज्यांतले प्रवासी करतात, अशें नागरी विमान मंत्रालयाच्या एका अधिकाऱ्यान सांगलें.
सामान्य प्रवाशाक घरांतल्यान विमानतळार पावपाक आनी मागीर प्रवास पुराय करुन जाय आशिल्ल्या सुवातेर पावपाक स ते सात वरां लागतात. विमानतळार आनी विमानांत प्रवाशांक च्या, उदक वा जेवण मेळटा. पूण तें इतलें म्हारग आसात की लोक कितेंय खावपा परस उपाशी रावप बरें मानतात.
इकॉनॉमी झोनांत फकत खाणा- पेयांची सुविधा मेळटली अशें भारतीय विमानतळ प्राधिकरणाच्या अधिकाऱ्यांनी सांगलें. ताचे कडेन संबंदीत हेर आऊटलेट आसतले. कपडे, खेळणीं, मोबायल स्टोर वा हेर खरेदी आउटलेट्स आसचे नात. सामान्य प्रवाशांक परवडपी दरांत जेवणाची सुविधा दिवप हो ताचो हेत आसा, जी खंयच्याय प्रवाशाची मुळावी गरज आसा.
ही सुविधा डिसेंबर मेरेन देशांतल्या तीन विमानतळांर सुरू जावपाची शक्यताय आसा. जाल्यार फुडल्या स म्हयन्यांत दरेका विमानतळार इकोनॉमी झोन विकसीत करपाचे यत्न सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
